1 TIMOTEO 1

1Yok Pablo. Porrosht shuu tomsaha par Jesucristo ɨr apóstol. Porrosht shuu Jesucristo tɨrẽt par ɨshɨ eyok hnɨtewɨhɨ Porrosht ahɨr par uje eyok owich dechɨ ɨre ahɨr. Jesucristo sahmũr toy uje tomsaha par yok ɨr apóstol. 2Timoteo, tuu ochichew ana hutɨta tokosɨm owa. Owa shɨ owa ɨtso uje pijo pork titɨm owa erze Porrosht ahwosni hn amsaha par ɨr aap. Sehe tuu eyok Deych Porrosht hn eyok Ɨrhĩch Jesucristo odosɨr owa. Sehe tuu onuuna uje owa losuhlaap hn otakashɨm owa hn oduhu ehet kɨɨs. 3Uje ehn yahpaa tɨtĩ̵r hnɨmich Macedonia petɨkni hn titɨm owa par uje shɨ akahachɨ dɨt Efeso. Sohmɨramo odechɨ uje otsanɨmɨrãha dekushiĩ par uje otsehnyẽr erze oso. Tyenɨj atɨm õr par uje onoym wɨr dekushiĩ. 4Atɨm õr par uje ye shɨ oduhu deyuwo tɨsĩ̵r monɨhne, hn ye oduhu deyuwo tɨsĩ̵r erze eyok poruwo wɨshɨ. Erze monɨhne hn erze eyok poruwo wɨshɨ õr ahwoso shɨ shuu oso õr koswãha Porrosht hn ye takashɨm osope par uje ma ochɨraha Porrosht ahwoso par uje ma ye olotiis ɨrpe. 5Nos wɨr Porrosht ahwoso uje oyanɨmɨrãha wɨr par nos shuu oso otsahmũrye. Uje oduhu daho yũhursh ich ye õr pwele onahmũryepe. Tyenɨj oduhu deyuwo tɨsĩ̵r par uje õr aho kɨɨsɨhɨye, hn oduhu Porrosht ahwoso yakaha par uje shish ye olotiis ɨrpe. 6Ode uje shɨ oym erze ahwoso uje ich ũru hn shɨ okeytkeryẽhe erze ahwoso uje ye jukur par õr ɨre. 7Sehe oniyokorãha oso waa ley waa je Porrosht ɨshɨm Moiseskite, per õr ɨre yerɨj odɨrahapa uje oshiyokorãha oso. Uje oshiyokorãha õr ich oshuu ɨre ɨtso uje ochɨraha. 8Oyɨraha uje asa ley ich ɨhĩ̵r. Porrosht chɨbɨte asa ley par erze obiyo uje ich ɨhĩ̵rtso, per ye ompe uje wɨr ochɨbɨte par obiyo kɨnãho. 9Yɨrahalo uje ye dɨbɨte leype par erze oso uje yelɨj oniyokõr uje mɨhnũwo. Chɨbɨte ley par sontew erze uje ye oniyokõrpe asa uje ley tata. Chɨbɨte asa ley par sontew erze uje ye onahmũr oshiyokõr uje yewo otata, hn par erze uje ye onahmũr Porroshtpe, hn par erze uje shish oshiyokõr uje mɨhnũwo, hn par erze uje ye otola Porroshtpe, hn par erze uje ye onahmũr oteeychãha Porrosht, hn chɨbɨte par erze uje oshuu deyo oshuu otoy, hn par erze uje oshuu date oshuu otoy, hn par erze uje oshuu oso oshuu otoy. 10Chɨbɨte ley par sontew erze uje ye onõyhi pishye ahɨrpe. Shɨ omuhuye ahɨr, hn erze uje shɨ otorãhaye, hn chɨbɨte par sontew erze hnakɨrbo uje õyhiye ahɨr, hn par sontew erze uje otorha oso par õr yɨlo, hn par erze uje õr kushĩyo, hn sontew erze uje shɨ otata lekushiĩ otatɨm jwe par oshuu jwe shiyokõr uje mɨhnɨkĩ̵hɨ yet. Chɨbɨte ley par nos wɨr kuche yewo uje oshiyokõr wɨr uje oyuwe Porrosht ahwoso. 