1 JUAN 5

1Nos wɨr erze uje ye olotiis Jesús uje wɨchɨ uu Cristo uje ɨshɨ õr hnɨtewɨhɨ Porrosht ahɨrkite ich wɨr Porrosht aabo. Uje yeẽk chɨhɨ uje sahmũr deych ich sahmũr daabo toy, 2heke ich ɨmeheeych uje yahmũrlo Porrosht ɨr aabo pork yahmũrlo Porrosht hn yiyokõrlo uje ɨr ahwoso tata. 3Ich ɨmeheeych uje yahmũrlo Porrosht pork yiyokõrlo uje ɨr ahwoso tata. Ɨr ahwoso ich ye ɨhnepe par uje oshiyokõr. 4Heke nos wɨr Porrosht aabo otserz erze kuche mɨhnũwo uje de nãhu ɨ̃rmo pork ye oniyokõrpe. Shɨ pork ye yotiislo Jesuspe heke yerzlo erze kuche mɨhnũwo uje de nãhu ɨ̃rmo. 5¿Yeẽkpo uje serz erze kuche mɨhnũwo uje de nãhu ɨ̃rmo? Shɨ ese uje ye lotiis uje Jesús wɨchɨ Porrosht Ijɨt. 6Ɨmeheeych uje Jesucristo wɨchɨ Porrosht ijɨt uje Juan tohɨrm ɨre, hn ɨmeheeych toy uje tooho krus eeych. Ye shɨ ɨmeheeychpe uje Juan tohɨrm ɨre. Ɨmeheeych toy uje tooho krus eeych hn ɨr armɨsta noshɨ. Porrosht Ɨchɨbich shuu Ɨmeheeych toy uje wɨchɨ uu Porrosht ijɨt uje ɨshɨ eyok hnɨtewɨhɨ Porrosht ahɨrkite pork Porrosht Ɨchɨbich shish tata uje ich ũru. 7Heke erze uje shuu ɨmeheeych uje Jesús wɨchɨ uu Porrosht ijɨt pisht wɨr tre. 8Erze tre wɨchɨ Porrosht Ɨchɨbich hn wɨchɨ yet uje Juan tohɨrm ɨre hn wɨchɨ yet toy uje tooho krus eeych hn ɨr armɨsta noshɨ. Erze tre shuu ɨmeheeych uje Jesús wɨchɨ uu Porrosht ijɨt pisht. 9Eyok yɨbɨte uje ich ũru erze ahwoso uje hnakɨrbo otata per ich ma ũru erze ahwoso uje Porrosht tata. Erze ahwoso uje Porrosht tata wɨr erze tre uje shuu ɨmeheeych uje ɨr ijɨt wɨchɨ Jesucristo. 10Yeẽk uje ye lotiis Porrosht ɨr Ijɨt ich Porrosht Ɨchɨbich de wɨchɨ ehet hn shuu ɨmeheeych uje Jesús wɨchɨ Porrosht ɨr Ijɨt. Ese uje sotiis uje Porrosht tata wɨchɨ shɨ chɨbɨte uje Porrosht kushĩyak pork sotiis erze ahwoso uje Porrosht tata uje Jesús wɨchɨ ɨr Ijɨt. 11Erze uje Porrosht tata wɨr par ɨshɨm eyok ese ɨkɨrĩt uje yelɨj nɨhna ɨre shɨ uje ye yotiis uu ɨr Ijɨt. 12Yeẽk uje ye lotiis Porrosht ɨr Ijɨt ich ese ɨkɨrĩt de ɨre uje yelɨj nɨhna ɨre, per ese uje sotiis Porrosht ɨr Ijɨt ich ye ese ɨkɨrĩt chɨhɨ ɨrpe uje yelɨj nɨhna ɨre. 13Tichew ana hutɨta tokosɨm olak uje ye otiislo Porrosht Ijɨtpe par uje erahalo uje ich ũru uje ese ɨkɨrĩt de olak uje yelɨj nɨhna ɨre. 14Yɨrahalo uje ich ũru uje eyoklo orar yapurlo Porrosht kuchɨt uje ich om ich chunt eyoklo, 15hn uje yɨrahalo uje chunt eyoklo uje yapurlo ɨre kuche ich yɨrahalo toy uje ɨshɨm eyoklo uje yapurlo. 16Uje eyok yeẽk nomo deshɨbich uje shiyokõr uje mɨ̃hnɨk uje ye duhu wɨchɨ tope nehe ich tyenɨj sapur Porrosht par uje perdonar wɨchɨ par uje ye wɨchɨ toy. Porrosht shɨ perdonar wɨchɨ kɨmɨjɨ ye niyokõrpe ese kuchɨt mɨ̃hnt uje shuu otoy. Kuchɨt mɨ̃hnt de uje shuu otoy. Ye titɨm olakpe par uje olak yeẽk orar lapur Porrosht par ese. 17Nos wɨr kuche uje ye Porrosht nahmũrpe wɨr mɨhnũwo. Kuche mɨhnũwo de uje Porrosht ye nahmũrpe uje ye duhu otope pork Porrosht pwele perdonar. 18Yɨraha uje ese uje Porrosht shuu shũrhapo par ɨr aap ich ye duhu erze kuche mɨhnũwo yakaha ɨrpe. Porrosht Ijɨt wɨchɨ uje tɨbey ɨre, hn ye Satanás pwelpe par uje shiyokõr mɨhnɨkɨ̃hɨ ɨre. 19Yɨrahalo uje eyoklo de Porrosht hme, hn erze oso uje ode nãhu ɨ̃rmo ode Satanás hme, 20hn yɨrahalo toy uje Porrosht ɨr Ijɨt tɨrẽtkite par uje shuu yɨrahalo Porrosht pisht. Eyoklo aho kɨɨsɨhɨ Porrosht pisht, hn eyoklo aho kɨɨsɨhɨ ɨr Ijɨt Jesucristo. Jesucristo wɨchɨ Porrosht pisht. Wɨchɨ uje ɨshɨm eyok ese ɨkɨrĩt uje yelɨj nɨhna ɨre. 21Pɨshɨbo watsaklo, shɨ olak ɨtso pijo. Abeylshɨp olak par uje ye eeychãhalo porrosht kɨnãho.

will be added

X\