1 CORINTIOS 12

1Pɨshɨbo watsaklo, ele ahle sehe titɨm olak uje Porrosht Ɨchɨbich ɨshɨmɨhɨ Porrosht aabo õr eyuwo o ɨshɨmɨhɨ õr ukurbo par uje oshiyokõr ɨr ɨbiyo. Ye tahmũrpe uje ye erahalope. 2Erahalo uje ehn yahpaa olak Porrosht aabo petɨkni ich oso ode uje oshuu eeychãhalo erze kojano po uje ye dilehetpe. 3Heke ele ahle sehe tuu erahalo uje Porrosht Ɨchɨbich yelɨj duhu yeẽk lajɨr Jesús ɨkiyo. Nĩhyok uje yeẽk pwele tatɨm yewo ɨm: —Jesús wɨchɨ uu yok Ɨrhĩch— uje ye Porrosht Ɨchɨbich duhu tata duhu ɨlorz. 4Sehe titɨm olak. Porrosht nos ɨshɨmɨhɨ eyok eyuwo o eyok ukurbo shuu kɨnãho kɨnãho par shuu eyok dɨtuwo par uje yiyokõr ɨr ɨbiyo per nos wɨr erze eyuwo hn ukurbo shɨ tãra Porrosht Ɨchɨbich. 5Porrosht Ɨchɨbich shuu eyok yewo omasaha par Porrosht aabo õr bahluwo per õr ɨbiyo kɨnãho kɨnãho, per shish wɨr eyok Ɨrhĩch ɨr ɨbiyo. 6Obiyo ich kɨhniya uje ich kɨnãho kɨnãho uje sehe duhu yiyokõr per Porrosht shish sohmɨra. Chɨbɨte eyok aho uje sehe duhu nos yiyokõr. 7Ich ɨmeheeych uje Porrosht Ɨchɨbich de eyok aho pork shuu eyok dɨtuwo par yakashɨmloye. 8Porrosht Ɨchɨbich shuu Porrosht aap nohmɨra eykdeyo par chɨraha Porrosht ahwoso hn tatɨm õr, hn shuu yet chɨraha sanɨmɨrãha lahwoso, per shɨ Porrosht Ɨchɨbich wɨchɨ uje shuu õr dɨtuwo. 9Ɨshɨm yet eyuwo par uje ma ye duhu lotiis Porrosht. Ese õr eyuwo shɨ tãra Porrosht Ɨchɨbich, hn ɨshɨm yet ukurbo par uje shuu chukuta erze uje õr permo per shɨ tãra Porrosht Ɨchɨbich. 10Ɨshɨm yet ukurbo par uje shuu shiyokõr erze kuche uje ye latɨk pwele shiyokõr, hn ɨshɨm yet eyuwo par uje shuu dɨtɨk sanɨmɨrãha erze ahwoso uje Porrosht tatɨm ɨre, hn ɨshɨm yet eyuwo par uje shuu chɨraha kuche kɨmɨjɨ tãra Porrosht Ɨchɨbich o kɨmɨjɨ tãra ɨchɨbich kɨnẽhet. Porrosht Ɨchɨbich ɨshɨm yet eyuwo par uje seẽt ahwoso kɨnãho, hn ɨshɨm yet eyuwo par uje shuu chɨraha erze ahwoso kɨnãho uje yet seẽt hn shuu cheeshɨ tatɨm Porrosht aabo yewo. 11Nos wɨr erze ukurbo shɨ tãra Porrosht Ɨchɨbich. Ɨshɨm oso kal nohmɨr nohmɨr uje ɨre sehe dosɨm õr. 12Sehe titɨm olak. Hnakɨrbich shɨ sohmɨra per ɨkiyo ich kɨhniya per shish ɨre sohmɨra. Nos wɨr Porrosht aabo wɨr Cristo ɨr ɨkiyo uje shɨ sohmɨra. 13Porrosht Ɨchɨbich shɨ sohmɨra. Wɨchɨ de eyok aho uje eyok Porrosht aabo hn shuu ɨtso uje nos tohɨrm eyok par uje shuu eyok Cristo ɨr ɨkiyo. Kɨmɨjɨ eyok israel oso o kɨmɨjɨ eyok dihipo kɨnãho, o kɨmɨjɨ eyok õr yɨlo o kɨmɨjɨ ye eyok õr yɨlope per Porrosht Ɨchɨbich nos de eyok aho uje eyok Porrosht aabo. 14Eyok ɨkiyo ich kɨhniya, ye shɨ sohmɨrape. 