1 CORINTIOS 15

1Pɨshɨbo watsaklo, titɨm olak. Sehe tuu olak eyucha erze ahwoso uje tiyokorãha olakni uje Jesús ɨshɨ olak hnɨtewɨhɨ Porrosht ahɨrkite. Uje entloni erze ahwoso ich ahmũrlo hn ye moymlo Porroshtpe. 2Erze Porrosht ahwoso uje titɨm olakni wɨr uje shuu olak owich de Porrosht ahɨr per kɨmɨjɨ moymlo pork olak koswãha uje ebɨtɨloni uje ye otiislo Cristo heke ich ye jukur. 3Titɨm olak wapni erze uje olak nesita entlo. Titɨm olak uje Cristo tatɨm yok uje tooho krus eeychkite par ɨshɨ eyok hnɨtewɨhɨ Porrosht ahɨr shɨ ɨtso uje Porrosht ahwoso tata. 4Ochihitsɨm Jesús per daalo tre hn Porrosht shuu ɨkpo shɨ ɨtso uje Porrosht ahwoso tata. 5Wap tokolɨhɨ Pedro ɨkɨch depwe hn nos tokolɨhɨ wɨr apóstole yewo õr ɨkɨch toy. 6Deeych yet hn Jesús tokolɨhɨ Porrosht aabo õr ɨkɨch toy uje oyuwe kinyento. Wɨr ich okɨhniya uje yesh õr ɨka hn ich nohmɨramo wɨshɨ otoy. 7Deeych yet hn tokolɨhɨ Santiago ɨkɨch toy, hn deeych yet ich nos tokolɨhɨ erze ɨr apóstole õr ɨkɨch toy. 8Ich uhurc ich tokolɨhɨ pɨkɨch heke shɨ yok ɨtso pɨkɨhnint uje iyuwe deshĩ̵ryo hn ye shurhãpe. 9Per yok ye yok dichpe je erze apóstole yewo. Ich ye ompe uje otɨbii yok otsɨɨ apóstol pork tiyokõr mɨhnɨkĩ̵hɨ Porrosht aaboni. 10Porrosht wɨchɨ uje sosɨr yok hn shuu yok ɨr apóstol. Ye tokoym ɨr ɨbiyope per ich tɨnaha yok uje tiyokõr ɨr ɨbiyo je erze apóstole yewo. Ye shɨ yok uje tiyokõr erze obiyope per Porrosht wɨchɨ uje sosɨr yok hn takashɨm yok. 11Ich ye latɨkɨsh par yok kɨmɨjɨ titɨm olak o kɨmɨjɨ erze apóstole yewo otatɨm olak. Per ich om uje oyiyokorãha olak Porrosht ahwoso hn ye otiislo. 12Oyanɨmɨrãha oyitɨm olakni uje Cristo ɨkponi tokolɨhɨ erze topo õr ahɨr. ¿Ɨnaapo heke olak ehet yewo ode uje otata uje erze topo ye õr ɨkpope? 13Kɨmɨjɨ erze topo ye õr ɨkpo nehe ich ye Cristo ɨkpo petɨkni, 14hn kɨmɨjɨ ye wɨchɨ ɨkponi ich erze ahwoso uje oyiyokorãha olak ich ye jukur, hn ye jukur uje ye otiislo uje Cristo ɨshɨ olak hnɨtew. 15Kɨmɨjɨ Cristo ye ɨkpo ɨlorzni ich shɨ oyiita õryok ukushiĩ, pork oyitɨm olak uje Porrosht shuu Cristo ɨkponi, per kɨmɨjɨ Porrosht ye duhu ɨkponi ich nĩhyok uje õr ɨkpo nehe. 16Kɨmɨjɨ erze topo ye õr ɨkpo nehe ich Cristo ye ɨkpo petɨkni. 