1 JUAN 3

1Hmeychɨmlo, ich Porrosht uu eyok Deych sahmũr pishɨ eyoklo heke tata uje eyok ɨr aabo. Ich ũru uje eyok ɨr aabo. Erze uje ye õr Porrosht aabope ye odɨraha uje eyok Porrosht aabo pork wɨr ye odɨraha Porroshtpe. 2Pɨshɨbo watsaklo, ele ahle ich eyoklo Porrosht ɨr aabo. Deeych yet nehe hn Porrosht shuu eyok yũhurrza kɨnaha per yahpaa yɨrahalo keshɨ eyok yũhurrza ɨlo latɨkpo nehe. Shɨ shuu yɨrahalo uje Jesucristo cheeshpo nehe ich eyoklo yũhurrza ahle ɨtso ɨre pork yomlo pishɨ Jesús ɨr yũhurrza. 3Nos wɨr erze uje oyeem uje Porrosht shuu õr yũhurrza ɨtso Cristo nehe wɨr oshuu deluu om pork Cristo ɨr ɨluuta ich om. 4Nos wɨr erze uje oshiyokõr kuche mɨhnũwo uje Porrosht ye nahmũrpe wɨr ich oyuwe Porrosht ɨr ley pork uje yeẽk iyuwe Porrosht ɨr ley ich shiyokõr wɨr kuche mɨhnũwo uje ye Porrosht nahmũrpe. 5Erahalo uje Jesucristo tɨrẽt tɨ̃r nãhu ɨrmõkite par uje ɨshɨ eyok hnɨtewɨhɨ Porrosht ahɨr pork yiyokõr erze kuche mɨhnũwo uje ye Porrosht nahmũrpe per Jesús yelɨj niyokõr kuche mɨhnũwo uje Porrosht ye nahmũrpe. 6Nos wɨr erze uje ode Cristo ye oduhu kuch mɨhnũwo yakaha ɨrpe. Nos wɨr uje shish oshiyokõr uje mɨhnũwo wɨr ye odɨraha Cristope hn ye odɨraha ɨr ɨluupe. 7Pɨshɨbo watsaklo, shɨ olak ɨtso pijo. Ye uhu onehnyẽr olak. Yeẽk uje shish shiyokõr uje om wɨchɨ ɨr ɨluu om. Heke ɨr ɨluu shɨ ɨtso Cristo ɨr ɨluu uje ich om. 8Per ese uje shish shiyokõr uje ich mɨhnũwo wɨchɨ dyablo aap. Uje ehn yahpaa Porrosht niyokõr nãhu ɨrmõkite ɨchii dyablo shish shiyokõr uje mɨhnũwo. Heke Porrosht ɨr Ijɨt tɨrẽt tɨ̃r nãhu ɨrmõkite par uje sɨhna erze dyablo ɨr ɨbiyo. 9Nos wɨr uje Porrosht shuu oshũrhapo wɨr Porrosht aabo. Heke yelɨj oduhu erze kuche mɨhnũwo yakaha ɨre pork ye õr pwele oduhu erze mɨhnũwo yakaha ɨrpe pork Porrosht shuu oshũrhapo par uje omasaha par ɨr aabo. 10Heke ich ɨmeheeych uje yeniipo Porrosht aabo hn yeniipo uje dyablo aabo. Yeẽk uje ye shish niyokõr uje om wɨchɨ ye Porrosht aappe. Ɨtso ese uje ye nahmũr leshɨbope wɨchɨ ye Porrosht aappe. 11Heke ich ɨmeheeych ɨtsorz pork wapni ɨchii otsanɨmɨrãha otatɨm olak uje tyenɨj nos ahmũrlo olak leshɨbo, 12hn ye uhu olak ɨlo Caín. Wɨchɨ dyablo aap pork shuu leshɨbich lɨshɨ shuu toy. ¿Ɨnaapo heke Caín shuu leshɨbich shuu toy? Shɨ pork ɨr leshɨbich ɨbiyo ɨhɨ̃rtso hn ɨr ɨbiyo mɨhnũwo. 13Pɨshɨbo watsaklo, ye as olak ɨbe uje erze uje ye odɨraha Porroshtpe otsɨtak olak. 14Yɨrahalo uje eyoklo shɨ ɨtso uje yitokolɨhɨlo ese dehet uje tɨ̃r urhuta bahluta ehet hn yomsahalo ese dehet uje tɨ̃r Porrosht ahɨr. Ese dehet wɨchɨ par erze uje õr ɨkɨrĩt de uje yelɨj nɨhna ɨre. Yɨrahalo uje yɨrkɨhɨlo ese dehet pork yahmũrlo eyok leshɨbo. Ese uje ye nahmũr leshɨbope wɨchɨ shish dechɨ ese uje ɨtso dehet uje tɨ̃r urhuta bahluta ehet. 15Nos wɨr erze uje shish otsɨtakpa leshɨbo par Porrosht ich õr ɨtso uje oshuu leshɨbo oshuu otoy. Erahalo erze uje oshuu oso oshuu otoy wɨr ye õr ɨkɨrĩt chɨhɨpe uje yelɨj nɨhna ɨre. 16Ich ɨmeheeych uje Jesucristo sahmũr pishɨ eyok pork ɨshɨm ɨre erze oso par uje oshuu oshuu toy par uje ɨshɨ eyok hnɨtewɨhɨ Porrosht ahɨr. Heke tyenɨj yahmũrlo pish eyok leshɨbo yuhulo ɨtso uje Jesucristo sahmũr eyok. 17Kɨmɨjɨ eyok yeẽk chɨhɨ uje ɨr kushjãro kɨhniya de hn teychɨm deshɨbich uje nesita kuchɨt hn ye nuunape uje wɨchɨ losuhlaap hn ye dosɨmpe uje wɨchɨ nesita ich ye nahmũr deshɨbichpe. Porrosht chɨbɨte par uje yahmũrloye per wɨchɨ ye nahmũr leshɨbichpe pork ye dosɨr ɨrpe. 18Pɨshɨbo watsaklo, shɨ olak ɨtso pijo. Ye ompe uje shɨ olak ahwoso uje ahmũrloye. Tyenɨj uhulo ũru hn ɨmeheeych uje ahmũrloye uje akashɨmloye. 19Heke yɨrahalo uje ich ũru uje eyoklo Porrosht aabo hn ye yɨpooklope uje yɨtɨ̃r ɨre nehe. 20Uje yuuna uje yiyokõr uje mɨ̃hnɨk hn ese mɨ̃hnɨk sehe duhu eyok koswãha Porrosht ich Porrosht ma dich pork chɨraha hn pwele nɨshii erze uje sehe duhu eyok koswãha ɨre. 21Pɨshɨbo watsaklo, uje ye yiyokõrlo uje mɨ̃hnɨk heke ich ye yuuna latɨk hn eyok aho kɨɨs uje eyok orar yapur Porrosht. 22Hn uje yapurlo ɨre kuche ich ɨshɨm eyok pork yiyokõrlo uje ɨr ahwoso tata hn yiyokõrlo uje ɨre sahmũr. 23Erze uje Porrosht sehe duhu yiyokõrlo wɨchɨ uje ye yotiislo ɨr Ijɨt Jesucristo hn yahmũrloye. Wɨr uje sehe duhu yiyokõrlo. 24Nos wɨr uje oshiyokõr uje ɨr ahwoso tata wɨr ode ɨre hn ɨre ɨtspo de õr toy. Yɨrahalo uje ɨre de eyok pork ɨr Ɨchɨbich de eyok aho.

will be added

X\