1 CORINTIOS 7

1Sehe titɨm olak erze uje sehe erahalo uje atɨmlo yok asa olak hutɨta ɨr ahwoso uje asɨmlo yokni. Ich om uje hnakɨrbich ye diilekupe 2per hnakɨrbo hn tɨmcher ich okɨhniya uje oshiyokõr mɨhnuwõhoye uje ye onõyhi pishye ahɨrpe hn tɨmcher oshiyokõr mɨhnuwõho yẽr hn hnakɨrbo oshiyokõr mɨhnuwõhoye, heke ich ma om uje hnakɨrbich ɨr ɨrãhta pishta de, hn ich ma om uje tɨmcharrza ɨr abich pisht de. 3Hnakɨrbich tyenɨj umuhu nerãhta ahɨr hn tɨmcharrza tyenɨj umuhu dabich ahɨr. 4Asa tɨmcharrza ɨr ɨkiyo ɨr abich. Wɨchɨ uu ɨr yɨnsɨrc hn ese hnakɨrbich ɨr ɨkiyo asa ɨr ɨrãhta. Wate ɨr yɨlahata. 5Ye ompe uje hnakɨrbich iim uje umuhu nerãhta ahɨr hn tɨmcharrza ɨtspo ye ompe uje iim umuhu dabich ahɨr, per kɨmɨjɨ otakasho deyuwo hn oym pɨkaap par uje õr orar otsapur Porrosht ich om. Per uje terɨhɨ erze daalo uje õr ɨre ochɨbɨte par uje õr orar ich tyenɨj omuhuye ahɨrpo par uje Satanás ye nɨmchaha õr eyuwo uje mɨhnũwo hn ye õr pwele otɨbey ɨre hn otorãhaye. 6Titɨm olak ahnũwo par uje erahalo. Porrosht ye dɨtakpe uje ochiileku hn ye dɨtakpe uje õr kiimo. 7Tahmũr uje nos õr kiimo ɨtso yok, per Porrosht ɨshɨm kal nohmɨra ɨr ukurbo shuu kɨnãho kɨnãho par uje oshiyokõr uje Porrosht sahmũr pork ye nos õr ɨlo yokpe. 8Sehe titɨm olak uje olak kiimo hn uje olak kiime hn erze uje õr poluuwo. Ich om uje ye odiilabey hn ich om uje ye ey olak eku ɨtso yok. 9Per kɨmɨjɨ ye olak pwele par uje abeylo olak ich tyenɨj ey olak eku, pork ich ma om uje olak ɨrẽhte de o olak abiyo de je uje uhu olak eyuwo mɨhnũwo uje nĩhyok olak ɨrẽhte o kɨmɨjɨ nĩhyok olak abiyo. 10Sehe titɨm erze uje õr abiyo de o kɨmɨjɨ õr ɨrẽhte de. Ahnũwo ahwoso ye tãra peyuwope. Shɨ tãra eyok Ɨrhĩch. Ye ompe uje tɨmcharrza iim dabich, 11per kɨmɨjɨ wate noym dabich ich tyenɨj shish kiime, o tyenɨj cheeshpo par uje ĩhi ese dabich ahɨrpo. Ese hnakɨrbich ɨtspo, ye ompe uje iim nerãhta. 12Erze uje tyenɨj titɨm olak yewo ye tãra eyok Ɨrhĩchpe shɨ tãra yok. Kɨmɨjɨ yeẽk chɨhɨ uje Porrosht aap hn ɨr ɨrãhta ye Porrosht aappe hn wate yesh sehe dakaha ahɨr ich ye ompe uje iim wate. 13Kɨmɨjɨ tɨmcharrza chɨhɨ waa je Porrosht aap hn ɨr abich ye Porrosht aappe per yesh sehe dakaha ahɨr ich ye ompe uje wate iim ɨre. 14Hnakɨrbich uje ɨr ɨrãhta Porrosht aap per ɨre ye Porrosht aappe wɨchɨ par Porrosht ich shɨ ɨtso uje ɨre aap per ye Porrosht aappe. Hn tɨmcharrza waa je ye Porrosht aappe per ɨr abich Porrosht aap par Porrosht ich shɨ ɨtso uje ɨre aap per ye Porrosht aappe. Porrosht shiyokõr shuu ɨtsorz par uje ye õr aabo otokole ɨlo erze uje ye odɨraha Porroshtpe per ele ahle wɨr ye ɨlorzpe. 