17Kɨmɨjɨ ye Cristo ɨkponi ich ye jukur uje ye yotiislo ɨre heke yesh eyok hnɨtew de Porrosht ahɨr. 18Kɨmɨjɨ ye Cristo ɨkponi ich nos wɨr erze uje ye olotiis Cristope uje otoni ich ode urhuta bahluta ehet. 19Kɨmɨjɨ ye eyok ɨkpo nehe ich ye jukur uje yiyemlo erze uje ich om uje Porrosht tata. Heke ich eyok ma losuhlaabo je erze oso yewo per ich ye ũrpe. 20Ich ũru uje Cristo ɨkponi hn tokolɨhɨ erze topo õr ahɨr. Wɨchɨ webich os uje ɨkponi hn erze yewo tyenɨj oyehe ner nehe uje otoni. 21Hnakɨrbich nohmet uje iich otsɨɨ Adán nos shuu oso otoy. Per hnakɨrbich yet de uje shuu oso õr ɨkpo nehe. 22Nos wɨr eyoklo yãrlo Adán heke tyenɨj nos yɨtɨlo, per nos wɨr uje ye olotiis Cristo ich omasaha par Porrosht aabo hn õr ɨkɨrĩt ahle de nehe. 23Ye nos õr ɨkpe yehe wɨchɨ deeych nohmet per nos õr owɨlo de uje õr ɨkpo nehe. Cristo wɨchɨ uje wapni hn ɨkpo, hn uje cheeshpo nehe ich nos wɨr eyok uje Cristo wɨchɨ uu eyok Ɨrhĩch eyok ɨkpo. 24Uje terɨhɨ ĩ̵rmo uhurc nehe ich Cristo nos sɨhna erze uje õr bahluwo hn nos wɨr erze uje õr ukurbosh. Ɨshɨm ɨr Deych Porrosht nos wɨr Porrosht aabo. 25Cristo tyenɨj masaha par rey nehech nos serz namãho. 26Ese ɨr ɨmehẽt uhurzosht uje Cristo tyenɨj sɨhna nehe wɨchɨ uje shuu oso otoy. 27Porrosht nos chɨbɨte oso hn nos chɨbɨte kuche Cristo ɨr hme. Uje Porrosht tata uje nos chɨbɨte erze kuche Cristo ɨr hme ich ɨmeheeych uje ye dɨbɨte ɨre Cristo hmepe. 28Ich uhurc hn Cristo nos serz wɨr kuche hn nos de ɨr hme hn wɨchɨ de Porrosht ɨr hme. Porrosht wɨchɨ uje nos chɨbɨte erze kuche Cristo ɨr hme. Heke ich uhurc hn Porrosht ich ma dich. 29Kɨmɨjɨ ye erze topo õr ɨkpo nehe ¿ich ɨnaapo heke otohɨrm erze yewo par erze Porrosht aabo uje otoni hn ye otohɨrm õr petɨkni? Kɨmɨjɨ olotiis uje topo õr ɨkpo nehe ¿ɨnaapo heke otohɨrm yet uje yesh ɨka par ese uje toni? 30Sehe titɨm olak kuchɨt yet. Kɨmɨjɨ ye topo õr ɨkpo nehe ich ye jukur uje oyanɨmɨrãha Porrosht ahwoso hn oyuhu yewo otsɨtak õryok nehech sehe oduhu õryok oduhu oyɨtɨ. 31Pɨshɨbo watsaklo, erahalo uje ich ũru uje ma tahmũr uje ye otiislo eyok Ɨrhĩch Jesucristo. Ich ũru toy uje ode uje kal daalo sehe oduhu yok oduhu tɨkɨtɨ. 32Uje yok dechɨ dɨt Efeso tanɨmɨrãha Porrosht ahwosni ich ɨtso uje takɨtsɨkɨr erze hnakɨrbo uje shɨ õr ɨtso erze loshɨpo uje ich ehnito. Kɨmɨjɨ ye erze topo õr ɨkpo nehe ¿ɨnaapo heke titɨm õr tuu ɨtsorz? Kɨmɨjɨ ye õr ɨkpo nehe ich ma om tiyokõr uje yewo otata otsɨɨ: —Oyuko oyaak hn oyoho pork deeych yet nehe hn oyɨtɨ.