1 CORINTIOS 16

1Sehe titɨm olak par uje eeshɨlo hnote yẽr par asɨmlo eyok leshɨbo uje õr nesita. Titɨm olak par uje ahakõrlo uhulo olak ɨtso uje titɨm erze Porrosht aaboni uje ode hnɨmich Galacia par uje oshiyokõr. 2Uje kal terɨhɨ domingo ich eeshɨlo hnote yẽr par uje ehmerlo. Uje olak yewo otserz hnote kɨhniya ich om oshɨm kɨhniya per erze uje otserz arheebe ich om oshɨm pɨkaap. Heke uje takaachĩ̵hɨ olak ahɨr nehe ich ye nesit eeshɨlo yẽrpe. 3Uje takaachĩ̵hɨ olak ahɨr nehe ich aahlɨlo hnakɨrbo par uje ohnoy erze hnote uje eeshɨlo yẽr par oshɨm erze Porrosht aabo uje ode Jerusalén. Erze hnakɨrbo uje ohnoy erze hnote uje eeshɨlo yẽrhna par oshɨm õr ich tichew hute hn tokosɨm õr par uje ochɨraha yeniipo õr. 4Kɨmɨjɨ om uje takaha tɨtĩ̵r Jerusalén ich wɨr õya yok. 5Sehe titɨm olak uje wap sehe tekɨrɨhɨ erze Porrosht aabo uje odechɨ hnɨmich Macedonia nehech takaachĩ̵hɨ olak ahɨr. 6Yɨbe kɨmɨjɨ tiyakaha olak ahɨr tuu daalo arhaabo o kɨmɨjɨ tiyakaha olak ahɨr nehech hmamo ɨshɨrĩt uhurc. Heke olak pwele akashɨmlo yok uje takaha keshɨ ɨraãpo uje tyenɨj tɨtĩ̵r. 7Ye tahmũrpe uje tekɨrɨhɨ olak hn tɨkitokolɨhɨ olak ahɨr shɨchish per sehe tiyakaha olak ahɨr tuu daalo kɨhniya kɨmɨjɨ eyok Ɨrhĩch nahmũr. 8Sehe tiyakaha dɨt Efeso nehech terɨhɨ ese õr ahamich uje iich otsɨɨ Pentecostés. 9Porrosht shuu oso okɨhniya uje otsahmũr tiyokorãha õr Porrosht ahwoso, per ich okɨhniya uje otsɨtak hn sehe onontew. 10Uje Timoteo taachĩ̵hɨ olak ahɨr nehe ich tyenɨj uhulo wɨchɨ ehet kɨɨs pork wɨchɨ chishew eyok Ɨrhĩch ɨr ɨbiyo shɨ ɨtso yok. 11Ye ompe uje olak yeẽk sɨtak wɨchɨ. Uje tokolɨhɨ olak ahɨr ich akashɨmlo ɨre hn uhulo ehet kɨɨs par uje tɨrẽt tĩ̵r yok pork yok hn Porrosht aabo yewo yesh oyiyem ɨre. 12Shish titɨm eyok leshɨbich Apolos par uje tuu ĩya erze Porrosht aabo yewo uje sehe odo otĩ̵r olak per ele ahle ye nahmũr dope. Uje terɨhɨ ɨshɨrĩt uje ich om par hno tekɨrɨhɨ olak ich hno. 13Titɨm olak par uje abeylshɨp olak par uje nĩhyok yeẽk sehnyẽr olak. Ye uhu olak koswãha Cristo. Shish ye otiislo ɨre hn ye atɨlɨlo latɨk. 14Nos wɨr kuche uje ahakõrlo ich ahakõrlo pork ahmũrloye. 15Pɨshɨbo watsaklo, olak erahalo uje Estéfanas hn nos wɨr ɨr iiso wɨr uje omasaha wapni par Porrosht aabo wahacha hnɨmich Acaya. Wɨr ochɨbɨte ɨre par uje otakashɨm Porrosht aabo yewo. 16Titɨm olak par uje ahakõrlo uje erze oso otatɨm olak uje õr ɨtso Estéfanas hõr hn nos wɨr erze yewo uje otakashɨm erze Porrosht aabo hn erze yewo uje ochishew ɨr ɨbiyo. 17Sehe titɨm olak uje ich yok ayla uje Estéfanas hn Fortunato hn Acaico otaachĩ̵hɨ pahɨr. Wɨr uje otakashɨm yok pork olak ich olak dukuhla hn ye olak pwele akashɨmlo yokpe. 18Õr ɨre ich oshuu tukuurapo heke ich oshuu olak duurapo. Oso uje oshiyokõr oshuu ɨtsorz ich tyenɨj enɨlo õr. 19Nos wɨr Porrosht aabo uje ode ese hnɨmich Asia kal õr wee ich oshɨm olak saludo. Aquila hn Prisca hn nos wɨr Porrosht aabo uje otakasho lawichɨhɨ ɨr ihyuch oshɨm olak saludo pork ye otiislo eyok Ɨrhĩchpe. 20Nos wɨr eyok leshɨbo uje ode lɨka pahɨr oshɨm olak saludo. Olak tyenɨj shish etɨloye. 21Yok Pablo. Tichew tɨbɨte ana hutɨta uhurc uje tokosɨm olak saludo. 22Uje yeẽk chɨhɨ hn ye nahmũr eyok Ɨrhĩchpe ich Porrosht tyenɨj sajɨr wɨchɨ ɨkiyo. Sehe tuu eyok Ɨrhĩch deeshpo shɨchish. 23Sehe tuu eyok Ɨrhĩch Jesús dosĩ̵r olak. 24Nos wɨr olak ich tahmũr pishɨ olak pork erahalo Jesucristo.

will be added

X\