15Sehe titɨm olak kuchɨt yetpo. Kɨmɨjɨ hnakɨrbich ye Porrosht aappe per ɨr ɨrãhta Porrosht aap hn sehe noym nerãhta ich ɨr ɨrãhta ye narhak ɨre. Hn tɨmcharrza ɨtspo kɨmɨjɨ ye dɨraha Porroshtpe hn sehe noym dabich uje wɨchɨ Porrosht aap ich ɨr abich ye narhak ɨre. Porrosht ye dɨbɨtpe uje erze ɨr aabo otsontew erze tɨmcher uje oym õr o kɨmɨjɨ hnakɨrbo uje oym õr ich shɨ ɨtspo. Porrosht sahmũr uje ɨr aabo õr aho kɨɨs. 16Owa uje owa tɨmchar ye eraha kɨmɨjɨ deeych yet nehe hn akashɨm abich par uje uhu masaha toy par Porrosht aap, hn owa uje owa hnakɨrap ye eraha kɨmɨjɨ deech yet nehe hn akashɨm erãhta par uje uhu masaha toy par Porrosht aap. 17Heke kal olak nohmɨr tyenɨj shish shiyokõr uje eyok Ɨrhĩch ɨshɨm ɨre pork Porrosht chiihla olak par olak ɨr aabo. Wɨr uje shish titɨm Porrosht aabo uje otakasho lawichɨhɨ lekɨtiyo. 18Kɨmɨjɨ Porrosht diihla yeẽk par uje masaha par ɨr aap uje ɨr yarta de waa je iich otsɨɨ sirkunsisyon ich ye ompe uje prowa diyuhu asa ɨr yarta. Kɨmɨjɨ ɨr yarta nihyokõho ɨre waa je iich otsɨɨ sirkunsisyon hn masaha par Porrosht aap ich ye ompe uje ɨre chɨbɨte ɨr yarta. 19Kɨmɨjɨ owa yarta chɨhɨ waa je iich otsɨɨ sirkunsisyon o kɨmɨjɨ nĩhyok ich shɨ ɨtsye, ye latɨkɨsh. Shɨ uje ahakõrlo uje Porrosht ahwoso tata wɨchɨ uje ich om. 20Heke kal olak nohmɨre uje masaha par Porrosht aap ich ye niyokõr kuche par shuu ɨre kɨnãha. Shɨ iyem uje Porrosht tatɨm ɨre. Shish tyenɨj ɨtso uje wapni de uje Porrosht chiihla ɨre par uje masaha par ɨr aap. 21Heke kɨmɨjɨ owa õr yɨlak hn amsaha par Porrosht aap ye uhu eyuwo tɨsĩ̵r hn owa yuhwo. Kɨmɨjɨ owa pwele enshii uhu ensɨrc tãra owa ich atokole heke ye owa ɨr yɨlakpe. 22Kɨmɨjɨ olak yeẽk chɨhɨ uje masaha par Porrosht aap per wɨchɨ õr yɨlak ich wɨchɨ ye eyok Ɨrhĩch ɨr yɨlakpe, per kɨmɨjɨ wɨchɨ ye oso õr yɨlakpe uje masaha par Porrosht aap ich wɨchɨ Cristo ɨr yɨlak. 23Uje Cristo tooho krus eeychkite ich tiya olak par ɨr yɨlo pork ɨshɨ olak hnɨtewɨhɨ Porrosht ahɨr heke ye ompe uje asɨmɨhɨlo olak yeẽk par uje chii olak deloho. 24Pɨshɨbo watsaklo, heke titɨm olakpo. Kal olak nohmɨre uje masaha par Porrosht aap ich ye niyokõr kuche par uje duhu ɨre kɨnãha. Shish tyenɨj ɨtso uje wapni de uje Porrosht chiihla ɨre par uje masaha par ɨr aap. 25Sehe titɨm olak uje yahpaa ey olak ekupe o kɨmɨjɨ yahpaa ey olak abeype. Eyok Ɨrhĩch ye tatɨm yok latɨk uje tyenɨj titɨm olak per shɨ titɨm olak uje tãra yok peyuwo. Porrosht sosɨr yok heke erahalo uje ye tehnyẽr olakpe. 26Ele ahle shish kuche mɨhũwo tĩ̵r eyoklo heke tɨbɨte uje kal olak nohmɨre ich ye niyokõr kuche par shuu ɨre kɨnãha. Shish tyenɨj shiyokõr erze obiyo uje yesh shiyokõr. 