1 TESALONICENSES 5

1Pɨshɨbo watsaklo, ye nesit latɨk par uje oyitɨm olak par uje erahalo latɨk nehe hn Jesús cheeshpo. 2Ese deeych uje eyok Ɨrhĩch cheeshpo nehe ich shɨ ɨtso echɨkɨt uje taachĩ̵hɨ dɨhlak. Ye erahalo ortpe. 3Uje oso otata uje ye latɨk teye hn ich nos õr aho kɨɨspa ich tyenɨj mĩ̵hnɨk tĩ̵r õr shɨchish shɨ ɨtso uje tɨmcharrza chuuna ɨre uje ich ta par ijɨt shũrha. Ich dospa per ye pwele duhu erze ɨr dosĩ̵ryo sehepe. Erze mɨhnũwo tyenɨj tĩ̵r erze oso nehe shuu ɨtsorz. 4Pɨshɨbo watsaklo, olak ye olak ɨlo õrpe. Wɨr ye odɨraha Porroshtpe. Shɨ õr ɨtso uje odɨrkɨhɨ dɨhlak. Olak Porrosht aabo. Erahalo ɨshɨrĩt uje Cristo cheeshpo nehe, heke ye tarãha olak hnɨmichpe shuu as olak ɨbe shɨ ɨtso uje echɨkɨt taãcha. Per ye erahalo deeychtɨkɨhɨ uje Cristo taãcha. 5Nos erahalo Jesús ɨr ɨluu shɨ ɨtso uje luu chihit olak hn shɨ ɨtso uje deeych chihit olak. Ye eyok ɨlo erze uje ye odɨraha Porroshtpe. Wɨr shɨ õr ɨtso uje odɨrkɨhɨ dɨhlelta. 6Heke ye ompe yiyokõrlo yuhulo ɨtso erze uje ye odɨraha Porroshtpe. Wɨr shɨ õr ɨtso uje omo mahn eyok shɨ eyok ɨtso uje yɨrĩ̵hɨlo. Kɨmɨjɨ yiyokõrlo uje mĩ̵hnɨk ich shɨ ɨtso uje yumulo hn ɨtso uje yɨkɨch seyhi eyok. 7Erze uje ye odɨraha Porroshtpe shɨ õr ɨtso uje omo dɨhlak hn shɨ õr ɨtso uje dɨhlak hn yɨkɨch seyhi õr. 8Per eyok uje yɨraha Porrosht ich shɨ ɨtso uje deeych chihit eyok heke ye ompe uje yuhu eyok ɨtso uje yɨkɨch seyhi eyok ɨtso õr. Uje ye yotiislo Porroshtpe hn yahmũrloye hn yahmũrlo yewo ich eyok ɨtso ohyerptosht uje chɨbɨte fyerɨt derjorrza par tɨbey ɨre. Hn uje yelɨj yɨkeylo uje eyoklo owich de Porrosht ahɨr ich shɨ eyoklo ɨtso ohyerptosht uje iyãha dolt par uje tɨbey ɨre. 9Porrosht ye dɨbɨtpe par uje yɨtĩ̵rlo urhuta bahluta ehet nehe. Chɨbɨte par uje tyenɨj yaachĩ̵hɨlo ɨr ahɨr nehe shɨ pork ye yotiislo eyok Ɨrhĩch Jesucristope. 10Ɨre tooho eyokkite heke kɨmɨjɨ yɨtɨlo nehe o kɨmɨjɨ ye yɨtɨlope per je deeych yet nehe ich yebuhulo Cristo ahɨr. 11Erze uje oyitɨm olakɨke ich tyenɨj atɨmlo erze Porrosht aabo yewo toy par uje uhulo õr aho kɨɨs. Atɨmlo õr par uje ma ye olotiis Porrosht uhulo ɨtso uje yesh ahakõrlo. 12Pɨshɨbo watsaklo, oyitɨm olak par uje atɨlɨlo erze olak bahluwo uje Porrosht chɨbɨte õr par uje otɨbey olak pork olak Porrosht aabo. Wɨr uje tyenɨj otsakɨt olak. 13Ahakõrlo uje otata hn ahmũrlo õr. Erze obiyo uje wɨr oshiyokõr ich ɨhĩ̵rtso pisho. Nos uhulo olak aho kɨɨsɨhɨye. 14Pɨshɨbo watsaklo, oyitɨm olak par uje akɨtlo erze uje ye onahmũr odishew obiyope par uje odishew obiyo. Atɨmlo erze uje õr dosdarak par uje uhulo õr aho kɨɨs. Akashɨmlo erze uje hnii omasaha par Porrosht aabo par uje ma ye olotiis ɨre, hn shish enthɨlo oso. 15Abeylshɨp olak. Uje yeẽk shiyokõr mɨhnɨkĩ̵hɨ leshɨbich ich ye diyuhu labahat. Shish ahakõrlo omɨhɨye hn ahakõrlo om par nos wɨr oso toy. 16Shish uhu olak aho kɨɨs, 17hn shish olak orar apurlo Porrosht. 18Shish asɨmlo Porrosht hnechɨt par nos wɨr kuche pork Porrosht sahmũr uje ɨtsorz pork olak ye otiislo Jesucristope. 19Ye ontɨlo Porrosht Ɨchɨbich ɨr ɨbiyo uhulo ɨtso uje yeẽk sẽhi jwekɨta. 20Ye athɨlo uje ye jukur erze profeta ɨr ahwoso. 21Nos uhulo olak eyuwo tɨsĩ̵r kɨmɨjɨ ich ũru erze uje otata o kɨmɨjɨ ye ũrpe. Erze uje ich ũru wɨr par olak. 22Nos ahamlo wɨr kuche mɨhnũwo. 23Porrosht wɨchɨ uje shuu oso õr aho kɨɨs. Sehe oyuhu nos diyuhu erze mɨhnũwo uje de olak aho. Sehe oyuhu ɨre nuhrũ erze olak ɨluu mɨhnũ uje de olak aho. Sehe oyuhu Porrosht tɨbey olak ɨchɨbiyo hn olak eyuwo hn olak yũhur. Uje tɨbey olak ɨtsorz hn uje eyok Ɨrhĩch Jesucristo cheeshpo nehe ich nĩhyok uje mĩ̵hnɨk de olak. 24Porrosht wɨchɨ uje chiihla olak par uje amsahalo par ɨr aabo. Wɨchɨ shish shiyokõr uje ɨre tata heke tɨbey olak aho par uje shuu om. 25Pɨshɨbo watsaklo, sehe oyuhu olak orar apurlo Porrosht par uje takashɨm õryok. 26Nos asɨmlo Porrosht aabo yewo õr saludo hn ekulo õr ũr uhulo ɨtso uje etɨloye. 27Eyok Ɨrhĩch shuu titɨm olak par uje olak ler ana hutɨta par uje nos wɨr Porrosht aabo otẽr. 28Sehe oyuhu eyok Ɨrhĩch Jesucristo dosɨr olak.

will be added

X\