1 JUAN 2

1Pɨshɨbo watsaklo, tahmũr olak heke shɨ olak ɨtso pijo. Tichew ana hutɨta tokosɨm olak par uje ye ahakõrlo uje mĩ̵hnɨk uje ye Porrosht nahmũrpe. Per kɨmɨjɨ eyok yeẽk niyokõr uje mĩ̵hnɨk ich Jesucristo de par sosɨr ɨre. Sapur ɨr Deych par ese uje shiyokõr mĩ̵hnɨk. Wɨchɨ shish shiyokõr uje ich om. 2Wɨchɨ uje ɨshɨ eyok hnɨtewɨhɨ Porrosht ahɨr. Ye doshɨpe shɨ par eyok, ɨshɨ par nos wɨr oso toy uje ode nãhu ĩ̵rmo. 3Kɨmɨjɨ yiyokõrlo uje ɨre ahwoso tata ich yɨrahalo uje ich ũru uje eyok ɨr aabo. 4Per kɨmɨjɨ yeẽk tata uje ɨre Porrosht aap hn ye niyokõrpe uje Porrosht ahwoso tata ich wɨchɨ shɨ kushĩyak. Porrosht ahwoso ich ũru, per wɨchɨ ye nahmũrpe. 5Uje yeẽk niyokõr uje Porrosht ahwoso tata ich ɨmeheeych uje ich ũru uje wɨchɨ sahmũr Porrosht, heke yɨraha uje eyok aho kɨɨsɨhɨ Porrosht yuhu ɨtsorz. 6Kɨmɨjɨ yeẽk tata uje ɨre de Porrosht ich tyenɨj shiyokõr shuu deluuta ɨtso Jesucristo ɨr ɨluuta. 7Pɨshɨbo watsaklo, ahnũwo pahwoso uje titɨm olak par uje ahmũrloye wɨr ye ahwoso ahlope. Nãhu uje tenitkite ɨchii entlo. 8Erze uje tichew tɨbɨte ana hutɨta tokosɨm olak nãhu ahwoso ich ma ɨmeheeych heke ɨtso uje ahlopo. Ahnũwo ich ũru pork Cristo shiyokorãha oso tatɨm õr uje ich ahlo shuu ɨtsorz. Hn ich ũru par olak pork ahmũrloye pork amsahalo par olak Porrosht aabo. Nãhu ahwoso ich shɨ ɨtso ahlo par olak pork ɨchii atokolɨhɨlo dɨhlelta ehet hn luu chihit olak hn shuu erahalo uje ich ũru. 9Kɨmɨjɨ yeẽk tata uje ɨre Porrosht aap hn tata uje luu chihit ɨre per sɨtak leshɨbo ich ye luu chihit ɨrpe. Wɨchɨ yesh de dɨhlelta ehet. 10Per ese uje sahmũr leshɨbo shish luu chihit ɨre hn nĩhyok kuche uje de wɨchɨ ehet par uje shuu shiyokõr uje mĩ̵hnɨk. 11Per ese uje sɨtak leshɨbo shɨ ɨtso uje shish dechɨ dɨhlelta hn dɨrkɨhɨ ehet. Ye dɨraha uje tĩ̵r, pork asa dɨhlelta shuu ɨtso uje wɨchɨ olɨbɨk. 12Pɨshɨbo watsaklo, tichew ana hutɨta tokosɨm olak. Shɨ olak ɨtso pijo pork Jesucristo ɨshɨ eyok hnɨtewkite heke Porrosht perdonar olak erze kuche mɨhnũwo uje ahakõrlo uje ɨre ye nahmũrpe. 13Tichew ana hutɨta tokosɨm olak uje olak ɨlaro pork erahalo Cristo uje dekite ehn yahpaa ĩ̵rmo chɨhɨpe. Tichew ana hutɨta par tokosɨm olak uje yahpaa olak ɨlarope pork erzlo Satanasni hn atokolɨhɨlo ɨr hme. Pɨshɨbo watsaklo, tichew ana hutɨta tokosɨm olak pork olak shɨ olak ɨtso pijo. Erahalo Porrosht uu eyok Deych. 