1 TESALONICENSES 1

1Yok Pablo. Silvano hn Timoteo ode pahɨr. Oyichew ana hutɨta par uje oyosɨm olak uje olak Porrosht aabo uje ebuhulɨchɨ dɨt Tesalónica. Porrosht wɨchɨ uu olak Deych. Hn Jesucristo wɨchɨ olak Ɨrhĩch. Sehe oyuhu Porrosht dosɨr olak hn duhu olak aho kɨɨs. 2Shish oyɨna Porrosht par nos wɨr olak. Shish õryok eyucha olak uje õryok orar oyapur Porrosht. 3Shish oyitɨm Porrosht uje ahakõrlo pork ye otiislo eyok Deych Porrosht. Õryok eyucha uje ahmũrlo yewo hn akashɨmlo õr. Õryok eyucha uje shish olak ewenta erze uje prowa olak shɨ pork erahalo uje eyok owich de Porrosht ahɨr pork eyok Ɨrhĩch Jesucristo ɨshɨ eyok hnɨtewɨhɨ Porrosht ahɨrkite. 4Pɨshɨbo watsaklo, Porrosht sahmũr olak. Oyɨraha uje ɨre chiihla olakkite 5pork uje oyanɨmɨrãha Porrosht ahwoso oyitɨm olakni ich erahalo uje ye shɨ õryok ahwospe. Porrosht ukurbo ĩya toy hn ɨr Ɨchɨbich chish obiyoho olak aho toy. Wɨchɨ shuu erahalo lahwoso uje oyitɨm olak ich ũru. Erahalo õryok uje oyebuhu olak ahɨr ich oyiyokõr uje om. 6Olak eẽtlo uje oyiyokõrni, hn eẽtlo eyok Ɨrhĩchpo. Uje entlo Porrosht ahwoso wapni ich yewo oshiyokõr mɨhnɨkĩ̵hɨ olak oshuu olak dospa per Porrosht Ɨchɨbich shuu olak aylpa. 7Uje ahakõrlo uhulo ɨtsorzni ich erze Porrosht aabo uje odebuhu wahacha hnɨmich Macedonia hn hnɨmich Acaya ochunt uje ahakõrlo hn oshiyokõr otseẽt olak. 8Erze eyok Ɨrhĩch ahwoso uje tãra olak hn oso otatɨmye ye shɨ hnɨmich Macedonia hn hnɨmich Acayape. Nos chũr lekɨtiyo. Nos oso lekɨtiyo ochɨraha olak uje ye otiislo Porroshtpe. Heke uje oyɨtĩ̵r wahachni ich ye nesit latɨk uje oyitɨm erze oso uje ode lekɨtiyo pork nos oso ochɨraha. 9Otatɨmyeehe lekɨtiyo uje oyaachĩ̵hɨchɨs olak dɨt wapni ich ahmũrlo õryok. Otatɨmye uje erze kojano po uje ehn eeychãhaloni eeylo olak porroshtɨhɨ ich moymloni par uje ahakõrlo erze ɨr ɨbiyo ese Porrosht pisht uje ich ũru hn ɨka. 10Erze oso shish otatɨmye uje olak shish anemlo Porrosht Ijɨt pisht uje tyenɨj cheeshpo nehe tãra poõrc. Wɨchɨ Jesús uje Porrosht shuu ɨkponi. Wɨchɨ Jesús uje ɨshɨ eyok hnɨtewɨhɨ Porrosht ahɨrkite par uje ye yɨtĩ̵r urhuta bahluta ehet nehe.

will be added

X\