1 CORINTIOS 8

1Sehe titɨm olak erze olak ahwoso uje atɨmlo yok uje kɨmɨjɨ om otew erze loshɨpo ẽro uje oshuu hn oshɨmɨhɨ kojano po uje ochii porroshtɨhɨ o kɨmɨjɨ ye ompe. Nos yɨrahalo kuche. Erze oso uje ochɨraha kuche õr pwele onarim ɨre, per ich ma om kɨmɨjɨ onahmũrye ich otakashɨmye. 2Uje yeẽk tata uje nos chɨraha kuche wɨchɨ yẽrɨj dɨrahapa uje tyenɨj chɨraha. 3Per uje yeẽk sahmũr Porrosht ich Porrosht chɨraha ɨre pork chiihla ɨre heke wɨchɨ ɨr aap. 4Sehe titɨm olak kɨmɨjɨ om uje elɨlo erze kuche ẽro uje oshɨmɨhɨ kojano po uje ochii porroshtɨhɨ o kɨmɨjɨ ye ompe. Yɨrahalo erze kojano po wɨr ye latɨkɨsh, ye Porroshtpe, hn yɨrahalo uje shɨ Porrosht sohmɨra uje de. 5Ode uje otata otsɨɨ: —Porrosht ich kɨhniya uje de poõrc hn uje de lɨka hnɨmich.— Heke par õr ɨre ich õr porrosht kɨhniya hn ich õr ɨrhẽ kɨhniya. 6Per par eyok ich shɨ Porrosht sohmɨra, wɨchɨ uu eyok Deych. Wɨchɨ uje nos shiyokõr erze kuche uje de, hn eyok de shɨ par uje eyok narim ɨre. Shɨ eyok Ɨrhĩch sohmɨra de. Wɨchɨ Jesucristo uje nos shiyokõr kuche uje de. Ɨre uje shuu eyok Porrosht aabo. 7Per ode uje õr eyuwo tɨsĩ̵r uje porrosht kɨnãho ode ich kɨhniya per nĩhyok. Porrosht aabo nohmɨramo ode uje antni oteeychãha erze kojano po. Õr eyuwo shish tɨsĩ̵r uje erze kojano po ich ũru uje oshɨmɨhɨ erze kuche ẽro heke uje otew ich shuu ochuuna uje oshiyokõr uje mĩ̵hnɨk. 8Kɨmɨjɨ elɨlo erze kuche ẽro o kɨmɨjɨ ye elɨlope ich ye latɨkɨsh. Porrosht shish sahmũr olak. 9Abeylshɨp olak par uje ye wɨr oneẽt olak erze uje yẽrɨj odɨraha pishɨ Porrosht hn uhulo oshiyokõr erze uje wɨr oshuu deyuwo tɨsĩ̵r uje Porrosht ye nahmũrpe per olak erahalo uje ye mɨhnĩ̵kpe. 10Owa eraha erze kuche. Kɨmɨjɨ yeẽk teychɨm owa uje akaha erze kojano po ɨr ihyuch hn aak heke uhu seẽt owa hn tew toy erze uje oshuu hn oshɨmɨhɨ erze kojano po pork wɨr ye dɨrehepe erze uje eraha heke shuu deyuwo tɨsĩ̵r uje Porrosht ye nahmũr uje tew erze kuche ẽro heke ye ompe uje ɨre tew. 11Uhu ese eshɨbich shiyokõr uje mĩ̵hnɨk shɨ pork ye dɨrehepe. Cristo tooho krus eeychkite par ese eshɨbich toy. 12Heke uje uhu olak leshɨbo oshiyokõr uje ich mɨhnũwo ich ahakõrlo mɨhnɨkĩ̵hɨ õr. Uhulo ochuuna uje oshiyokõr uje ich mɨhnũwo pork ye odɨrehepe. Uje ahakõrlo uhulo ɨtsorz ich ahakõrlo mɨhnɨkĩ̵hɨ Cristo. 13Heke kɨmɨjɨ taw erze kuche ẽro ich tuu ese pɨshɨbich shiyokõr uje ich mĩ̵hnɨk, ich ma om uje ye taw par uje ye tuu niyokõr uje ich mĩ̵hnɨk.

will be added

X\