1 CORINTIOS 3

1Pɨshɨbo watsaklo, uje tɨkitkẽr Porrosht aabo yewo uje oshiyokõr uje ɨre sahmũr ich titɨm õr erze Porrosht ahwoso ɨr ɨluu uje ich kwestpa ochɨraha, per ye yok pwele tuu ɨtsorz uje tɨkitkẽr olak. Shɨ tɨkitkẽr olak tuu ɨtso erze Porrosht aabo uje otsahmũr nãhu ĩ̵rmo oso õr ɨluu. Shɨ tɨkitkẽr olak tuu ɨtso erze uje hnii omasaha par Porrosht aabo pork olak shɨ olak ɨtso pɨkɨhnino uje hnii oshũrha. 2Wapni tiyokorãha olak Porrosht ahwoso uje ye kwestpe par erahalo. Wɨr shɨ ɨtso leshe uje pɨkɨhnint ɨhɨ ehn yahpaa pwele taakpe. Nehech ele ahle yesh olak ɨtso pɨkɨhnint uje ye õr pwele taakpe 3pork yesh ahmũrlo olak ɨluu ɨler. Yesh de olak uje abɨtɨlo kuche hn ahakosloye heke ɨmeheeych uje yesh ahmũrlo olak ɨluu ɨler hn ahakõrlo uhu olak ɨtso erze uje ye odɨraha Porrosht ɨluutpe 4pork olak ehet yeẽk de uje tata ɨm: —Tahmũr Pablo,— hn yet de uje tata ɨm: —Tahmũr Apolos.— Heke yesh ahakõrlo uhu olak ɨtso erze uje ye Porrosht aabope. 5Erahalo Apolos ɨr ɨbiyo, hn erahalo Pablo ɨr ɨbiyo. Wɨr shɨ Porrosht ɨr ɨbiyo. Wɨr uje ye oduhu otiislo Porroshtpe. Nos wɨr eyok yiyokõrlo erze obiyo uje eyok Ɨrhĩch ɨshɨm eyok nohmɨr nohmɨr. 6Shɨ yok ɨtso yeẽk uje chukwẽr jõro, hn Apolos wɨchɨ shɨ ɨtso yeẽk uje sɨta, per Porrosht wɨchɨ uje shuu erze jõro krese. 7Heke shɨ Porrosht wɨchɨ uje bale pork shuu krese, ye esepe uje chukwẽr hn ye esepe uje sɨta. 8Ese uje chukwẽr hn ese uje sɨta ich õr ɨbiyo ɨhĩ̵rtso shɨ ɨtsye. Porrosht wɨchɨ uje ɨshɨ õr uje otserz per shɨ par erze õr ɨbiyo uje ich om. 9Õryok oyukwĩya Porrosht uje oyiyokõr ɨr ɨbiyo. Wɨchɨ uje takashɨm õryok shuu tokole om. Olak shɨ olak ɨtso Porrosht ɨr shakɨrrza. Uje oyitɨm olak Porrosht ahwoso ich ɨtso uje oyukwẽr jõro shakɨrrza ehet. Olak shɨ ɨtso Porrosht ɨr ihyuch toy. 10Porrosht takashɨm yok uje ɨshɨm yok erze pɨbiyo shɨ ɨtso uje shuu tiyokõr pwertɨt tuu uhwɨrbe iyehet wap. Yet de uje shiyokõr ese pwertɨt per kal nohmɨra tyenɨj shiyokõr debiyo om par uje ye nimehĩ ese pwertɨt 11pork ich ye õr pwelpe uje ochihitsɨm uhwɨrbe yẽr pork erze uhwɨrbe uje dechɨ shɨ ɨtso Jesucristo. Nĩhyok yet uje ɨshɨ eyok hnɨtew. 12Ich kuche kɨhniya ochĩ̵ra uje oshiyokõr ese pwertɨt, ochĩ̵ra oro o kɨmɨjɨ plata o kɨmɨjɨ kojano po uje ich ɨhĩ̵rtso o kɨmɨjɨ tabla o kɨmɨjɨ onĩ̵ra ɨhnemyo o kɨmɨjɨ kuche yewo. 13Erze obiyo uje õr ɨre oshiyokõr kal nohmɨra ich deeych yet nehe hn tyenɨj õr Yɨnsɨrc shuu ɨmeheeych kɨmɨjɨ tokole om o kɨmɨjɨ ye tokolpe pork õr Yɨnsɨrc tyenɨj chɨbɨte jwekɨta par teychɨm kɨmɨjɨ ewenta o kɨmɨjɨ ye ewentpe. 14Nos Porrosht aabo oshiyokõr ese pwertɨt uje erze uhwɨrbe wɨr shɨ ɨtso Cristo. Kal nohmɨra kɨmɨjɨ ɨr ɨbiyo ewenta asa jwekɨta ich ɨre tyenɨj serz. 15Per kɨmɨjɨ asa jwekɨta nos nɨhna erze ɨbiyo uje shiyokõr ich wɨchɨ pyert ɨr premyo per shish ɨr ɨkɨrĩt de Porrosht ahɨr. Wɨchɨ shɨ ɨtso hnakɨrbich uje de dahuch ehet hn ɨr ihyuch duhlu. Tokolɨhɨ dahuch per nos wɨr ɨr kushjãro sɨhna ɨre. 16Erahalo uje olak Porrosht ɨr ihyuch hn ɨr Ɨchɨbich debuhu olak aho. 17Kɨmɨjɨ yeẽk nɨhna Porrosht ihyuch ich Porrosht tyenɨj sɨhna wɨchɨ pork olak Porrosht ɨr ihyuch hn wɨchɨ uu olak Yɨnsɨrc. 18Ye ompe uje shɨ yeẽk sehnyẽr ɨre. Kɨmɨjɨ olak yeẽk dɨbɨte uje ɨre eykdeyoho nãhu ĩ̵rmo ɨshujãro ich ye ompe, per kɨmɨjɨ duhu ɨre ɨlo yeẽk uje ye eyuwo tɨsĩ̵r nãhu ĩ̵rmo ɨshujãro ich Porrosht shuu ɨre eykdeyo. 19Pork erze oso uje ode nãhu ĩ̵rmo ochɨbɨte uje ich ma õr eykdeyo per par Porrosht ich õr eyuwo ye jukur. Porrosht ahwoso tata shuu ɨtsorz ɨm: —Erze uje ich õr eykdeyo Porrosht shuu õr eyuwo ɨtso trampta uje sontew õr.— 20Porrosht ahwoso tata toy shuu ɨtsorz ɨm: —Eyok Ɨrhĩch chɨraha uje erze uje õr eykdeyo õr eyuwo ye jukur.— 21Heke ye ompe uje yeẽk narim oso pork nos wɨr kuche wɨr par eyok. 22Pablo, Apolos, hn Pedro shɨ õryok ɨtso olak yɨlo par oyakashɨm olak. Hn ahnũwo ĩ̵rmo hn ese ɨkɨrĩt wɨr par olaklo. Kɨmɨjɨ Porrosht aabo yeẽk toy ich shɨ toy pork Porrosht sahmũr. Erze uje yesh tĩ̵r olak hn erze uje tyenɨj tĩ̵r olak nehe wɨr par takashɨm olak. 23Cristo wɨchɨ olak yɨnsɨrc, hn Porrosht wɨchɨ Cristo ɨr yɨnsɨrc.

will be added

X\