1 CORINTIOS 4

1Olak tyenɨj uhu olak eyuwo tɨsĩ̵r uje õryok shɨ Cristo ɨr ɨbiyo. Tyenɨj uhu olak eyuwo tɨsĩ̵r uje Porrosht shuu oyanɨmɨrãha lahwoso oyitɨm oso uje Cristo ɨshɨ õr hnɨtewɨhɨ Porrosht ahɨr pork ye odɨrehepe. 2Ye shɨ erzepe uje oyitɨm olak. Erze uje Porrosht shuu omasaha par ɨr aabo õr bahluwo tyenɨj shish oshiyokõr uje ɨre otata. 3Par yok ich ye latɨkɨsh uje eychɨmlo pɨbiyo kɨmɨjɨ om o kɨmɨjɨ ye ompe, o kɨmɨjɨ jwe teychɨm. Hn yok ɨtspo ye tiitape kɨmɨjɨ pɨbiyo om o kɨmɨjɨ mɨhnũwo. 4Ye tukuunape kɨmɨjɨ timehĩ pork ye tɨkɨrehepe. Shɨ eyok Ɨrhĩch wɨchɨ uje chɨraha. Wɨchɨ uje tyenɨj tata kɨmɨjɨ timehĩ. 5Moymlo uje uhulo ese yet ma ɨluu om je erze yewo. Tyenɨj shɨ anemlo nehech eyok Ɨrhĩch cheeshpo nehe pork wɨchɨ uje tyenɨj nos chɨbɨte kuche orhõta uje otsakɨs. Wɨchɨ uje tyenɨj shuu ɨmeheeych uje oso sehe oniyokõr. Uje taãcha nehe ich Porrosht tyenɨj teychɨm õr ɨbiyo hn tyenɨj narim kal nohmɨr nohmɨr kɨmɨjɨ oniyokõr om. 6Pɨshɨbo watsaklo, erze uje titɨm olakɨke shɨ tɨteẽta yok hn Apolos uje oyiyokorãha olak oyuhu erahalo uje ye ompe aluwelo uje Porrosht ahwoso tata par uje nĩhyok olak yeẽk uje narim yet hn sepɨ yet. 7¿Yeẽkpo uje shuu owa ma dich je erze yewo? ¿Asujãnɨkɨhɨ uje Porrosht ye dosɨm owape? Kɨmɨjɨ shɨ dosɨmɨhɨ owa duhu ɨlorz ¿ich ɨnaapo heke owa narim owa ɨtso uje owa erz? 8¿Ɨnaapo heke ebɨtlo shɨ ɨtso uje olak de wahacha poõrc hn erze kuche nos de olak ahɨr hn uhu olak ɨtso ɨhĩ̵r deyo? Ebɨtlo shɨtso uje amsahalo uhu olak ɨtso reyɨhɨ wahacha poõrc hn ye õryok reyɨhɨ olak ahɨr toy. Ich tahmũr par amsahalo par rey heke ich õryok oyomsaha par reyɨhɨ wahacha olak ahɨr toy . 9Tɨbɨte uje Porrosht shuu ɨtso uje õryok de ma uhurc pork õryok ɨr apóstole hn kuche mɨhnũwo shish tĩ̵r õryok. Chɨbɨte õryok ma uhurc. Wɨchɨ chɨbɨte õryok shuu õryok ɨtso erze hnakɨrbo uje tyenɨj oshuu õr oshuu otoy. Wɨchɨ chɨbɨte õryok shuu ɨtso par uje wɨr oteychɨm õryok erze uje ode ĩ̵rmo hn erze anjele toy hn erze oso. 10Õryok oyɨbɨte uje shɨ õryok ɨtso totihlo pork oyanɨmɨrãha uje Jesucristo shiyokõr par oso, per olak ebɨtlo uje olak eykdeyo pork ye otiislo Jesucristope. Õryok ye õryok ukũrbɨrsh, per olak ebɨtlo uje olak ukurbosh. Ebɨtlo uje oso otola olak, per ich shɨ ɨtso uje ye otola oryõkpe. 11Nehech ele ahle yesh õryok iyuwo sẽhi õryok hn õryok iilo sẽhi õryok. Ye õryok ishuwɨrsh uje om, hn oso ich otsepyẽr õryok, hn ye õryok ihyuwo pishĩ̵rsh. 12Shish oyishew obiyo ich oyɨhnew. Uje ochinehnɨm õryok ich oyiyuhu õryok ahwoso omoho õr. Uje otsepyẽr õryok ich shish õryok ewenta. 13Otatɨm yewo par uje oshuu otsɨtak õryok ich shish õryok prowa oyuhu õr aho kɨɨsɨhɨ õryok. Oshuu õryok ɨtso erze kuche uje waresh uje de nãhu ĩ̵rmo, hn oshuu õryok ɨtso pɨramo uhrĩ̵ye. 14Ye tichew titɨm olakpe tuu ɨtsorz par uje tuu apooklo. Shɨ sehe takɨt olak pork olak ɨtso uje yok pijo uje ich tahmũr pishɨ õr. 15Okɨhniya oshiyokorãha olak Jesucristo ɨr ɨluu per erze uje õr ɨtso olak deyo wɨr ye õr kɨhniyape. Shɨ yok nohmɨra uje ich yok ɨtso olak deych pork titɨm olak uje Jesucristo ɨshɨ olak hnɨtewɨhɨ Porrosht ahɨr par uje amsahalo par olak Porrosht aabo 16heke titɨm olak par uje shish eẽtlo yok. 17Tuu Timoteo tĩ̵r olak. Wɨchɨ shɨ ɨtso yok pijo uje ich tahmũrpa. Shish shiyokõr uje tahmũr pork yok uje titɨm ɨrni hn masaha par Porrosht aap. Wɨchɨ tyenɨj tatɨm olak par uje shuu olak eyucha uje tiyokõr shɨ ɨtso uje nos tiyokorãha Porrosht aabo uje otakasho lawichɨhɨ lekɨtiyo pork yok Cristo ɨr ɨbɨk. 18Titɨm olak uje nohmɨramo ode olak ehet uje ochɨbɨte uje ich ye takaashpe par uje tekɨrɨhɨ olak nehe heke wɨr onarim ɨre 19per kɨmɨjɨ eyok Ɨrhĩch nahmũr ich takaashpo shɨchish tekɨrɨhɨ olak. Heke tɨkɨraha kɨmɨjɨ Porrosht Ɨchɨbich chɨhɨ õr aho par uje shuu õr ukurbosh o kɨmɨjɨ shɨ odiilehet. 20Kɨmɨjɨ Porrosht Ɨchɨbich iyeebe hn oyehe nẽr ich om pork Porrosht ukurbo de õr, per kɨmɨjɨ shɨ õr ɨre odiilehet ich shɨ õr ahwoso ye jukur. 21Uje tekɨrɨhɨ olak nehe ¿ich ahmũrlo latɨkpo? ¿Je ahmũrlo uje tokõhwa phich par tepyẽr olak o kɨmɨjɨ ahmũrlo uje tɨkɨrẽt tɨtĩ̵r olak hn pehet kɨɨsɨhɨ olak pork tahmũr uje ahakõrlo?

will be added

X\