— 33Ye uhulo onehnyẽr olak. Yet de uje tatni ɨm: —Kɨmɨjɨ yeẽk ɨr ɨluu om hn ĩya erze uje õr ɨluu mɨhnũ ich oshuu wɨchɨ ɨr ɨluu mɨhnũ toy.— 34Uhu olak eyuwo tɨsĩ̵r erze uje ich om hn ye ahakõrlopo erze uje ich mɨhnũwo. Olak yewo ode uje ye odɨraha Porrosht ɨr ɨluupe. Titɨm olak tuu ɨtsorz par uje tuu apooklo uje ode olak ehet hn ye atɨmlo õr. 35Sehe titɨm olak uje olak yewo sehe odɨraha uje ¿keshɨ oduhu ɨnaapo par topo õr ɨkpo nehe? ¿Keshɨ õr ɨkiyo ɨlo latɨkpo uje õr ɨkpo nehe? 36Owa uje uhu eyuwo tɨsĩ̵r ɨtsorz ich owa totihla. ¿Ɨnaapo heke ye uhu eyuwo tɨsĩ̵rpe uje ekwẽr erze jõro eyhi ich shɨ ɨtso uje toy uje ahatsɨm hn erze jõro tokole? 37Uje ekwẽr kuchẽrk ich shɨ ɨr eyhi wɨr uje ekwẽr kɨmɨjɨ trigo ɨr eyhi o kɨmɨjɨ jõro kɨnãho ɨr eyhi per jõro tokole. 38Porrosht wɨchɨ uje shuu erze eyhi tokole shɨ yehe wate pohorrza uje ɨre sahmũr. Kal eyhi shɨ yehe wate pohorrza tokole ɨtso uje ɨre sahmũr. 39Nos wɨr kuche ẽro ye ɨlyepe. Hnakɨrbich ɨr ẽro kɨnãho, hn loshɨpo ɨr ẽro kɨnãho, hn chɨpɨrme ɨr ẽro kɨnãho, hn loshiyo ɨr ẽro kɨnãho. 40Shɨ ɨtso erze anjele wɨr õr ɨkiyo kɨnãho, ye ɨlo oso õr ɨkiyope. Erze kuche uje ich ɨhĩ̵rtso uje de wahacha poõrc ich kɨnãho hn erze kuche uje ich ɨhĩ̵rtso uje de nãhu ĩ̵rmo ich kɨnãho toy. 41Uu deeych ɨr yokõrt wɨchɨ kɨnãha, ye ɨlo ese shekurko ɨr yokõrtpe. Wɨchɨ kɨnãha hn porrzeebe ɨr yokõrt kɨnãho toy. Nos wɨr porrzeebe ɨr yokõrt kɨnãha kɨnãha, ye ɨlyẽrpe. 42Erze uje otoni uje õr ɨkpo nehe ich õr kɨnãho toy. Erze õr ɨkiyo uje ochihitsɨm ich nos taata hn uje õr ɨkpo nehe ich ye õr ɨkiyo taatpe. 43Erze uje otoy ich tyenɨj ochihitsɨm õr pork õr ɨkiyo taata. Uje õr ɨkpo nehe ich õr ɨkiyo ɨhĩ̵rtso. Uje ochihitsɨm õr ich ye õr ukũrbɨrsh, per uje õr ɨkpo nehe ich õr ukurbo de. 44Uje otoy hn ochihitsɨm õr ich shɨ õr ɨkiyo ɨtso ahnũwo oso uje ode nãhu ĩ̵rmo, per uje õr ɨkpo nehe ich ye õr ɨkiyo shɨ par ɨrmõpe. Õr ɨkiyo de uje sɨhna ɨre hn õr ɨkiyo de uje yelɨj nɨhna ɨr. 45Porrosht ahwoso tata shuu ɨtsorz ɨm: —Adán wɨchɨ uu hnakɨrbich webich osht uje Porrosht shiyokõrkite hn ɨshɨm ɨr ɨkɨrĩt shɨ par nãhu ĩ̵rmo.