1 PEDRO 2

1Nos moymlo erze uje ich mɨhnũwo. Nos moymlo olak ukushiĩ, hn ye uhu olak aho yũhɨrsh. Moymlo uje abɨtɨlo yewo õr kuche, hn ye eyehnɨmlo yewo. 2Uhulo olak ɨlo pɨkɨhnint uje hnii shũrha hn shish sehe duku lata ɨr ɨsho. Ich uhulo Porrosht ahwoso ɨlpo par uje shish sehe erahalo ma hn ahakõrlo ma uje Porrosht sahmũr nehech uhurc ich olak ɨluu ompa 3pork ich erahaloni uje eyok Ɨrhĩch ich ɨr ɨluu om. 4Ahakõrlo uje eyok Ɨrhĩch sahmũr shɨ ɨtso uje ethĩ̵rlo olak ɨre. Wɨchɨ yelɨj duhu ɨre kɨnaha. Shɨ ɨtso kojach per ɨre shish ɨka. Hnakɨrbo oshiyokõr pwertɨt ochĩ̵ra kojano yewo per oym ese kojach uje Porrosht chiihla. Par Porrosht ich wɨchɨ ma bale je erze kojano yewo. 5Olak ɨtspo pork olak ɨtso kojano per olak ɨka. Asɨmlo olak Porrosht par uje wɨchɨ shiyokõr lahuch chĩ̵ra olak par uje olak saserdote par eeychãhalo ɨre, pork Jesucristo wɨchɨ uje ɨshɨ olak hnɨtew heke eeychãhalo Porrosht ɨtso uje Porrosht sahmũr, 6pork Porrosht ahwoso tata shuu ɨtsorz: —Yok tɨbɨte kojach ese dɨt Sión. Ese kojach uje tiihla ich debichpa. Wɨchɨ ma bale par pwertɨt. Erze uje yelɨj olotiis ɨre wɨchɨ yelɨj duhu opook.— Cristo wɨchɨ uu kojach. 7Par olak ich bale pork ye otiislo ɨrpe, per par erze uje otsotiis ɨre ich kɨnaha pork Porrosht ahwoso tata shuu ɨtsorz: —Erze hnakɨrbo oshiyokõr pwertɨt ochĩ̵ra erze kojano per otsɨtak ese kojach yetkite per ese kojach ich ma bale par ese pwertɨt je erze yewo. Wɨchɨ kojach ɨtso Cristo.— 8Hn tata toy ɨm: —Ese kojach shɨ ɨtso uje shuu õr hnɨte hn shuu õr kay.— Porrosht chɨbɨte uje nos wɨr erze uje ye oniyokõr uje ɨr ahwoso tata ich tyenɨj shɨ ɨtso uje õr kay. 9Olak ye olak ɨlo õrpe. Porrosht chiihla olak par ɨre. Wɨchɨ rey hn shuu amsahalo par saserdote par akashɨmlo oso uhulo oteeychãha Porrosht. Olak Porrosht aabopo. Olak Porrosht ɨr yɨlo hn wɨchɨ uu olak yɨnsɨrc. Porrosht nos shiyokõr shuu ɨtsorz par olak par uje atɨmlo oso erze uje shiyokõrni uje ich ɨhĩ̵rtso. Wɨchɨ chiyuhu olakɨhɨchɨs olak ɨluu shɨ ɨtso uje olak de dɨhlelta par uje shuu olak ɨluu ich om shɨ ɨtso uje erze luu uje ich ɨhĩ̵r chihit olak. 10Tenitkite ye olak Porrosht aabope, per ele ahle ich olak Porrosht aabo. Tenit Porrosht ye nuunape uje olak losuhlaabo par uje sosɨr olak, per ele ahle ich chuuna uje olak losuhlaabo hn sosɨr olak pork ɨshɨ olak hnɨtewɨhɨ dahɨr. 11Pɨshɨbo watsaklo, ẽrlo pahwoso uje titɨm olak. Olak owich de Porrosht ahɨr heke olak dihipo kɨnãho uje yesh olak de nãhu ĩ̵rmo. Heke moymlo erze õr eyuwo mɨhnũwo uje sehe duhu ahakõrlo uje mɨhnũwo. Wɨr shɨ ɨtso uje teye hõr wɨr erze eyuwo om uje Porrosht sehe duhu ahakõrlo. 