1 TIMOTEO 4

1Esee hn Porrosht Ɨchɨbich tata shuu ɨmeheeych uje ich yej terɨhɨ uje Porrosht sɨhne nãhu ĩ̵rmo nehe hn ode uje oym Porrosht hn otsahmũr erze ɨchɨbiyo mɨhnũwo uje sehnyẽr õr. Erze õr ahwoso uje otsanɨmɨrãha otatɨm õr wɨr shɨ tãra demonyo. 2Shɨ oshiyokorãha õr uje tãra erze hnakɨrbo uje õr aho yũhɨrsh hn õr kushĩyo. Ich õr ukushiĩ yakaha õr, hn ye onuuna uje oshiyokõr. 3Erze hnakɨrbo sehe onontew uje õhyiye ahɨr. Oposo depo uje wɨr sehe onontew par uje ye otew. Per Porrosht shiyokõr erze oposo par uje erze uje ye olotiis ɨre hn ochɨraha erze ɨr ahwoso uje ich ũru onɨna ɨre hn otew. 4Nos wɨr kuche uje Porrosht shiyokõrkite wɨr ich om. Nĩhyok oposo uje mɨhnũwo. Nos om per tyenɨj yɨna Porrosht hn yahu erze oposo, 5pork uje eyok ler Porrosht ahwoso hn uje eyok orar shuu oposo om. 6Titɨm owa. Uje ahakorãha erze Porrosht aabo uje tichew titɨm owa ich ahakõr om. Tyenɨj tokole ompa erze obiyo uje Jesucristo ɨshɨm owa par uje ahakõr. Tyenɨj tokole ɨmeheeych uje eraha Porrosht ahwoso, hn ye otiis ɨrpe, hn shish ahakõr uje Porrosht ahwoso tata. 7Ye ẽr wɨr monɨhne pork ye jukur. Wɨr mɨhnũwo. Ye ũrpe. Uhu eluuta om par uje owa ɨtso Porrosht ɨr ɨluuta. 8Ich om uje yeẽk shiyokõr nenɨmiyo par shuu dekiyo koota per ich ma om uje shiyokõr uje Porrosht sahmũr. Kɨmɨjɨ shiyokõr uje Porrosht sahmũr ich om par ɨre uje yesh de nãhu ĩ̵rmo, hn ich ompo par wahacha poõrc nehe. 9Ahnũwo uje tichew titɨm owa ich ũru. Ma om kɨmɨjɨ oso ye olotiis. 10Heke yishew obiyo ich yiyuhu eyoklo, pork ye yotiislo Porrosht uje ɨka uje tata uje eyok owich de ɨre ahɨr. Cristo wɨchɨ uje nos ɨshɨ õr hnɨtewɨhɨ Porrosht ahɨr per shɨ erze uje ye olotiis ɨre wɨr uje otĩ̵r ɨre ahɨr nehe. 11Atɨm õr erze ahwoso uje titɨm owa hn ahakorãha õr par uje odɨraha. 12Ye ahakõr kuche uje shuu oso otata uje shɨ owa hnakɨrbitak hn ye eraha latɨk. Ma om uje uhu Porrosht aabo oneẽt owa. Shish ata ahwoso uje ich om, hn ahakõr uje ich om. Ahmũr oso yewo, hn ye otiis Porrosht ahwoso, hn shish tyenɨj uhu eluuta om par uje Porrosht aabo oteychɨm owa hn oneẽt owa. 13Uje ehn anem yok par uje tekɨrɨhɨ owa ich shish owa ler erze Porrosht ahwoso erze oso õr ɨkɨch par uje otẽr, hn anɨmɨrãha Porrosht ahwoso atɨm õr, hn ahakorãha õr. 14Anciano ochɨbɨte nahme eheta eeychni par uje otsapur Porrosht par uje ɨshɨm owa akɨrbo par erze obiyo. Ye moym erze akɨrbo. 15Eyuhu owa par uje ahakõr erze obiyo par uje uhu oteychɨm owa uje shish ma ahakõr uje om. 16Abeyshɨp owa par uje ye moym Porrosht hn otiis ɨre. Abeyshɨp owapo par uje ahakorãha õr uje ich ũru. Shish ahakorãha õr. Kɨmɨjɨ ye moym Jesucristo hn ye moym uje ahakorãha õr uje ich ũru ich owa owich de Porrosht ahɨr hn wɨr õr owich de toy.

will be added

X\