— Hnakɨrbich yet de uje ɨtso Adán. Wɨchɨ ɨshɨm oso õr ɨkɨrĩt uje yelɨj nɨhna ɨre. Wɨchɨ Cristo. 46Wap ye oso õr ɨkɨrĩt chɨhɨpe uje ich om par otĩ̵r poõrc. Shɨ oso õr ɨkɨrĩt de nãhu ĩ̵rmo. Õr ɨkɨrĩt uje ich om par tĩ̵r poõrc iyehe nẽr. 47Ese hnakɨrbich webich osht wɨchɨ ĩ̵rmo os. Porrosht shiyokõrkite chĩ̵ra hnɨmich. Ese hnakɨrbich yet uje iyehe nẽr wɨchɨ tãra poõrc. 48Kal oso ich õr ɨkiyo ɨtso Adán. Porrosht shiyokõrkite chĩ̵ra hnɨmich ukult, per Porrosht aabo tyenɨj otĩ̵r poõrc nehe. Je deeych yet nehe ich õr ɨkiyo ɨtso Cristo ɨr ɨkiyo uje tãra poõrc. 49Ele ahle shɨ eyok ɨkiyo ɨtso Adán ɨr ɨkiyo uje Porrosht shiyokõrkite chĩ̵ra hnɨmich ukult. Je deeych yet nehe ich eyok ɨkiyo ɨtso Cristo ɨr ɨkiyo uje tãra poõrc. 50Pɨshɨbo watsaklo, sehe titɨm olak. Eyok uje eyok de nãhu ĩ̵rmo eyok ẽro hn eyok armɨsta ye pwelpe uje tĩ̵r Porrosht ahɨr wahacha poõrc. Eyok ɨkiyo tyenɨj taata nehe heke erze ɨkiyo ye pwelpe tĩ̵r poõrc par uje serz erze uje yelɨj taata. 51Titɨm olak kuchɨt yet uje ye oso odɨrehepe. Ye nos yɨtɨlo petɨk nehe per Porrosht tyenɨj nos shuu eyok ɨkiyo kɨnãho. 52Uje yunt Porrosht ɨr trompeta uje yeẽk sobɨta uje shuu iyehe uje sobɨta ich nos shuu eyok kɨnãho shɨchish shuu ɨtsorz. Shɨ ɨtso uje eyok ɨle ẽperak shɨchish ich Porrosht shuu laabo õr ɨkpo shɨchish uje otoni hn ich ye otopope, shɨ Porrosht shuu eyok ɨkiyo ahlo toy. 53Eyok ɨkiyo sɨhna ɨre saraãshi per deeych yet nehe hn Porrosht ɨshɨm eyok ɨkiyo ahlo uje ye nɨhna ɨrpe, heke ye yɨtpe. Shish tyenɨj eyok ɨka. 54Uje eyok ɨkiyo tokole uje ye taatpe hn eyok ɨkɨrĩt tokole uje ye tope ɨtsorz ich Porrosht ɨr ahwoso yakaha uje ɨr aabo otata otsɨɨ: —Eyok yerz pork ich ye yɨtpe. 55Ese uje shuu oso otoy ye derzpe, hn nĩhyok ɨr ukurbo par uje shuu otoypo ɨtso uje ich ye wosĩ̵rsh.— 56Ese uje ich wos deyo uje shuu otoy wɨchɨ uje oshiyokõr uje ich mɨhnũwo. Ɨr ukurbo wɨchɨ Porrosht ɨr ley pork shuu yɨraha uje yiyokõr uje ich mɨhnũwo par uje sepyẽr eyok. 57Tɨkɨnshɨp Porrosht pork eyok Ɨrhĩch Jesucristo wɨchɨ uje ɨshɨ eyok hnɨtewkite heke shuu yerz. 58Pɨshɨbo watsaklo, heke titɨm olak. Ye uhu olak koswãha eyok Ɨrhĩch. Shish ahakõrlo ɨr ɨbiyo pork erahalo uje erze eyok Ɨrhĩch ɨr ɨbiyo uje ahakõrlo wɨr shish tokole uje bale.

will be added

X\