27Kɨmɨjɨ ɨrãhta chɨhɨ ich ye moym, hn kɨmɨjɨ ye ɨrãhtɨrash ich ye eyãha. 28Per kɨmɨjɨ ey eku ich ye mɨhnĩ̵kpe, hn kɨmɨjɨ apɨbitɨta diilabey ich ye niyokõrpe uje mĩ̵hnɨk. Per ich kuche mɨhnũwo ich kɨhniya heke erze uje ochiileku hn erze uje ochiilabey ich tyenɨj mĩ̵hnɨk tĩ̵r õr. Ye tahmũrpe uje erze kuche mɨhnũwo tĩ̵r olak heke titɨm olakɨke tuu ɨtsorz. 29Pɨshɨbo watsaklo, titɨm olak ahnũwo pork ich yej Cristo cheeshpo nehe heke erze uje õr ɨrẽhte de tyenɨj ochiyuhu ɨre shɨ oshuu ɨre ɨtso uje ye õr ɨrẽhtɨrsh par uje oshiyokõr Cristo ɨr ɨbiyo. 30Erze uje oyerh ye ompe uje oyerhpa oshuu daalo kɨhniya, hn erze uje ich õr ayla ye ompe uje oshuu õr ahmyo sontew uu õr ɨbiyo uje Porrosht ɨshɨm õr par uje oshiyokõr. Erze uje otiya kuche ye ompe uje shish oshuu deyuwo tɨsĩ̵r ɨr kushjãro. 31Erze uje otiya kuche hn ochiwãha ye shɨ tyenɨj oduhu ɨlorz par uje oshiyokõr Cristo ɨr ɨbiyo toy. Erze kuche uje de nãhu ĩ̵rmo wɨr shɨ sɨhna ɨre shɨchish. 32Ye tahmũrpe uje shish uhu olak eyuwo tɨsĩ̵r kuche. Hnakɨrbich uje ye ɨrãhtɨrash shish shuu deyuwo tɨsɨrĩ̵hɨ eyok Ɨrhĩch ɨr ɨbiyo. Shɨ sehe duhu eyok Ɨrhĩch ehet kɨɨsɨhɨ ɨre. 33Per hnakɨrbich uje ɨrãhtash ma shuu deyuwo tɨsɨrĩ̵hɨ erze kuche uje de nãhu ĩ̵rmo par uje shuu nerãhta ehet kɨɨsɨhɨ ɨre. 34Heke shuu deyuwo tɨsɨrĩ̵hɨ Porrosht hn shuu deyuwo tɨsɨrĩ̵hɨ nerãhta toy. Tɨmcharrza waa je poluu hn tɨmcharrza waa je phar õr ɨtspo, shɨ oshuu deyuwo tɨsɨrĩ̵hɨ eyok Ɨrhĩch par uje oshuu ehet kɨɨsɨhɨ õr ɨre. Nos wɨr kuche uje oshuu deyuwo tɨsĩ̵r hn nos wɨr kuche uje oshiyokõr wɨr par eyok Ɨrhĩch, per tɨmcharrza waa je abichish shɨ shuu deyuwo tɨsɨrĩ̵hɨ erze kuche uje de nãhu ĩ̵rmo par uje shuu dabich ehet kɨɨsɨhɨ ɨre. 35Titɨm olak ahnũwo pork sehe takashɨm olak, ye par uje tahɨrm olakpe. Sehe tuu ahakõrlo uje ich ma om, hn ahakõrlo eyok Ɨrhĩch ɨr ɨbiyo hn uhu olak eyuwo chɨhɨ lalerc. 36Uje yeẽk ɨr ihyãta chɨhɨ hn shuu deyuwo tɨsĩ̵r uje ich sahmũrpa wate hn wate terɨhɨ leherc, hn sehe nõyhi wate ahɨr hn ye pwele seempe ich ma om uje õhiye ahɨr pork sehe niyokõr duhu ɨlorz. Ye mɨhnĩ̵kpe. 37Per kɨmɨjɨ yeẽk duhu deyuwo tɨsĩ̵r uje yahpaa nahmũr diilekupe hn pwele iyem pork chɨraha tɨbey ɨre par uje ye niyokõr uje ich mĩ̵hnɨk wɨchɨ shiyokõr uje ich om. 38Heke ese uje chiileku shiyokõr uje ich om hn ese uje yahpaa nahmũrpe uje diileku shiyokõr uje ich ma om. 39Tɨmcharrza shish tyenɨj sakaha dabich ahɨr uje ehn ɨka. Kɨmɨjɨ ɨr abich toy ich hnii wate pwele chiilabey per shɨ tyenɨj ĩhi duhut Porrosht aap ahɨr. 40Ich ma om uje shɨ wate poluu hn ehet kɨɨs. Ahnũwo uje titɨm watɨke tuu ɨtsorz pork Porrosht Ɨchɨbich takashɨm yok.

will be added

X\