1 CORINTIOS 2

1Pɨshɨbo watsaklo, uje takaachĩ̵hɨ olak ahɨrni hn tanɨmɨrãha Porrosht ahwoso titɨm olak uje Porrosht shuu Cristo shiyokõr par olak, ich teẽt ahwoso uje ɨmeheeych par erahalo hn ye titɨm olakpe uje tãra peyuwo uje ich kwestpa erahalo, 2pork tɨbɨte uje shɨ sehe titɨm olak Jesucristo uje tooho krus eeychkite. 3Uje takaha tekɨrɨhɨ olakni ich yok kasɨk uje tanɨmɨrãha Porrosht ahwoso titɨm olak. Tɨkɨtɨla õr nehech pɨkiyo tãra. 4Uje tiipuhut tanɨmɨrãha Porrosht ahwoso ich tuu amsahalo par Porrosht aabo. Ye titɨm olak ahwoso uje ich ye ɨmeheeychpe ɨtso uje oso otata uje õr eykdeyo per Porrosht Ɨchɨbich hn Porrosht ɨr ukurbo wɨr uje shuu ɨmeheeych uje pahwoso ich ũru. 5Heke olak ye otiislo Porroshtpe ye uje shɨ oso otatɨm olak. Ye otiislo pork erahalo uje Porrosht ukurbo de. Wɨchɨ shuu erahalo erze uje ich ũru. 6Sehe titɨm olak uje õryok de Porrosht aabo õr ahɨr uje ma ochɨraha Porrosht ahwoso ich oyiyokorãha õr ɨr ahwoso uje ich ma kwestpa par ochɨraha. Erze ahwoso uje erze õr eykdeyo oshiyokorãha erze oso uje ode nãhu ĩ̵rmo uje ye odɨraha Porroshtpe ich ye oyiyokorãha olakpe oyuhu õryok ɨlo õr, hnii erze õr ahwoso uje õr bahluwo oshiyokorãha õr pork deeych yet nehe ich õr ahwoso tokole uje ye jukur. 7Per õryok oyiita erze ahwoso uje antkite Porrosht ye duhu ɨmeheeychpe. Ye duhu oso odɨraha lahwospe. Porrosht ich eykdeyo. Uje ehn yahpaa niyokõr ɨrmõkite ɨchii chɨbɨte lahwoso uje oso tyenɨj ye olotiis Cristo par omasaha par ɨr aabo par uje otaachĩ̵hɨ ɨre ahɨr nehe. 8Nos wɨr oso õr bahluwo ye odɨrehepe uje Cristo tyenɨj tooho õr. Kɨmɨjɨ odɨraha ich ye odowɨshɨhɨ eyok Ɨrhĩch uje tãra poõrc krus eeych 9pork Porrosht ahwoso tata shuu ɨtsorz ɨm: —Porrosht shiyokõr kuche par erze uje otsahmũr ɨre per nĩhyok yeẽk uje umo erze kuche, hnii chunt latɨkpo erze kuche, hnii shuu deyuwo tɨsĩ̵r erze kuche.— 10Per eyok uje eyok Porrosht aabo Porrosht shuu Dechɨbich shiyokorãha eyok erze kuche. Porrosht Ɨchɨbich nos chɨraha Porrosht ɨr ɨluu uje ich kwestpa par oso ochɨraha. 11¿Yeẽkpo uje nos chɨraha hnakɨrbich ɨr eyuwo? Shɨ ese hnakɨrbich ɨr ɨchɨbich uje de ɨre ehet wɨchɨ uje chɨraha. Shɨ ɨtspo nĩhyok yeẽk uje chɨraha Porrosht ɨr eyuwo. Shɨ ɨr Ɨchɨbich wɨchɨ uje nos chɨraha Porrosht ɨr eyuwo. 12Porrosht ye dosɨm eyok erze ɨluu mɨhnũpe uje de nãhu ĩ̵rmo per ɨshɨm eyok Dechɨbich par uje shuu yɨraha erze kuche uje ɨshɨmɨhɨ eyok. 13Wɨr uje oyiyokorãha olak. Ye oyiyokorãha olakpe erze uje tãra oso õr eyuwo. Shɨ oyiyokorãha olak erze uje tãra Porrosht Ɨchɨbich oyuhu ɨmeheeych par erze uje Porrosht Ɨchɨbich de õr aho. 14Ese uje ye Porrosht Ɨchɨbich chɨhɨ ɨre ehetpe ich ye nahmũr erze kuche uje tãra Porrosht pork ɨre chɨbɨte uje erze kuche uje tãra Porrosht ich ye jukur. Ye ɨr pwelpe uje chɨraha pork shɨ pwele chɨraha uje Porrosht Ɨchɨbich shiyokorãha ɨre. 15Ese uje Porrosht Ɨchɨbich de ɨre ehet hn shiyokõr uje tata ich shuu deyuwo tɨsĩ̵r nos wɨr kuche kɨmɨjɨ om o kɨmɨjɨ mĩ̵hnɨk. Per ese uje ye dɨraha Porroshtpe ye dɨraha uje Porrosht aabo oshiyokõr heke ye pwele tata kɨmɨjɨ om o kɨmɨjɨ mĩ̵hnɨk. 16Porrosht ahwoso tata shuu ɨtsorz ɨm: —¿Yeẽkpo chɨraha eyok Ɨrhĩch ɨr eyuwo par uje shiyokorãha ɨre?— Nĩhyok, per Cristo ɨr eyuwo de eyok.

will be added

X\