1 PEDRO 1

1Yok Pedro. Yok Jesucristo ɨr apóstol. Tichew ana hutɨta par olak israel oso uje olak Porrosht aabo uje olak dihipo kɨnãho pork ebuhulo erze hnɨmo uje iiyo otsɨɨ Ponto, Galacia, Capadocia, Asia, hn Bitinia. Olak owich de poõrc per yesh olak de nãhu ĩ̵rmo. 2Porrosht uu eyok Deych chiihla olakkite pork chɨraha wapni uje tyenɨj ye otiislo Jesus nehe, heke Porrosht Ɨchɨbich churhũ olak aho par uje ahakõrlo uje Jesucristo sahmũr. Uje Jesucristo tooho kruskite ɨr armɨsta noshɨ hn ɨshɨ olak hnɨtewɨhɨ Porrosht ahɨr. Sehe tuu Porrosht shish dosɨr olak hn shish duhu olak aho kɨɨs. 3Oyeeychãha Porrosht uu eyok Ɨrhĩch Jesucristo ɨr Deych pork chuuna uje eyok losuhlaabo hn sosɨr eyok hn shuu eyok shurhãpo heke shuu yɨraha uje tyenɨj eyok ɨkpo hn yɨtĩ̵r eyok owich uje de Porrosht ahɨr nehe pork Jesucristo ɨkponi. 4Kuche de wahacha poõrc uje Porrosht tɨbey par uje ɨshɨmɨhɨ olak nehe. Wɨr yelɨj nɨhna ɨre. Nĩhyok uje waresh, hn nĩhyok uje ɨr kolor noshɨ. 5Uje ye otiislo Porroshtpe ich wɨchɨ tɨbey olak chĩ̵ra dakɨrbo nehech aachĩ̵hɨlo ahɨr nehe. Olak owich dechɨ. Uje terɨhɨ ĩ̵rmo uhurc nehe ich Porrosht shuu eychɨmlo olak owɨlo uje de ɨre ahɨr. 6Uje ehn olak de nãhu ĩ̵rmo ich shish olak aylpa pork olak owɨlo de wahacha poõrc, hn uje mɨhnũwo tĩ̵r olak ich shɨ prowa olak ich kɨhniya uje kɨnãho kɨnãho, per shish tyenɨj olak aylpa. 7Wɨr shuu ɨmeheeych kɨmɨjɨ ũru uje ye otiislo Jesuspe o kɨmɨjɨ ye ũrpe shɨ ɨtso uje ochɨbɨte ese oro jwekɨta ehet par uje oshuu ɨmeheeych kɨmɨjɨ wɨchɨ oro pisht o kɨmɨjɨ ye wɨchpe. Ye otiislo Jesús ich ma bale je oro. Erze oro pwele sɨhna ɨre. Uje Jesucristo cheeshpo nehe ich tatɨm olak uje ich om uje ye otiislo ɨrpe hn shuu olak aylpa hn shuu olak deyo. 8Ye amlo Jesucristo petɨkni per shish ahmũrlo ɨre. Ele ahle ye amlo otɨk per ye otiislo ɨrpe heke olak aylpa nehech ye erahalo uje athɨlo. 9Shɨ pork ye otiislo Cristope heke olak owich de Porrosht ahɨr. 10Titɨm olak uje erze profeta poruwo wɨshɨ otatkite uje Porrosht takashɨm olak par uje shuu olak owich de dahɨr. Wɨr oshuu deyuwo tɨsĩ̵rkite. Sehe odɨraha ¿je shɨ Porrosht duhu ɨnaapo par uje shuu õr owich de dahɨr? 11Cristo Ɨchɨbich de erze profeta õr aho hn shuu otatɨm erze oso je deeych yet nehe hn oso oloter Cristo hn Cristo Ɨchɨbich shuu otatɨm õr erze kuche ɨhĩ̵rtso uje tyenɨj tokole nehe. Erze profeta sehe odɨraha yeẽkpo ese Cristo hn latɨk nehe hn taãcha. 