1 TIMOTEO 2

1Sehe tuu atɨm Porrosht aabo uje õr orar olapur Porrosht par erze uje oso yewo õr nesita hn tyenɨj onɨna Porrosht par takashɨm õr. 2Hn tyenɨj olak orar toy par erze õr bahluwo uje õr deyo hn par erze wɨmshɨro toy par uje ye odihokos eyok heke shish eyok aho kɨɨs hn eyoklo pwele yeeychãhalo Porrosht hn yiyokõrlo uje om. 3Uje eyok orar yuhulo ɨtsorz ich ɨhĩ̵rt. Porrosht sahmũr uje yiyokõr yuhulo ɨtsorz. Wɨchɨ uje ɨshɨ eyok hnɨtewɨhɨ dahɨrkite. 4Wɨchɨ sahmũr uje nos oso omasaha par ɨr aabo, hn sahmũr uje nos ochɨraha ɨr ahwoso uje ich ũru. 5Shɨ Porrosht nohmɨra de. Nĩhyok ye Porrosht kɨnehẽtɨkɨsh. Shɨ ese hnakɨrbich Jesucristo wɨchɨ uje shuu Porrosht ehet kɨɨsɨhɨ oso. 6Ɨshɨm õr ɨre par toy par nos ɨshɨ õr hnɨtew. Osdeyo uje shiyokõr shuu ɨtsorz heke nos otatɨm oso ɨr ahwoso uje Cristo ɨshɨ oso õr hnɨtewɨhɨ Porrosht ahɨr. 7Heke Porrosht chiihla yok par yok ɨr apóstol hn par tanɨmɨrãha ɨr ahwoso. Erze ahwoso uje titɨm owa ich ũru. Ye tehnyẽr owape. Porrosht ɨshɨm yok erze obiyo par uje tiyokorãha erze oso uje ye õr israelpe par uje ye olotiis Porroshtpe hn par uje ochɨraha uje ich ũru. 8Sehe tuu nos hnakɨrbo uje ode lekɨtiyo Porrosht aabo õr ehet õr orar olapur Porrosht. Wɨr uje ye oniyokõr mɨhnũwo hn ye onowãhaye hn ye odihokosye par uje sehe oteye. Ich onem nahme uje õr orar pork shɨ õr ɨluu. 9Sehe tuu erahalo uje ich om uje tɨmcher uje õr Porrosht eebe otsarz ɨre oyãha lasuwo uje ich om par õr ɨre, per ye ompe uje oyãha lasuwo uje ich om shɨ par uje shuu hnakɨrbo otsahmũr ɨre. Hn om uje tɨmcher otsarz dehe per ye ompe uje otsarz oshuu ɨre ɨhĩ̵r pishɨ shɨ par uje shuu hnakɨrbo otsahmũr ɨre. Ich om toy uje ochɨbɨte oro, kɨmɨjɨ otuuhna o kɨmɨjɨ odiyuwa nar o kɨmɨjɨ kuche yewo per ye ompe uje ochɨbɨte oshuu ɨtsorz shɨ par uje shuu hnakɨrbo otsahmũr ɨre. Hn om toy uje oyãha erze õr ɨshuwo uje ich debichpa per ye ompe uje oyãha shɨ par uje shuu hnakɨrbo otsahmũr ɨre. 10Erze tɨmcher uje otata uje õr Porrosht eebe tyenɨj oshiyokõr obiyo uje ich om par oshuu ɨmeheeych uje õr ɨluu om. 11Erze tɨmcher tyenɨj otẽr uje otsanɨmɨrãha Porrosht ahwoso hn ye odiilehet. Tyenɨj otola Porrosht aabo õr bahluwo. 12Ye ompe uje tɨmcharrza shiyokorãha hnakɨrbo, hn ye ompe uje masaha par õr bahluwa hn chɨpa hnakɨrbo. Shɨ tyenɨj ye diilehet 13pork wapkite hn Porrosht shiyokõr Adán. Uje chɨmɨtkite hn shiyokõr Eva. 14Satanás ye nehnyẽr Adankite. Shɨ sehnyẽr asa tɨmcharrza Eva hn shuu shiyokõr uje ich mɨhnũwo. 15Heke Porrosht sepyẽr tɨmcher hn shuu õr dospa uje õr aabosh, per shish tyenɨj õr aabosh, hn õr owich de Porrosht ahɨr kɨmɨjɨ ye olotiis Jesús, hn kɨmɨjɨ otsahmũr oso yewo, hn kɨmɨjɨ otsahmũr Porrosht hn kɨmɨjɨ otɨbey ɨre par uje ye oniyokõr uje mɨhnũwo.

will be added

X\