1 CORINTIOS 14

1Sehe titɨm olak par uje shish enaha olak par uje ahmũrloye, hn shish apurlo Porrosht par uje ɨshɨm olak erze eyuwo hn ukurbo uje tãra ɨre. Ese uje ich ma om wɨchɨ par sanɨmɨrãha Porrosht ahwoso. 2Ese uje seẽt ahwoso kɨnãho ye keytkẽr osope, shɨ keytkẽr Porrosht heke nĩhyok uje yeẽk chɨraha uje wɨchɨ tata. Porrosht Ɨchɨbich shuu chiilehet tatɨm Porrosht erze kuche uje yewo ye odɨrehepe. 3Per ese uje shiyokorãha õr Porrosht ahwoso ich shuu erze yewo ma ye olotiis Porrosht, hn shuu õr duurapo, hn shuu õr aho kɨɨs. 4Ese uje seẽt ahwoso kɨnãho shɨ shuu ɨre ma ye lotiis Porrosht, per ese uje sanɨmɨrãha Porrosht ahwoso tatɨm erze ɨr aabo par uje shuu ma ye olotiis Porrosht. 5Titɨm olak. Sehe tuu nos erahalo eẽtlo ahwoso kɨnãho per ma tahmũr uje anɨmɨrãhalo Porrosht ahwoso. Yeẽk uje sanɨmɨrãha Porrosht ahwoso ich ma om je yeẽk uje seẽt ahwoso kɨnãho, per ich ompo kɨmɨjɨ yeẽk chɨhɨ uje shuu erze ahwoso kɨnãho cheeshɨ tatɨm olak par uje shuu olak ma ye otiislo Porrosht. 6Pɨshɨbo watsaklo, kɨmɨjɨ tekɨrɨhɨ olak hn shɨ teẽt ahwoso kɨnãho uje ye erahalope ich ye takashɨm olakpe. Per kɨmɨjɨ titɨm olak erze uje Porrosht shuu tɨkɨraha ich takashɨm olak, o kɨmɨjɨ titɨm olak uje yok tɨkɨraha ich takashɨm olak, o kɨmɨjɨ tanɨmɨrãha Porrosht ahwoso ich takashɨm olak o kɨmɨjɨ tiyokorãha olak ich takashɨm olak. 7Erze kuche uje oshuu hn otsobɨta par oteeychɨ kɨmɨjɨ flawta o kɨmɨjɨ arpa, kɨmɨjɨ ye ihyokõrt tokole om ich nĩhyok uje yeẽk chɨraha uje wɨchɨ shuu seẽt. 8Kɨmɨjɨ ohyerptosht dobɨta kornetɨt hn ye dɨraha dobɨtape ich nĩhyok uje yewo ochɨraha heke ye onɨshii ɨrpe par uje oteye. 9Shɨ ɨtso uje tokolɨhɨ olak. Kɨmɨjɨ eẽtlo ahwoso kɨnãha uje ye odɨraha uje tata ich shɨ ɨtso uje shɨ eylo olak uhut. 10Oso õr ahwoso kɨnãho ich kɨhniya de nãhu ĩ̵rmo uje otseẽt hn ich ũru uje nos tata kuche par uje ochɨraha. 11Per kɨmɨjɨ ye tɨkɨraha erze ahwoso uje tata, tɨbɨte uje wɨchɨ dihip kɨnãha hn ɨre chɨbɨte uje yok dihip kɨnãha. 12Olak shɨ sehe eẽtlo ahwoso kɨnãho par uhulo ɨmeheeych uje Porrosht Ɨchɨbich de olak aho, per ich ma om enahalo olak par uje uhulo Porrosht aabo ma ye olotiis ɨrpe. 13Heke yeẽk uje seẽt ahwoso kɨnãho ich tyenɨj orar sapur Porrosht par uje pwele shuu erze ahwoso cheeshɨ tatɨm õr. 14Kɨmɨjɨ teẽt ahwoso kɨnãho uje yok orar ich pɨchɨbich wɨchɨ uje orar per ye tɨkɨraha uje tiita. 