1 TESALONICENSES 4

1Pɨshɨbo watsaklo, ẽrlo õryok. Oyiyokorãha olakni erze uje tyenɨj ahakõrlo uje Porrosht sahmũr hn shish ahakõrlo uhulo ɨlorz. Ele ahle eyok Ɨrhĩch Jesús shuu oyitɨm olak par uje ma ahakõrlo uhulo ɨtsorz. 2Erahalo erze eyok Ɨrhĩch Jesús ɨr ahwoso uje ɨre shuu oyiyokorãha olakni. 3Porrosht ye nahmũrpe uje yiyokõrlo uje mĩ̵hnɨk. Ich om uje hnakɨrbich umuhu nerãhta ahɨr hn ich ompo uje tɨmcharrza umuhu dabich ahɨr per ich mĩ̵hnɨk uje ye ohnoyhi pishye ahɨrpe hn shɨ omuhuye ahɨr. Ich mĩ̵hnɨk uje otorãhaye. Ich mĩ̵hnɨk uje tɨmcher tɨmcher õhyi yẽr ahɨr. Ich mĩ̵hnɨk uje hnakɨrbo hnakɨrbo õhyiye ahɨr. Ich mĩ̵hnɨk uje yeẽk sahat loshɨpɨt. Ich mĩ̵hnɨk uje yanak shuu loshɨpɨt sahat ɨre. Ich mɨhnĩ̵k uje pɨkɨhnino hn pɨkɨhnine oshiyokorĩ̵hɨye oshuu ɨtsorz toy. 4Oyitɨm olak oyuhu ɨtsorz pork kal olak nohmɨra tyenɨj chɨraha uje ich om par teyãha nerãhta pishta hn shiyokõr shuu ɨtsorz. Ye ompe shɨ hnoy wate hn ye tatɨm iisope. Ich shiyokõr uje mĩ̵hnɨk. 5Ye ompe shɨ teychɨm tɨmcharrza hn duhu deyuwo mɨhnũwo hn hnoy wate par ɨr ɨrãhto ɨtso erze oso uje ye odɨraha Porroshtpe oshiyokõr oshuu ɨtsorz. 6Ye ompe Porrosht aabo uje yeẽk iyuwe erze Porrosht ahwoso hn shɨ sehnyẽr Porrosht aabo yewo hn torãha nerãhta o torãha dabich pork eyok Ɨrhĩch tyenɨj nos sepyẽr erze oso uje oshiyokõr oshuu ɨtsorz. Wɨr erze Porrosht ahwoso uje shish oyitɨm olakni. 7Porrosht ye diihla eyokloni par uje yiyokõrlo uje mɨhnũwo. Chiihla eyokloni par uje yiyokõrlo uje ich om. 8Heke kɨmɨjɨ yeẽk chɨhɨ uje ye nahmũr uje oyiyokorãha olak ich sɨtak õryok. Per ye dɨtak oryõkpe, wɨchɨ sɨtak Porrosht pork erze õr ahwoso uje oyiita shɨ tãra Porrosht. Wɨchɨ uje ɨshɨm eyok Dechɨbich uje yelɨj niyokõr mĩ̵hnɨk. 9Oyitɨm olak uje Porrosht aabo tyenɨj otsahmũrye, per ye nesita par uje oyitɨm ma oyuhu ɨtsorz pork oyɨraha uje Porrosht shiyokorãha olak par uje ahmũrloye. 10Ich ɨmeheeych ɨtsorz pork shish nos ahmũrlo erze Porrosht aabo yewo uje ode wahacha Macedonia. Pɨshɨbo watsaklo, oyitɨm olak par uje shish ma ahmũrlo õr. 11Shish uhulo olak aho kɨɨs, hn ahakõrlo olak ɨbiyo, hn ye alɨlo olak deshɨbo õr ɨbiyo ɨkiyo. Wɨr uje oyitɨm olakni 12par uje uhulo erze uje ye õr Porrosht aabope ochɨraha uje olak ɨluu ich om hn par uje olak pwele eylo uje olak nesita par uje ye etĩ̵rlo erze uje ye õr Porrosht aabope hn apurlo õr poso. 13Pɨshɨbo watsaklo, ich ye ompe uje ye erahalo uje Porrosht shiyokõr nehe par daabo uje otoni. Ye ompe uje eyerhlopa ahlɨlo õr hn uhu olak dosdarak ɨtso erze uje ye odɨraha Porroshtpe. Wɨr losuhlaabo pork nĩhyok õr owich wahacha Porrosht ahɨr. 14Yɨrahalo uje Jesús toni hn Porrosht shuu ɨkpo heke yɨrahalo uje Porrosht tyenɨj shuu erze uje otoni uje ye olotiis ɨrpe õya Jesús uje ɨre cheeshpo nehe. 15Erze uje oyitɨm olak wɨr uje eyok Ɨrhĩch tatni. Eyok uje yesh eyok ɨkaha nãhu ĩ̵rmo uje eyok Ɨrhĩch cheeshpo nehe ye yiyeebepe hn wɨr otsehe eyok nẽr erze Porrosht aabo uje otoni. 16Deeych yet nehe hn eyok Ɨrhĩch tokolɨhɨ wahacha poõrc par uje ihnɨmich hn tɨbich jwertpa hn ese anjele õr bahlut wɨchɨ tɨbich toy hn yeẽk sobɨta Porrosht ɨr trompeta. Wap erze topo uje ye olotiis Cristope tyenɨj õr ɨkpo. 17Porrosht tyenɨj seem eyok uje yesh eyok ɨka hn erze ɨr aabo uje õr ɨkpo hn hnoy eyoklo seya eyok Ɨrhĩch ahɨr poõrc pehet wahacha ukuhurrza eeych hn par uje shish yiyakahalo ahɨr. 18Atɨmlo õr erze ahwoso uje oyitɨm olakɨke par uje uhulo õr aho kɨɨs erze uje ohye topo.

will be added

X\