1 JUAN 1

1Tichew ana hutɨta par tokosɨm olak titɨm olak Jesucristo. Uje ehn yahpaa ĩ̵rmo chɨhɨkite ɨchii ɨre shish de. Uje ehn de nãhu ĩ̵rmo ich oyunt uje ɨre tata, hn oyumo pishɨ ɨre, hn oyakɨhɨr ɨr toy. Wɨchɨ uje tata lahwoso uje ich ũru hn pwele ɨshɨm oso õr ɨkɨrĩt uje yelɨj nɨhna ɨre. 2Ɨre de nãhu ɨrmõkite hn õryok oyumo heke oyɨraha hn oyitɨm olak uje Jesús wɨchɨ uje yelɨj nɨhna ɨre. Ɨre shish de Porrosht ahɨrkite per shuu tɨrẽt heke oyumo ɨre, 3hn oyanɨmɨrãha oyitɨm olak uje oyumo Jesucristoni hn oyunt uje tata par uje olak aho kɨɨsɨhɨ õryok, hn õryok aho kɨɨsɨhɨ eyok Deych Porrosht hn ɨr Ijɨt Jesucristo, heke olak aho kɨɨsɨhɨ õr toy. 4Oyichew ana hutɨta oyosɨm olak par uje uhu olak aho ma kɨɨs ɨtso õryok. 5Titɨm olak erze ahwoso uje Jesucristo tatɨm oryõkni. Tatɨm õryok uje Porrosht hũre shɨ ɨtso luu. Nĩhyok dɨhlele de ɨre ahɨr hni pɨkaap. 6Uje yiita uje eyok owich omɨhɨ Porrosht per shish yiyokõrlo uje mĩ̵hnɨk shɨ ɨtso uje yɨrkɨhɨ dɨhlelta ehet ich shɨ yiita eyok ukushiĩ. 7Per uje yiyokõrlo uje Porrosht sahmũr ich shɨ ɨtso uje luu chihit eyok pork shuu yɨraha uje ich ũru. Porrosht hũre shɨ ɨtso uje luu chihit, heke uje yiyokõr uje Porrosht sahmũr ich eyok aho kɨɨsɨhɨ ɨre hn eyok aho kɨɨsɨhɨ eyok leshɨbo pork uje ɨr ijɨt Jesús tokite ich ɨr armɨsta noshɨ hn nos ɨshɨ eyok hnɨtewɨhɨ Porrosht ahɨr hn nos perdonar erze mɨhnũwo uje yiyokõrlo. 8Kɨmɨjɨ yiitɨlo uje yelɨj yiyokõrlo uje mĩ̵hnɨk uje Porrosht ye nahmũrpe ich shɨ yehnyẽrlo eyok hn ye yiitɨlope uje ich ũru. 9Per uje yitɨmlo Porrosht uje yiyokõrlo uje mĩ̵hnɨk ich ɨre perdonar eyok erze kuche mɨhnũwo uje yiyokõrlo uje ɨre ye nahmũrpe. Yɨrahalo uje Porrosht yelɨj seyhi lahwoso. Wɨchɨ jwe uje shish shiyokõr uje ich om heke nos churhũ erze kuche mɨhnũwo uje de eyok aho. 10Kɨmɨjɨ yiitɨlo uje yelɨj yiyokõrlo uje mĩ̵hnɨk uje Porrosht ye nahmũrpe, ich yuhulo Porrosht kushĩyak. Ye yahmũr uje ɨr ahwoso tata.

will be added

X\