15Kɨmɨjɨ eyok yeẽk pota ese yet ɨr ɨbiyo ich shɨ ɨtso uje asa Cristo ɨr hnɨtɨta tata ɨm: —Ye yok Cristo hmatape heke ye yok Cristo ɨr ɨkiyope— per wɨchɨ shish Cristo ɨr ɨkiyo. 16Kɨmɨjɨ Cristo ɨr ãrza tata ɨm: —Ye yok Cristo onta eyhitape heke ye yok Cristo ɨr ɨkiyope— per wɨchɨ shish ɨr ɨkiyo. 17Kɨmɨjɨ Cristo ɨr ɨkiyo shɨ onta eyhita ¿ich duhu ɨnaapo par uje chunt kuche? Kɨmɨjɨ Cristo ɨr ɨkiyo shɨ ãrza ich ye ɨre pwele uje chowɨhɨr latɨk. 18Porrosht wɨchɨ uje chɨbɨte eyok ɨkiyo erze po nohmɨr nohmɨr ɨr owich uje ɨre sahmũr. 19Kɨmɨjɨ eyok shɨ ãrza sohmɨra ich nĩhyok eyok ɨkiyo yewo. 20Ich ũru uje hnakɨrbich ɨr ɨkiyo ich kɨhniya per shɨ ɨre sohmɨra. 21Tɨteẽta kuchɨt yet. Cristo ɨr onta eyhita ye pwelpe tatɨm Cristo ɨr hmata ɨm: —Ye yok nesit owape.— Cristo ɨr huta ɨtspo ye pwele uje tatɨm ɨr hnɨtɨta ɨm: —Ye yok nesit owape.— 22Pork erze po uje de eyok ɨkiyo uje shɨ ɨtso uje ye ukũrbɨrsh per ich shish eyok nesita. 23Eyok ɨkiyo uje yẽrɨj om ich yuhu ma om. Eyok ɨkiyo de uje ye ompe par oso omo ich yakɨs yonãha eyok ɨshuwo, 24per eyok ɨkiyo uje oso omo ich ye yakɨspe. Porrosht wɨchɨ uje nos shiyokõr eyok ɨkiyo shuu yɨbey eyok ɨkiyo uje ye ompe yowa oso 25par uje ye dehek ɨre per shish nos takashɨmye. 26Kɨmɨjɨ eyok ɨkiyo sohmet doso ich nos yuuna uje doso, hn kɨmɨjɨ yeẽk diyuhu lahwoso omoho ekiyo pɨkaap ich nos wɨr ɨkiyo ich ayla. 27Heke titɨm olak. Olak Cristo ɨr ɨkiyo hn olak nohmɨr nohmɨr akɨshlo ɨre. 28Porrosht nos chiihla eyok par uje yiyokõr ɨr ɨbiyo per nos eyok ɨbiyo kɨnãho. Wap chiihla par ɨr apóstole. Wɨr uje otsanɨmɨrãha ɨr ahwoso otatɨm erze uje ye õr Porrosht aabope. Chiihla profeta toy. Wɨr uje otsanɨmɨrãha Porrosht ahwoso iglesya ehet. Hn chiihla yewo par uje oshiyokorãha õr Porrosht ahwoso. Chiihla yewo ma nẽr par uje oshiyokõr kuche uje ye latɨk pwele shiyokõr, hn chiihla yewo toy par uje ochukuta erze uje õr permo. Chiihla yewo par uje otakashɨm oso yewo, hn chiihla yewo par uje otakashɨm Porrosht aabo õr bahluwo õr ɨbiyo par uje nos tokole om, hn chiihla yewo par uje otseẽt ahwoso kɨnãho. 29Shɨ chiihla nohmɨramo par ɨr apóstole, hn shɨ chiihla nohmɨramo par ɨr profeta, hn shɨ chiihla nohmɨramo par oshiyokorãha õr Porrosht ahwoso, hn shɨ chiihla nohmɨramo par oshiyokõr kuche uje ye latɨk pwele shiyokõr. 30Shɨ chiihla nohmɨramo par ochukuta erze uje õr permo, hn shɨ chiihla nohmɨramo par uje otseẽt ahwoso kɨnãho, hn shɨ chiihla nohmɨramo par ochɨraha erze ahwoso kɨnãho par uje oshuu cheeshɨ otatɨm yewo. 31Titɨm olak wapɨke erze obiyo uje ich ma ɨhĩ̵rtso uje sehe tuu olak ma ahmũrlo hn ahakõrlo, per de uje ich ma om uje tyenɨj titɨm olak nehe.

will be added

X\