1 CORINTIOS 5

1Titɨm olak. Shish tukunt uje olak ehet yeẽk de uje shiyokõr mɨhnĩ̵kpa. Erze uje ye odɨraha Porroshtpe yelɨj oniyokõr oduhu ɨlorz. Wɨchɨ hnakɨrbich ĩhi latahacha ahɨr, 2hn olak ich olak narim olak. Tyenɨj shuu olak dosdarak uje wɨchɨ shiyokorĩ̵hɨ olak ehetni. Ich tyenɨj eyuhulo olak ehet ese hnakɨrbich uje shiyokõr mĩ̵hnt. 3Ye yok chɨhɨ olak ahɨrpe per tɨbɨte shɨ ɨtso uje pɨchɨbich de olak ahɨr, heke tɨbɨtni uje tyenɨj uhulo wɨchɨ tokolɨhɨ olak ahɨr 4tĩ̵ra eyok Ɨrhĩch Jesús ɨr iich ese hnakɨrbich uje yesh shiyokõr ese mĩ̵hnt. Uje akɨshlo olak owich ich shɨ ɨtso uje pɨchɨbich de olak ahɨr hn eyok Ɨrhĩch Jesús ɨr ukurbo de olak ahɨr toy. 5Heke tyenɨj uhulo tokolɨhɨ olak ahɨr ese hnakɨrbich hn ebɨtlo Satanás hme par uje wɨchɨ sepyẽr ɨre shuu iim deluu mɨhnũ. Heke uje terɨhɨ ese deeych uje eyok Ɨrhĩch Jesús cheeshpo nehe ich wɨchɨ hnakɨrbich de eyok ahɨr toy. 6Ye ompe uje shish olak narim olak shɨ pork olak ewenta ese mĩ̵hnt uje ese hnakɨrbich shiyokõr. Erahalo uje shɨ pan eyhita pɨkaap ich shuu nos ese erint masta potɨta, hn erahalo uje erze kuche mɨhnũwo uje de olak ehet ich pɨkaap per wɨsɨk wɨsɨk ich chũr lekɨtiyo. 7Heke tyenɨj uhulo tokolɨhɨ olak ahɨr ese hnakɨrbich uje shiyokõr mĩ̵hnɨk par uje olak shɨ olak ɨtso ese masta uje ahle ye eyhirãsh pork Cristo wɨchɨ uje tooho eyokkite. Cristo shɨ ɨtso erze obeje uje erze israel oso oshuu oshuu toy par õr ahamich uje iich otsɨɨ Pascua. 8Heke tyenɨj yiyokõrlo eyok ahamich shɨ ɨtso erze israel oso uje oshiyokõr õr ahamich uje otew pan uje ye ɨr eyhirãsh. Asa pan eyhita sɨteẽta uu kuche mɨhnũwo per yiyokõr ese õr ahamich yuhulo ɨtso pan uje ye eyhirãsh. Erze pan uje ye eyhirãsh wɨr shɨ ɨtso erze ahwoso uje ich ũru. 9Sehe titɨm olak uje tichew hutɨta yata par titɨm olak par uje ye meylo erze uje ye onõyhi pishye ahɨrpe, hn erze uje otorãhaye, hn erze uje otsahat loshɨpo, hn erze uje ma mɨhnũwo uje oshiyokorĩ̵hɨye. 10Uje titɨm olak tuu ɨtsorz ich ye tokorzɨhɨ erze ĩ̵rmo oso uje oshiyokõr erze kuche mɨhnũwo oshuu ɨtsorz. Ye tokorzɨhɨ erze ĩ̵rmo oso uje sehe odukutɨrãha ɨre kuche hn erze uje otohɨr hn erze uje oteeychãha kojano po ochii ɨr porroshtɨhɨ. Kɨrẽhe ɨlorz ich tyenɨj atokolɨhɨlo ĩ̵rmo. 11Shɨ titɨm olak hutɨta yata ɨr ahwoso par uje ye meylo erze Porrosht aabo uje oshiyokõr mɨhnuwõhoye hn erze uje otorãhaye hn erze uje ye onõyhi pishye ahɨrpe hn erze uje oshuu loshɨpo sahat ɨre hn erze uje otsahat loshɨpo hn nos wɨr kuche mɨhnũwo uje ɨtso hn erze uje sehe odukutɨrãha ɨre kuche hn erze uje oteeychãha kojano po ochii ɨr porroshtɨhɨ hn erze uje otatɨm oso yewo par uje oshuu otsɨtak yewo hn erze uje oshuu yɨkɨch sẽhi ɨre hn erze uje otohɨr. Ye meylo erze Porrosht aabo uje oshiyokõr erze mɨhnũwo oshuu ɨtsorz hnii uje aakɨhɨlo õr ahɨr. 12Yok pɨbiyo ye par tepyẽr erze uje ye õr Porrosht aabope. Olak ɨbiyo wɨr par epiyerlo erze Porrosht aabo uje oshiyokõr uje ich mɨhnũwo. 13Porrosht wɨchɨ uje tyenɨj sepyẽr erze uje ye ɨr aabope. Uhulo tokolɨhɨ olak ahɨr ese hnakɨrbich uje shiyokõr mĩ̵hnɨk.

will be added

X\