15¿Tiyokõr latɨkpo? Tyenɨj tuu pɨchɨbich orar seẽt ahwoso kɨnãho hn tyenɨj tuu peyuwo tɨsĩ̵r hn yok orar toy par uje nos ochɨraha uje tiita. Tyenɨj tuu pɨchɨbich teechɨ seẽt ahwoso kɨnãho hn tuu peyuwo tɨsĩ̵r hn teechɨ toy. 16Kɨmɨjɨ olak yeẽk ye niyokõr ɨtso yok, per shɨ seẽt ahwoso kɨnãho hn teeychãha Porrosht hn yeẽk uje tekɨrɨhɨ iglesya ehet tẽr hn ye dɨraha uje tata. Heke ye ɨre pwelpe uje tata ɨm: —Yehe wɨchɨ— pork ye dɨraha uje tata. 17Ich om uje seẽt ahwoso kɨnãho uje nɨna Porrosht per ye takashɨmpe ese yet uje de ahɨr. 18Tɨkɨnshɨp Porrosht uje ma teẽt ahwoso kɨnãho je nos wɨr olak uje eẽtlo ahwoso kɨnãho, 19per uje yok de asa iglesya ehet ich ma tahmũr tiyokorãha õr titɨm õr tuu pahwoso sinko uje ochɨraha je uje teẽt ahwoso kɨnãho dye mil uje ye odɨrehepe. 20Pɨshɨbo watsaklo, moymlo uje uhu olak eyuwo ɨtso pɨkɨhnino. Shɨ tyenɨj uhu olak ɨlo pɨkɨhnino ijaabo uje ye odɨraha oniyokõr uje mɨhnĩ̵kpe hn uhu olak eyuwo tɨsĩ̵r ɨlo hnakɨrbo. 21Porrosht ahwoso tata shuu ɨtsorz ɨm: —Eyok Ɨrhĩch sole: “Tuu dihipo kɨnãho uje otseẽt lahwoso ohno otĩ̵r erze israel oso par otsepyẽr õr per shish ye onahmũr otẽr yokpe.”— 22Heke ich ɨmeheeych uje erze ahwoso kɨnãho uje otseẽt wɨr par yara par erze uje otsotiis ɨre, ye par erzepe uje ye olotiis ɨrpe. Per erze uje otsanɨmɨrãha Porrosht ahwoso wɨr ye balpe par erze uje otsotiis Porrosht. Wɨr par yara par erze uje ye olotiis Porroshtpe pork otsahmũr. 23Heke kɨmɨjɨ nos Porrosht aabo otakasho lawich hn oneẽt ahwoso kɨnãho kɨmɨjɨ yewo omasaha õr ehet uje ye Porrosht aabope hn yelɨj onõya õr ¿je otata uje õr totihlo? Ẽhe, otata uje õr totihlo. 24Per kɨmɨjɨ nos anɨmɨrãhalo Porrosht ahwoso hn yeẽk masaha olak ehet uje ye Porrosht aappe uje yelɨj nõya olak hn chunt uje athɨlo Porrosht ahwoso ich chuuna uje ɨr ɨluu mɨhnũ. 25Erze kuche mɨhnũwo uje shiyokõrni ich nos chɨbɨte orhõta heke icha dete hnɨmoho Porrosht ɨkɨch hn teeychãha Porrosht hn tatɨm õr uje ich ũrpa uje Porrosht de õr aho. 26Pɨshɨbo watsaklo, sehe titɨm olak. Uje akɨshlo olak owich ich ode uje oteeychɨ otseẽt imno hn ode uje oshiyokorãha õr hn ode uje otata uje Porrosht shiyokõr omɨhɨ õr hn ode uje otseẽt ahwoso