11Ahnũwo Porrosht ahwoso ich om hn ich om uje oso oteeychãha ɨre. Ɨshɨm yok par uje tanɨmɨrãha titɨm oso uje Jesús ɨshɨ õr hnɨtewɨhɨ Porrosht ahɨrkite par uje õr owich dechɨ ɨre ahɨr. 12Tɨkɨnshɨp eyok Ɨrhĩch Jesucristo uje ɨshɨm yok pukurbo par tanɨmɨrãha ɨr ahwoso. Wɨchɨ chɨraha wapni uje tyenɨj tiyokõr om erze ɨr ɨbiyo heke ɨshɨm yok par uje tiyokõr. 13Uje ehn yahpaa tomsaha par Porrosht aap ich tiyuhu pahwoso mɨhnuwõho Cristo, hn shish tiyokõr mɨhnuwõho ɨre pork tiyokõr mɨhnuwõho Porrosht aabo. Pɨluuta ich mɨhnũpa. Per Porrosht chuuna uje yok losuhlaap hn sosɨr yok pork ye tɨkɨraha uje tiyokõr hn tokotiis uje Jesús wɨchɨ uu Porrosht Ijɨt. 14Eyok Ɨrhĩch Jesucristo takashɨm pishɨ yok hn ye duhu tokotiis ɨrpe hn shuu tahmũr oso pork tomsaha par yok Porrosht aap. 15Sehe titɨm owa uje ich ũru. Ich ma om uje nos oso ye olotiis erze õr ahwoso uje sehe titɨm owa. Uje ehn oso shish oshiyokõr mɨhnũwo ɨrmõni hn Jesucristo tɨrẽt tĩ̵r nãhu ĩ̵rmo hn ɨshɨ õr hnɨtewɨhɨ Porrosht ahɨr. Uje ehn yahpaa tomsaha par Porrosht aapni ich tiyokõr ma mɨhnũwo je erze oso yewo. 16Porrosht chuuna uje yok losuhlaap hn sosɨr yok par uje shuu ochɨraha uje Jesucristo pwele ewenta erze uje oshiyokõr mɨhnũwo. Shɨ iyem õr nehech terɨhɨ ɨshɨrĩt nehe uje ye olotiis ɨrpe hn ɨshɨm õr ese ɨkɨrĩt uje yelɨj nɨhna ɨre. 17Sehe tuu shish oduhu Porrosht dich hn shish tyenɨj otola ɨre. Porrosht wɨchɨ uu rey uje yelɨj nɨhna ɨre. Shish ɨka. Yelɨj onomo. Wɨchɨ shɨ sohmɨra. Nĩhyok Porrosht yet. Ahnũwo ahwoso ich om par oso ochɨraha. 18Timoteo, shɨ owa ɨtso uje pijo. Ele ahle titɨm owa uje tyenɨj ahakõr nehe. Erze uje titɨm owaka wɨr shɨ ɨtso uje Porrosht aabo otatɨm owani par uje ahakõr. Kɨmɨjɨ ahakõr uje titɨm owa ich tyenɨj tokole om erze Porrosht ɨbiyo uje ɨshɨm owa par uje ahakõr. 19Ahakõr uhu ɨlorz hn ye otiis Porrosht hn ye uhu ehet yũhurash. Ode uje ye onahmũr onuuna uje oshiyokõr mĩ̵hnɨk nehech uhurc ich otsotiis Cristo. 20Himeneo hn Alejandro oshiyokõr oshuu ɨtso õr heke tokosɨm õr Satanás par uje sepyẽr õr par uje tuu ochɨraha uje ye ompe ochiyuhu lahwoso mɨhnuwõho Porrosht.

will be added

X\