1 PEDRO 3

1Titɨm olak uje olak Porrosht eebe. Tyenɨj ahakõrlo uje olak abich tatɨm olak par erze olak abiyo uje otsotiis Porrosht ahwoso ich õr pwele ochɨraha uje ich ũru shɨ pork õr ɨrẽhte oshiyokõr uje ich om hn omasaha par Porrosht aabo. Heke ye nesita uje tatɨm ɨre 2pork teychɨm nerãhta uje wate shiyokõr uje ich om hn uje tola Porrosht. 3Olak tɨmcher ye pwele uhulo olak ɨluu ɨhɨ̃rpe shɨ pork arshlo olak akɨ̃re hn aluwalo oro hn anãhalo olak ɨshuwo uje ich debichpa. 4Shɨ uje olak ɨluu ich om hn shish olak aho kɨɨs, heke Porrosht chɨbɨte uje olak ma bale. 5Antkite uu tɨmcher poru yesh uje otsahmũr Porrosht shish oshiyokõr oshuu ɨtsorz hn otola dabiyo 6shɨ ɨtso waa Sara uje shiyokõr uje Abraham tatɨm ɨre. Tɨbii dabich ɨm pɨnsɨrc. Olak shɨ olak ɨtso uje olak Sara eebe kɨmɨjɨ ahakõrlo uje ich om hn ich ye ompe uje atɨlɨlo latɨk. 7Titɨm olak toy uje olak ɨrẽhte ode. Tyenɨj akashɨmlo õr hn abeylo õr hn ahmũrlo õr pork ye õr ukurbo ɨlo olakpe. Porrosht sahmũr õr ɨtso olak. Wɨr õr ɨkɨrĩt de Porrosht ahɨr shɨ õr ɨtso olak. Kɨmɨjɨ ye ahakõrlo uhulo ɨtsorz ich ye olak eyuwo ɨlyepe heke ye Porrosht nuntpe uje olak orar. 8Nos titɨm olak uje olak Porrosht aabo. Tyenɨj nos akɨshlo olak eyuwo hn eenɨlo uje mɨ̃hnɨk tɨ̃r olak yet, hn ahmũrloye hn akashɨmloye. Ye olak narim olak. 9Ye eyuhulo olak bahat uje yeẽk shiyokõr mɨhnɨkɨ̃hɨ olak. Uje yeẽk chiyuhu lahwoso mɨhnuwõho olak ich ye eẽtlo ɨre eyuhulo olak ahwoso mɨhnuwõho ɨre. Ma om tyenɨj eyuhulo olak ahwoso uje ich omoho õr pork Porrosht chiihla eyok par uje yiyokõrlo ɨtsorz. Uje yiyokõr ɨtsorz hn ɨshɨm eyok erze uje ich om 10pork Porrosht ahwoso tata ɨm:—Uje yeẽk sehe duhu dekɨrĩt berzak hn shish ehet kɨɨs ich tyenɨj tɨbey lahwo par uje ye diyuhu lahwoso mɨhnũwo hn tyenɨj tɨbey lahwo toy par uje ye tata lekushiĩ. 11Tyenɨj iim uje shiyokõr uje mɨhnũwo par uje shiyokõr uje ich om. Tyenɨj chukwi erze uje shuu ehet kɨɨs hn ye noym 12pork eyok Ɨrhĩch tɨbey daabo uje oshiyokõr uje ich om hn chunt õr uje õr orar otsapur ɨre. Per eyok Ɨrhĩch teychɨm erze uje shish oshiyokõr uje mɨhnũwo hn chiyuhu delorɨhɨ õr.— 13¿Yeẽkpo shiyokõr mɨhnɨkɨ̃hɨ olak kɨmɨjɨ shish emɨtlo olak par uje ahakõrlo uje ich om? Nĩhyok. 14Per kɨmɨjɨ yeẽk niyokõr mɨhnɨkɨ̃hɨ olak shɨ pork olak Porrosht aabo hn ahakõrlo uje ich om ich Porrosht tyenɨj takashɨm olak. Ye atɨlɨlo õr, hn ye aslo olak ɨbe. 15Shɨ tyenɨj uhulo yakaha uje Cristo wɨchɨ uu olak Ɨrhĩch. Shish tyenɨj emɨtlo olak par uje yeẽk sehe dɨraha ɨnaapo ye otiislo uje olak owich de Porrosht ahɨr ich erahalo uje tyenɨj atɨmlo õr. 16Shɨ tyenɨj ye atsɨrãha olak ahwoso par õr hn tyenɨj atɨlɨlo Porrosht. Shish ahakõrlo uje ich om par uje shish olak eyuwo tɨsɨr uje ich om. Heke erze uje ochish majamichɨhɨ olak pork olak ɨluu ich om hn olak Porrosht aabo ich uhurc ich yeẽk shuu opook uje shɨ otata oshuu ɨtsorz. 17Kɨmɨjɨ Porrosht duhu erze kuche mɨhnũwo tɨ̃r olak pork sehe prowa olak ich ma om uje erze kuche mɨhnũwo tɨ̃r olak pork ahakõrlo uje ich om per ye ompe uje ahakõrlo uje ich mɨhnũwo heke erze kuche mɨhnũwo tɨ̃r olak. 18Cristo toni par uje ɨshɨ olak hnɨtewɨhɨ Porrosht ahɨr pork ahakõrlo uje ich mɨhnũwo. Wɨchɨ ich ye toy petɨk nehe par uje ɨshɨpo. Ye niyokõrpe erze kuche mɨhnũwo per toni par sosɨr erze oso uje oshiyokõr uje mɨhnũwo. Heke Cristo shuu olak owich de Porrosht ahɨr. Oshuu Jesús oshuu toy per shɨ ɨr yũhurrza toy mahn ɨr ɨchɨbich shish de heke ɨr ɨkɨrĩt de. 19Ɨr ɨchɨbich hno tɨ̃r wahacha uje topo õr ɨchɨbiyo de hn sakɨt õr. Wɨr shɨ õr ɨtso uje Porrosht chɨbɨte õr karsel ehet pork ye õr pwele otokolpe. 20Uje ehn Noé lɨshɨ shiyokõr asa pohorrza hn Porrosht iyem oso par uje onɨshii deyuwo per ye oniyokõrpe uje ɨre sahmũr. Heke shɨ õr arhaabokite uje ye otooho ese kresyent bahlut ehetpe pork shɨ õr osho uje ode asa pohorrza ehet. 21Ese kresyentɨt shɨ ɨtso uje otohɨrm olakni pork ye otiislo Jesuspe par uje shuu olak owich de Porrosht ahɨr. Ese otohɨrm oso ich ye ɨlo uje otɨsoho awɨtpe par uje ochũrhu õr. Otohɨrm erze oso par uje otsapur Porrosht par uje churhũ õr eyuwo mɨhnũwo pork Jesucristo ɨkponi. 22Cristo hno tɨ̃r poõrc hn sakaha Porrosht waãchta pork wɨchɨ ich dich. Erze anjele ode Cristo ɨr hme, hn erze õr bahluwo hn erze uje õr ukurbosh ode ɨr hme toy.

will be added

X\