14Tichew ana hutɨta tokosɨm olak uje olak ɨlaro pork erahalo Cristo uje dekite ehn yahpaa ĩ̵rmo chɨhɨpe. Tichew ana hutɨta tokosɨm olak uje yahpaa olak ɨlarope pork olak ukurbo de hn olak eyuwo chishew Porrosht ahwoso. Erzlo ese Satanasni hn atokolɨhɨlo ɨr hme. 15Tyenɨj ye ahmũrlo erze mɨhnũwo uje de nãhu ĩ̵rmo hn ye ahmũrlo erze kuche uje de nãhu ĩ̵rmo. Yeẽk uje sahmũr erze ich ye nahmũr Porrosht uu eyok Deychpe 16pork erze uje otsahmũr nãhu ĩ̵rmo wɨr õr ɨluu ɨtsorz. Otsahmũr oshiyokõr erze mɨhnũwo uje oshuu deyuwo chishew hn oteychɨm erze kuche mɨhnũwo uje de nãhu ĩ̵rmo, hn sehe oniyokõr hn onarim ɨre. Erze õr ɨluu ye tãra Porroshtpe. Shɨ de nãhu ĩ̵rmo 17per ahnũwo ĩ̵rmo tyenɨj Porrosht sɨhna nehe. Nos wɨr kuche mɨhnũwo uje oso otsahmũr oshiyokorĩ̵hɨ nãhu ĩ̵rmo nos sɨhna. Shɨ erze uje shish oshiyokõr uje Porrosht sahmũr wɨr uje shish õr ɨka. 18Pɨshɨbo watsaklo, tahmũr olak heke shɨ olak ɨtso pijo. Entloni uje tyenɨj yeẽk taãcha nehe uje wɨchɨ Cristo ɨmãha uje iich otsɨɨ anticristo. Ele ahle ich oso ode ich okɨhniya uje wɨr Cristo ɨr ɨmãho, heke yɨrahalo uje ich yej terɨhɨ ĩ̵rmo uhurc. 19Wap oshuu ɨre ɨtso uje õr Porrosht aabo per oym eyok pork nos wɨr õr ɨre ye õr Porrosht aabope. Kɨmɨjɨ wɨr Porrosht aabo ich shish õya eyoklo per uje oym eyok ich shuu ɨmeheeych uje wɨr ye Porrosht aabope. 20Olak ye olak ɨlo õrpe pork Porrosht shuu Dechɨbich masaha olak aho heke nos erahalo uje ich ũru. 21Shɨ tichew hn tokosɨm olak ana hutɨta pork erahalo uje ich ũru, hn erahalo uje erze uje ich ũru yelɨj kushĩyak. 22Yeẽk uje tata uje Jesús ye Cristope wɨchɨ kushĩyak. Wɨchɨ Cristo ɨmãha. Sata Porrosht uu eyok Deych hn sata ɨr ijɨt Jesucristo. 23Nos wɨr erze uje otsata Jesucristo wɨr ye õr aho kɨɨsɨhɨ Porroshtpe uu eyok Deych. Per kɨmɨjɨ yeẽk tata uje Jesús wɨchɨ Cristo uje ɨshɨ ɨr hnɨtewɨhɨ Porrosht ahɨr wɨchɨ ɨr ehet kɨɨsɨhɨ Cristo hn ehet kɨɨsɨhɨ eyok Deych Porrosht toy. 24Ye moymlo erze ahwoso uje oshiyokorãha olak wapni. Kɨmɨjɨ ye moymlo erze uje entloni uhulo ɨtsorz ich shish olak de Jesús hn shish olak de eyok Deych Porrosht. 25Heke Jesús chɨbɨte lahwosni par uje ɨshɨm eyok ɨkɨrĩt uje yelɨj nɨhna ɨre. 26Tichew tɨbɨte ana hutɨta par tuu erahalo uje ode uje sehe onehnyẽr olak 27per Porrosht ɨshɨm olak Dechɨbich par uje debuhu olak aho hn shuu erahalo uje ich ũru, heke ye nesita uje yeẽk shiyokorãha olak. Shɨ Porrosht Ɨchɨbich nos shiyokorãha olak kuche uje ich ũru, ye kushĩyakpe. Uhu olak aho kɨɨsɨhɨ Cristo shɨ ɨtso uje Porrosht Ɨchɨbich shiyokorãha olak. 28Olak shɨ olak ɨtso pijo. Shish uhu olak aho kɨɨsɨhɨ Cristo, heke uje taãcha nehe ich eyok aho kɨɨsɨhɨ ɨre ɨle ɨkɨch hn ye yɨpooklope par uje sehe yakɨs eyok. 29Erahalo uje Jesucristo ɨr ɨluu shish om, heke erahalo uje ich ũru uje nos wɨr uje õr ɨluu om wɨr Porrosht aabo.

will be added

X\