1 CORINTIOS 13

1Titɨm olak. Kɨmɨjɨ teẽt ahwoso kɨnãho uje oso otseetĩ̵hɨ lekɨtiyo o kɨmɨjɨ teẽt anjele õr ahwoso per ye tahmũr yewo ich ye yok jukur. Ich shɨ yok ɨtso fyerɨt ihyokõrt uje yeẽk shuu, hn shɨ yok ɨtso pɨrete uje fyero uje oshuu ochĩ̵ra yẽr ich ihyokõrak dich. 2Kɨmɨjɨ yok profetya uje tanɨmɨrãha Porrosht ahwoso iglesya ehet, o kɨmɨjɨ nos tɨkɨraha erze kuche uje yewo ye odɨrehepe, o kɨmɨjɨ peyuwo deyo, nos tɨkɨraha kuche, o kɨmɨjɨ yelɨj tokotiis Porrosht heke yok pwele tuu ese kojach dich sɨhnok lalerc, per kɨmɨjɨ ye tahmũr oso yewo ich ye yok jukur. 3Kɨmɨjɨ tokosɨmɨhɨ losuhlaabo nos wɨr pishujãro, o kɨmɨjɨ tokosɨm yok õr par uje otsẽru yok per kɨmɨjɨ ye tahmũr oso yewo ich ye terz latɨk. 4Sehe titɨm olak. Kɨmɨjɨ ahmũr yewo ich enta õr hn uhu eluu oomɨhɨ õr hn ye abɨta õr kuche. Kɨmɨjɨ ahmũr yewo ich ye owa narim owa. 5Uje ahmũr yewo ich ye uhu owa dich. Uje ahmũr yewo ich ye ahakõr uje shɨ owa ahmũr, hn ye aas elo shɨchish, hn ye ehmerɨhɨ ehet erze kuche mɨhnũwo uje yet shiyokõrni. 6Kɨmɨjɨ ahmũr yewo ich ye uhu owa ayla uje kuche mɨhnũwo tĩ̵r õr. Shɨ tyenɨj owa ayla toy uje erze om tĩ̵r õr. 7Kɨmɨjɨ ahmũr yewo per oshiyokõr mɨhnɨkĩ̵hɨ owa ich ye eyuhu ahwoso mɨhnuwõho õr. Uje ahmũr yewo ich shish ye otiis õr uje otatɨm owa. Uje ahmũr yewo ich shish uhu eyuwo tɨsĩ̵r uje deeych yet nehe hn wɨr oshiyokõr uje ich om, hn shish nos owa ewenta erze kuche uje õr ɨre oshiyokõr. 8Porrosht chɨbɨte uje shish tyenɨj ahmũr yewo. Ye uhurztɨkɨsh, per uje yeẽk sanɨmɨrãha Porrosht ahwosoho iglesya ehet, hn uje yeẽk seẽt ahwoso kɨnãho, hn uje yet shiyokorãha yewo wɨr tyenɨj uhurɨsh nehe. 9Ele ahle yẽrɨj yɨraha, hn yẽrɨj yanɨmɨrãha ɨr ahwoso. 10Uje terɨhɨ ese ɨshɨrĩt nehe uje nos yɨraha erze kuche ich nĩhyok kuche uje yẽrɨj odɨraha. 11Uje ehn yok pɨkɨhninaapni uje tiipuhut hn uje tuu peyuwo tɨsĩ̵r ich shɨ yok ɨtso pɨkɨhnino yewo, per uje ich yok hnakɨrapni ich nos tokoym erze pɨkɨhnino õr ɨluu. 12Ele ahle yẽrɨj yɨraha Porrosht ɨluu shɨ ɨtso uje yeychɨm eyok ɨchɨbichɨhɨ pejta ehet waa je waresh hn yẽrɨj yomo eyok ɨchɨbich. Per je deeych yet nehe ich yomlo pishye. Ele ahle yẽrɨj tɨkɨraha per je deeych yet nehe ich nos tɨkɨraha shɨ ɨtso uje Porrosht chɨraha yok. 13Kuche de tre uje yelɨj nɨhna ɨre. Webich osht uje ye yotiislo Porrosht hn yet uje shish yiyemlo uje Porrosht tyenɨj ɨshɨm eyok uje de ɨre ahɨr hn yetpo uje shish yahmũrlo yewo per ese uje ich ma ɨhĩ̵rt wɨchɨ uje yahmũrloye.

will be added

X\