1 PEDRO 5

1Titɨm olak uje olak iiyo otsɨɨ anciano pork abeylo Porrosht aabo. Yok anciano toy. Tokomni uje oshiyokõr mɨhnɨkɨ̃hɨ Cristo hn ochɨbɨte krus eeych par uje toohochɨs. Uje Cristo cheeshpo nehe ich ɨre rey hn yok dechɨ ɨr ahɨr. 2Abeylo Porrosht aabo shɨ uhulo ɨtso uje oso otɨbey obeje. Porrosht ɨshɨm olak erze obiyo par uje ahakõrlo. Ahakõrlo shɨ pork ahmũrlo hn ye etaklo uje ahakõrlo. Ye ahakõrlo shɨ pork ahmũrlo hnote. Enahalo olak uje ahakõrlo. 3Ye uhu olak ɨlo õr bahluwo uje shɨ ochɨpa oso per akashɨmlo õr par uje wɨr oshiyokõr oshuu ɨtso olak. 4Olak shɨ olak ɨtso erze uje otɨbey obeje hn Cristo wɨchɨ uu olak bahlut pisht. Uje cheeshpo nehe ich ɨshɨm olak ese uje ich ɨhɨ̃rtpa uje yelɨj nɨhna ɨre. 5Shɨ ɨtso uje erze anciano oshiyokõr uje Cristo tata ich olak uje olak hnakɨrbite tyenɨj ahakõrlo uje erze ɨlaro otata. Nos wɨr olak tyenɨj akashɨmloye, hn ye olak narim olak. Porrosht ye nahmũrpe erze uje onarim ɨre per takashɨm erze uje ye onarim ɨrpe. 6Olak ye olak narim olak. Porrosht wɨchɨ uje tɨbey olak. Uje terɨhɨ uhurc nehe ich Porrosht uje ukurbo deyo de tyenɨj shuu olak ma deyo. 7Erze kuche uje uhu olak eyuwo tɨsɨrɨ̃hɨ moymɨhɨlo par uje shɨ Porrosht nɨshii pork wɨchɨ tɨbey olak. 8Shish emɨtlo olak shɨ ɨtso uje ye omope pork ese olak ɨmehẽt wɨchɨ dyablo. Shiyokõr shɨ ɨtso ɨlpiyot uje dɨrkɨhɨ lekɨtiyo hn yer teyãha labɨso par uje tew. 9Ye ahakõrlo uje dyablo sahmũr. Ye otiislo Porrosht. Erahalo uje erze mɨhnũwo uje tɨ̃r olak wɨr shɨ ɨtso uje tɨ̃r olak leshɨbo uje ode ɨ̃rmo lekɨtiyo. 10Erze kuche mɨhnũwo uje tɨ̃r olak ich dospa per ye shish dakaha olak ahɨrpe. Porrosht nos nɨshii nehe hn takashɨm olak hn ɨshɨm olak ukurbo. Porrosht wɨchɨ uje shish sahmũr olak hn chiihla olakni par uje aachɨ̃hɨlo ɨr ahɨr nehe hn ebuhulo pork ye otiislo Jesucristope. 11Sehe tuu nos onahmũr uje Porrosht wɨchɨ uu õr bahlut pisht par uje wɨchɨ shish tɨbey õr. Ich ɨhɨ̃rtpa kɨmɨjɨ oniyokõr oduhu ɨlorz. 12Tichew ana hutɨta par uje Silvano hnoy ɨshɨm olak. Wɨchɨ ye lotiis Jesuspe. Asa hutɨta uje tichew titɨm olak ye ahwoso kɨhniyape par uje takɨt olak par uje erahalo uje ich ũru hn ye moymlo erze uje Porrosht shiyokõr par olak. 13Porrosht aabo uje ode dɨt Babilonia oshɨm olak saludo. Wɨr uje Porrosht chiihla õr shɨ ɨtso uje chiihla olakni. Pijɨt Marko ɨshɨm olak saludo toy. 14Etɨloye par uje nos ochɨraha uje ahmũrloye. Olak uje ye otiislo Jesucristope sehe tuu Porrosht shish duhu olak aho kɨɨs. Ich ɨhɨ̃rtpa uje ɨtsorz.

will be added

X\