12Porrosht shuu erze profeta ochɨraha erze uje otatɨm oso wɨr ye par õr ɨrpe. Erze ɨr ahwoso wɨr par olak. Porrosht shuu Dechɨbich ihnɨmich, hn ele ahle Porrosht Ɨchɨbich shuu oso otatɨm olak uje Jesús ɨshɨ olak hnɨtewɨhɨ Porrosht ahɨrkite hn ye otiislo õr. Erze ahwoso uje otatɨm olak Porrosht ɨr anjele sehe odɨraha toy. 13Titɨm olak. Shish uhu dish olak eyuwo par uje ahakõrlo uje Porrosht sahmũr. Shɨ anemlo erze uje ich om uje Porrosht ɨshɨmɨhɨ olak uje Jesucristo cheeshpo nehe. 14Shɨ ɨtso uje pɨkɨhnint shiyokõr uje deych hn data otatɨm ɨre ich ahakõrlo uje Porrosht sahmũr, hn ye eeshlopo ahakõrlo erze olak ɨluu mɨhnũ uje antni ahakõrlo uje ehn yahpaa erahalo Porrosht petɨkni. 15Ich nos wɨr erze uje ahakõrlo ich ye ahakõrlo uje mĩ̵hnɨk pork ese uje chiihla olak par amsahalo par olak ɨr aabo yelɨj niyokõr uje mĩ̵hnɨk. 16Porrosht ɨr ahwoso tata ɨm: —Ye ahakõrlo uje mĩ̵hnɨk pork yok yelɨj tiyokõr uje mĩ̵hnɨk.— 17Olak uje ebiilo Porrosht on: —Dii Porrosht,— titɨm olak uje wɨchɨ jwe uje teychɨm oso kɨmɨjɨ oniyokõr uje mĩ̵hnɨk o kɨmɨjɨ ye oniyokõrpe. Yelɨj duhu oso õr kɨnãho hn duhu yewo õr kɨnãho. Shish shuu nos õr ɨtsye. Heke uje ehn yesh olak de nãhu ĩ̵rmo ich olak dihip kɨnãho pork olak owich pisht de Porrosht ahɨr, heke shish ahakõrlo uje ich om hn atɨlɨlo Porrosht. 18Erahalo uje Porrosht shuu moymlo uje ahakõrlo erze olak ɨluu mɨhnũ uje tãra uu olak poruwo wɨshɨ. Õr ɨluu ye jukur. Par chiyuhu olak shuu ɨtsorz ich ɨshɨ olak hnɨtewɨhɨ dahɨrkite. Wɨchɨ bahat ye ɨlo erze orope hn plata. Wɨr shɨ taata shɨchish. 19Shɨ uje Cristo tooho krus eeychkite hn ɨr armɨsta noshɨ wɨchɨ uu bahat par ɨshɨ eyok hnɨtewɨhɨ Porrosht ahɨr. Nĩhyok yeẽk pwele chɨbɨte ɨr armɨsta bahat. Ɨre shɨ ɨtso obejɨt uje ye wopɨkpe hn ye yarĩ̵rsh uje oshuu par uje oteeychãha Porrosht. 20Uje ehn yahpaa Porrosht niyokõr ɨrmõkite ɨchii chiihla Jesús par uje ɨshɨ oso õr hnɨtewɨhɨ dahɨr nehe. Ele ahle ich yej terɨhɨ ĩ̵rmo uhurc heke Porrosht shuu ɨmeheeych uje Cristo ɨshɨ olak hnɨtew par uje sosɨr olak. 21Shɨ uje ye otiislo Cristo heke ye otiislo Porroshtpe. Wɨchɨ shuu Cristo ɨkponi hn chɨbɨte ma dich. Heke ye otiislo Porrosht hn shɨ anemlo uje ɨshɨmɨhɨ olak owich uje de ɨre ahɨr. 22Porrosht ahwoso ich ũru. Uje ahakõrlo uje tata ich erhũlo olak aho par uje ahmũrlo olak leshɨbo hn par uje ye uhulo olak aho yũhɨrsh. Tyenɨj enahalo olak par uje ahmũrlo pishye 23pork olak ich olak shurhãpo. Ye olak lata hn olak deychpe uje oshuu olak shurhãpo. Wɨr terɨhɨ õr ɨshĩ̵ryo ich otoy. Porrosht ahwoso shuu olak shurhãpo. Wɨr yelɨj nɨhna ɨre. Shish yakaha. 24Ɨr ahwoso tata shuu ɨtsorz: —Nos wɨr oso shɨ õr ɨtso ɨhnemyo. Nos wɨr kuche uje oso otsahmũr wɨr shɨ ɨtso ɨhnemyo uje pohna. Shɨ pohna hn kako hn kay, 25per eyok Ɨrhĩch ɨr ahwoso shish yakaha. Yelɨj nɨhna ɨre.— Erze Porrosht ahwoso wɨr uje otatɨm olakni shuu amsahalo par olak ɨr aabo.

will be added

X\