1 JUAN 4

1Pɨshɨbo watsaklo, tyenɨj uhulo olak eyuwo tɨsɨ̃r kɨmɨjɨ ich ũru o kɨmɨjɨ ye ũrpe nos wɨr erze õr ahwoso uje otata uje Porrosht shuu oshiyokorãha olak kuche. Tyenɨj eychɨmlo õr wap kɨmɨjɨ Porrosht Ɨchɨbich chɨhɨ õr aho o kɨmɨjɨ ɨchɨbich kɨnaha, pork ich okɨhniya ode nãhu ɨ̃rmo uje otata uje otsanɨmɨrãha Porrosht ahwoso per ye ũrpe uje õr ɨre otata. 2Par uje erahalo kɨmɨjɨ Porrosht Ɨchɨbich chɨhɨ ɨre ehet uje sanɨmɨrãha Porrosht ahwoso ich wɨchɨ tyenɨj tata uje Jesús wɨchɨ Cristo uje tãra Porrosht hn ɨshɨ oso õr hnɨtewɨhɨ Porrosht ahɨr hn tyenɨj tata toy uje Jesús wɨchɨ hnakɨrbich pisht. Uje tata ɨtsorz ich Porrosht Ɨchɨbich de ɨre ehet. 3Uje ye yeẽk tata Jesús shuu ɨtsorz ich ye Porrosht Ɨchɨbich chɨhɨ ɨre ehetpe. Shɨ ɨchɨbich kɨnẽhet de ehet. Wɨchɨ Cristo ɨr ɨmãha. Olak ich entloni uje ese ɨchɨbich kɨnehe de nehe. Ele ahle ich de nãhu ɨ̃rmo. 4Pɨshɨbo watsaklo, shɨ olak ɨtso pijo. Olak Porrosht aabo hn erzloni erze uje otsehnyẽr oso pork ese Porrosht Ɨchɨbich uje de olak aho wɨchɨ ma ukurbo deyo de je ese Satanás uje de nãhu ɨ̃rmo uje shuu oso oshiyokõr uje mɨhnũwo. 5Õr owich shɨ de nãhu ɨ̃rmo heke uje otata lahwoso ich shɨ otata kuche uje de nãhu ɨ̃rmo hn erze uje ye õr Porrosht aabope otsahmũr õr ahwoso. 6Eyoklo ye eyok ɨlo õrpe pork eyoklo Porrosht aabo. Erze uje otsahmũr Porrosht ich otsahmũr eyok ahwoso per erze uje ye õr Porrosht aabope ye onahmũr eyok ahwospe. Heke yɨrahalo yeniipo Porrosht Ɨchɨbich de õr aho. Porrosht Ɨchɨbich shish tata uje ich ũru, hn yeniipo uje ɨchɨbich kɨnẽhet de õr aho. Wɨr shɨ otata dekushiĩ. 7Pɨshɨbo watsaklo, eyoklo tyenɨj yahmũrloye pork Porrosht wɨchɨ uje chɨbɨte eyok aho par uje yahmũrloye. Heke nos wɨr erze uje otsahmũrye ich ɨmeheeych uje Porrosht shuu oshũrhaponi par omasaha par ɨr aabo hn wɨr uje ochɨraha Porrosht. 8Ese uje ye nahmũr leshɨbope wɨchɨ ye dɨraha Porroshtpe pork Porrosht nos sahmũr oso. 9Porrosht shuu ɨmeheeych uje sahmũr eyoklo pork shuu deyjɨt nohmɨramɨt tɨrẽt tɨ̃r nãhu ɨrmõkite par ɨshɨ eyok hnɨtew par uje eyok ɨkɨrĩt de uje yelɨj nɨhna ɨre pork ye yotiis Porrosht ijɨtpe. 10¿Ɨlo latɨkpo uje Porrosht sahmũr eyok? Wɨchɨ ye ɨlo uje yahmũrlo ɨrpe. Porrosht sahmũr pishɨ eyoklo heke shuu deyjɨt tɨrẽtni tɨ̃r nãhu ɨ̃rmo par uje ɨshɨ eyok hnɨtewɨhɨ Porrosht ahɨr. 11Pɨshɨbo watsaklo, Porrosht sahmũr pishɨ eyoklo shuu ɨtsorz heke tyenɨj yahmũrloye. 12Nĩhyok yeẽk uje umo Porrosht per kɨmɨjɨ shish yahmũrloye ich Porrosht debuhu eyoklo aho hn shuu yahmũrlo pishye. 13Yɨrahalo uje eyoklo aho kɨɨsɨhɨ Porrosht hn ɨr ɨtspo ehet kɨɨsɨhɨ eyoklo pork ɨshɨm eyok Dechɨbich. 14Õryok oyeychɨm Jesusni hn oyitɨm olak uje Porrosht shuu Deyjɨt tɨrẽtni par uje ɨshɨ oso õr hnɨtewɨhɨ Porrosht ahɨr. 15Uje yeẽk tata uje Jesús wɨchɨ uu Porrosht Ijɨt pisht uje ɨshɨ oso õr hnɨtewɨhɨ Porrosht ahɨr ich Porrosht de ɨre hn ɨre ɨtspo de Porrosht. 16Heke yɨraha hn ye yotiispe uje Porrosht sahmũr eyok. Porrosht shish sahmũr oso. Uje yeẽk shish sahmũr leshɨbo wɨchɨ de Porrosht hn Porrosht ɨtspo de ɨre. 17Uje ehn eyok de nãhu ɨ̃rmo kɨmɨjɨ yahmũrlo pishɨ Porrosht ich shɨ eyok ɨluu ɨtso Jesucristo ɨr ɨluu, heke ye yɨtɨlɨlo uje yɨtɨ̃rlo ɨre ɨkɨch nehe uje sepyẽr erze uje oshiyokõr uje mɨhnũwo. 18Kɨmɨjɨ ahmũrlo pishɨ ɨre ich ye atɨlɨlope uje etɨ̃rlo ɨr ɨkɨch. Shɨ oso otola ɨre pork ochɨraha uje tyenɨj sepyẽr õr nehe. Ese uje tola tɨ̃r Porrosht ɨkɨch nehe wɨchɨ yẽrɨj nahmũr pishɨ Porrosht. 19Nos yahmũrlo Porrosht pork ɨr wapkite uje sahmũr eyok. 20Kɨmɨjɨ yeẽk tata ɨm: —Yok tahmũr Porrosht— per sɨtak leshɨbich, wɨchɨ shɨ kushĩyak. Kɨmɨjɨ ye wɨchɨ nahmũr leshɨbich uje teychɨm ich ye pwele nahmũr Porroshtpe pork yelɨj teychɨm. 21Jesucristo tatɨm õryok uje yeẽk sahmũr Porrosht ich tyenɨj sahmũr leshɨbo toy.

will be added

X\