1 TESALONICENSES 3

1Shish õryok eyuwo tɨsɨrĩ̵hɨ olak nehech ye õryok ewentpe uje ye oyɨraha kɨmɨjɨ shish ye otiislo Jesuspe. Heke oyɨbɨte par uje oyiyakahachɨs ese dɨt Atenas 2hn oyuhu Timoteo hno tĩ̵r olak. Wɨchɨ eyoklo leshap pork wɨchɨ Porrosht aap hn ɨr ɨbɨk toy. Ɨre sanɨmɨrãha Porrosht ahwoso tatɨm õr uje Cristo ɨshɨ õr hnɨtewɨhɨ Porrosht ahɨrkite. Oyuhu Timoteo hno par uje sakɨt olak par uje ma ye duhu otiislo Porrosht ahwoso hn par uje duhu ahakõrlo uje Porrosht sahmũr 3par uje deeych yet nehe uje mɨhnũwo tĩ̵r olak hnii olak nohmɨra ye moymlo erze Porrosht ahwoso. Ich erahalo erze kuche mɨhnũwo tyenɨj oshiyokorĩ̵hɨ eyoklo. 4Uje ehn õryok dechɨ olak ahɨrni ich shish oyitɨm olak uje tyenɨj oshiyokõr kuche mɨhnuwõho olak hn tokole ɨtsorz. Ich erahalo uje ɨtsorz. 5Uje ehn õryok eyuwo tɨsĩ̵r uje ye oyunt latɨkɨhɨ olakpe ich oyuhu õryok ihyẽt yet hno par uje tĩ̵r olak. Sehe oyɨraha kɨmɨjɨ shish ye otiislo Porroshtpe. Oyɨraha uje Satanás sehe niyokõr kuchẽrk par uje shuu moymlo erze ahwoso uje oyitɨm olak hn shuu moymlo Jesucristo. Kɨmɨjɨ wɨchɨ derz ich tyenɨj tokole uje õryok ɨbiyo ye jukur. 6Per ele ahle hn Timoteo ich taachĩ̵hɨ lɨka õryok ahɨr. Tãra wahacha Tesalónica uje olak de. Tatɨm õryok erze ahwoso ɨhĩ̵rtso uje ye otiislo Porroshtpe. Shish ahmũrlo Porrosht. Tatɨm õryok uje shish olak eyucha õryok hn shish sehe eychɨmlo õryok. Õryok ɨtspo, sehe oyeychɨm olak. 7Pɨshɨbo watsaklo, kuche mɨhnũwo shish de ĩ̵rmo hn oso oshiyokõr mɨhnuwõho oryõk toy per uje oyunt uje Timoteo tatɨm õryok uje yesh ye otiislo Jesuspe ich shuu õryok aylpa. 8Ele ahle ich õryok aho kɨɨspa pork olak shish ye otiislo eyok Ɨrhĩchpe. 9Oyɨna Porrosht uje olak ɨtsorz pork shish uhulo õryok ayla. Porrosht umo uje ɨtsorz. 10Deeych hn dɨhlak shish õryok orar oyapur Porrosht par uje õryok pwele oyekɨrɨhɨ olakpo nehe par uje oyiyokorãha olak erze uje ye erahalo par uje ma ye otiislo Porrosht. 11Oyapur Porrosht uu eyok Deych hn oyapur uu eyok Ɨrhĩch Jesús par uje takashɨm õryok par uje õryok pwele oyuko oyɨtĩ̵r olak. 12Oyapur eyok Ɨrhĩch par uje ma duhu ahmũrloye hn ahmũrlo erze yewo toy uhu ɨlo uje oyahmũr olak 13par uje Porrosht takashɨm olak hn ye olak koswãha ɨre hn ahakõrlo uje ɨre sahmũr. Deeych yet nehe uje eyok Ɨrhĩch Jesús cheeshpo hn nos wɨr Porrosht aabo uje otoni õya ɨre. Olak dechɨ toy Porrosht ɨle ɨkɨch. Nĩhyok kuche mɨhnũwo olak aho. Shɨ olak ɨluu om eyok Deych Porrosht ɨle ɨkɨch.

will be added

X\