kɨnãho hn ode uje ochɨraha erze ahwoso kɨnãho hn oshuu cheeshɨ otatɨm õr. Nos wɨr erze uje otata kuche iglesya ehet wɨr shɨ par oshuu Porrosht aabo ma ye olotiis ɨre. 27Uje sehe eẽtlo ahwoso kɨnãho ich shɨ uhu olak osiyer o kɨmɨjɨ olak tre hn ye aluwelo. Shɨ uhu olak nohmɨr nohmɨr uje eẽtlo per tyenɨj yet de uje chɨraha ahwoso kɨnãha hn shuu cheeshɨ tatɨm õr. 28Per kɨmɨjɨ nĩhyok uje chɨraha shuu erze ahwoso kɨnãho cheeshɨ iglesya ehet hn tatɨm õr ich ye eẽtlo. Per kɨmɨjɨ sehe eẽt ich shɨ par owa hn Porrosht per ich eetĩ̵hɨ ahuch ehet, ye iglesya ehetpe. 29Wɨr õr ɨtspo uje otsanɨmɨrãha Porrosht ahwoso, kɨmɨjɨ õr osiyer o kɨmɨjɨ õr tre uje otsanɨmɨrãha Porrosht ahwoso hn nos wɨr Porrosht aabo yewo tyenɨj oshuu deyuwo tɨsĩ̵r uje otẽr kɨmɨjɨ ũru o kɨmɨjɨ ye ũrpe. 30Kɨmɨjɨ yeẽk chɨhɨ iglesya ehet hn Porrosht tatɨm ɨre kuchẽrk hn ese yet uje sanɨmɨrãha Porrosht ahwoso tyenɨj ɨshɨm ɨre par uje chiilehet hn tẽr uje wɨchɨ tata. 31Heke nos olak nohmɨr nohmɨr pwele uje anɨmɨrãhalo Porrosht ahwoso par uje uhulo Porrosht aabo ma odɨraha kuche hn oduurapo. 32Uje yeẽk sehe nanɨmɨrãha Porrosht ahwoso tatɨm õr uje Porrosht tatɨm ɨre ich tyenɨj iyem uje tok ɨre par uje chiilehet. 33Porrosht ye nahmũrpe uje nos õr ahwoso chɨmɨrɨhɨ ye luke. Sahmũr uje nos õr aho kɨɨsɨhɨye. Titɨm olak. Ɨtso uje Porrosht aabo oshiyokorãha orĩ̵hɨ iglesya aho lekɨtiyo 34ich tɨmcher tyenɨj ye odiilehetɨhɨ iglesya ehet pork tɨmcharrza tyenɨj shiyokõr uje ɨr abich tatɨm ɨre pork Porrosht ahwoso tata shuu ɨtsorz. 35Uje kuchẽrk chɨhɨ uje sehe dɨraha ich tyenɨj tatɨm dabich uje ode dahuch pork ye ompe uje tɨmcharrza chiilehetɨhɨ iglesya ehet. 36¿Je ye ahmũrlo uje titɨm olakɨke? Ye shɨ olak uje Porrosht ɨshɨm olak lahwosni, hn ye shɨ par olak erze Porrosht ahwoso. 37Kɨmɨjɨ yeẽk dɨbɨte uje ɨre profeta uje sanɨmɨrãha Porrosht ahwoso o kɨmɨjɨ dɨbɨte uje shish shiyokõr uje Porrosht Ɨchɨbich tata, wɨchɨ tyenɨj tata uje erze ahwoso uje tichew tãra eyok Ɨrhĩch. 38Kɨmɨjɨ ye tata uje tãra Porrosht ich ye ẽrlo ɨre. 39Pɨshɨbo watsaklo, heke titɨm olak. Tyenɨj ekwilo par uje anɨmɨrãhalo Porrosht ahwoso, hn ye ahɨrmlo õr uje otseẽt ahwoso kɨnãho. 40Uje nos akɨshlo olak owichɨhɨ iglesya ehet ich tyenɨj ye uhu olak ahwoso nɨmɨrɨhɨ ye luke.

will be added

X\