12Shish tyenɨj ahakõrlo uje ich om par uje wɨr oteychɨm olak erze uje ye odɨraha Porroshtpe. Kɨmɨjɨ otata uje ahakõrlo uje ich mɨhnũwo, per omo uje ahakõrlo uje ich om ich shɨ otata lekushiĩ, heke deeych yet nehe uje Porrosht tɨrẽt par sepyẽr õr ich õr ɨre otata uje ahakõrlo uje ich om hn õr ɨre oshuu Porrosht dich. 13Titɨm olak. Porrosht wɨchɨ olak Ɨrhĩch hn chɨbɨte uje tyenɨj ahakõrlo uje gobierno wɨmshɨro otata. Uje õr gobierno pisht tata kuchẽrk ich tyenɨj ahakõrlo. 14Wɨr õr ɨtspo erze gobernadore tyenɨj ahakõrlo uje otatɨm olak pork gobierno chɨbɨte õr par uje otsepyẽr erze uje oshiyokõr mɨhnũwo hn otatɨm erze uje oshiyokõr uje ich om par uje õr aho kɨɨs. 15Porrosht sehe duhu ahakõrlo uje ich om par uje erze uje õr totihlo hn ye odɨraha Porroshtpe ich ye õr pwele otata uje ahakõrlo mĩ̵hnɨk. 16Ye olak chɨhɨ erze ley ɨr hmepe uje Moisés chichewkite, per ye ompe ahakõrlo uje ich mɨhnũwo. Shɨ ahakõrlo uje ich om pork olak Porrosht ɨr ɨbiyo. 17Nos atɨlɨlo oso uhulo ɨtso uje wɨr õr bahluwo. Ahmũrlo Porrosht aabo yewo. Tyenɨj atɨlɨlo Porrosht hn tyenɨj atɨlɨlo ese gobierno pisht. 18Titɨm olak uje olak Porrosht aabo per olak oso õr yɨlo. Tyenɨj atɨlɨlo olak yɨnsɨro kɨmɨjɨ õr ɨre ich om hn otakashɨm olak o kɨmɨjɨ õr ɨre ich õr ɨljaabo per shish tyenɨj atɨlɨlo õr. 19Porrosht sahmũr uje yeẽk ewenta erze mɨhnũwo uje tĩ̵r ɨre shɨ pork sahmũr Porrosht per ye niyokõrpe uje mĩ̵hnɨk. 20Kɨmɨjɨ olepyẽr olak uje ahakõrlo uje ich mĩ̵hnɨk ich olak ewenta per Porrosht ye tatɨm olak uje ahakõrlo uje ich om. Per kɨmɨjɨ ahakõrlo uje ich om hn shɨ otsepyẽr olak ich olak ewenta heke Porrosht tatɨm olak uje ahakõrlo uje ich om. 21Porrosht chiihla olak par uje amsahalo par ɨr aabo, heke shish tyenɨj olak ewenta erze kuche mɨhnũwo uje tĩ̵r olak shɨ ɨtso uje Cristo ewenta erze mɨhnũwo uje tĩ̵r ɨrni par uje ɨshɨ olak hnɨtewɨhɨ Porrosht ahɨr. 22Cristo yelɨj niyokõr uje mĩ̵hnɨk hn yelɨj tata dekushiĩ par sehnyẽr oso. 23Uje ochiyuhu lahwoso mɨhnuwõho ɨrni par uje oshuu pook ich ye diyuhu lahwoso mɨhnuwõho õrpe par uje shuu opook. Uje oshuu oshuu dospa ich ye tata latɨk par uje sepyẽr õr shuu dospa. Shɨ iim erze kuche mɨhnũwo uje oshiyokorĩ̵hɨ ɨre par uje Porrosht nɨshii. Wɨchɨ jwe uje shish shiyokõr uje ich om heke teychɨm kɨmɨjɨ oniyokõr uje mĩ̵hnɨk o kɨmɨjɨ ye oniyokõrpe. 24Nos yiyokõrlo kuche mɨhnũwo heke eyok hnɨtew de Porrosht ahɨr. Cristo ɨshɨ eyok hnɨtew uje tooho krus eeych. Uje tooho krus eeych ich shuu ɨtso uje yukwĩya ɨre hn yɨtɨ par uje ye yiyokõrpe uje ich mɨhnũwo, hn shuu eyok ɨka par uje yiyokõr uje Porrosht sahmũr. Otsepyẽr Cristo hn oshuu ɨr obɨlo kɨhniya. Wɨchɨ uu bahat par uje chiyuhu erze kuche mɨhnuwõho olak. 25Antni shɨ olak ɨtso obejɨ uje saham nanɨme. Ich ye erahalo uje etĩ̵rlo per ele ahle ich eeshlopo etĩ̵rlo ese olak Yɨnsɨrc uje tɨbey olak.

will be added

X\