1 CORINTIOS 11

1Eẽtlo yok pork yok teẽt Cristo. 2Titɨm olak. Tahmũr uje shish olak eyucha yok hn ahakõrlo uje titɨm olakni. 3Sehe tuu erahalo uje Cristo wɨchɨ uu hnakɨrbo õr yɨnsɨrc, hn kal tɨmcharrza uje ɨr abich de, wɨchɨ uu ɨr yɨnsɨrc, hn Cristo ɨr yɨnsɨrc wɨchɨ Porrosht. 4Hnakɨrbich uje orar sapur Porrosht o kɨmɨjɨ nanɨmɨrãha Porrosht ahwoso uje sajuwe deheta ich wɨchɨ ye tola nensɨrc Cristope. 5Per kɨmɨjɨ tɨmcharrza orar sapur Porrosht o kɨmɨjɨ nanɨmɨrãha Porrosht ahwoso hn ye lajuwe lehetape wate ye tola labichpe pork wɨchɨ uu ɨr ɨrhĩch. Uje ye lajuwe dehetape ich shiyokõr shɨ ɨtso uje tuhu deheta sɨnshɨp. 6Kɨmɨjɨ wate ye nahmũr lajuwe leheta ich ma om uje tuhu deheta hn sɨnshɨp, per kɨmɨjɨ tuhu leheta ich shuu pook je ma om uje wate ye tuhu leheta per tyenɨj sajuwe leheta uje orar. 7Ye ompe uje hnakɨrbich sajuwe leheta uje ɨre orar o kɨmɨjɨ nanɨmɨrãha Porrosht ahwoso pork wɨchɨ Porrosht shiyokõrkite shuu ɨtso ɨre. Porrosht ich dich hn shuu hnakɨrbo õr deyo toy. Per kɨmɨjɨ asa tɨmcharrza lajuwe leheta ich shuu ɨmeheeych uje ese hnakɨrbich ich dich. 8Porrosht ye niyokõr hnakɨrbich petɨkkite nĩ̵ra tɨmcharrza arzɨbich. Shɨ shiyokõr tɨmcharrza chĩ̵ra hnakɨrbich arzɨbich. 9Ye niyokõr hnakɨrbich petɨkkite par tɨmcharrza ɨr ihyẽrak. Shɨ shiyokõr asa tɨmcharrza par hnakɨrbich ihyẽra. 10Heke ich om uje tɨmcharrza sajuwe deheta par chɨbɨte orhõta uje ɨr abich ich dich hn par nos wɨr anjele oteychɨm ɨre hn ochɨraha uje tola dabich. 11Kɨmɨjɨ nĩhyok hnakɨrbo ich nĩhyok tɨmcher o kɨmɨjɨ nĩhyok tɨmcher ich nĩhyok hnakɨrbo pork nos õr nesitye. 12Porrosht shiyokõr tɨmcharrzkite chĩ̵ra hnakɨrbich arzɨbich per ele ahle hnakɨrbo oshũrha otãra tɨmcher hn Porrosht nos shiyokõr erze kuche uje de poõrc hn de hnɨmichkite. 13Sehe tuu uhulo olak eyuwo tɨsĩ̵r. ¿Je om uje tɨmcharrza orar sapur Porrosht hn ye lajuwe lehetape? Ye ompe. 14Ich nos ochuuna uje ich mĩ̵hnɨk uje hnakɨrbich iimɨhɨ lakĩ̵rt, 15per par tɨmcharrza ich om uje ɨr akĩ̵rt berzak pork ich ma ɨhĩ̵rt par ɨre. Porrosht ɨshɨm wate akĩ̵rt par sajuwe deheta. 16Kɨmɨjɨ olak yeẽk ye nahmũr uje oyiyokorãha oso oyuhu ɨtsorz ich tyenɨj chɨraha uje nos wɨr Porrosht aabo hn õryok eyuwo ɨtsye. 17Titɨm olak. Ye tahmũrpe erze uje ahakõrlo. Uje akɨshlo olak owich ich ye ahakõrlope uje ich om. Ahakõrlo uje ich mɨhnũwo. 18Wap sehe titɨm olak uje shish tukunt uje akɨshlo olak owich ich eheklo olak. Ye tokotiispe erze uje shish otatɨm yok. 19Shɨ eheklo olak heke Porrosht shuu ɨmeheeych uje yeniipo olak ehet uje õr Porrosht aabo pisho. 20Uje akɨshlo olak owich par uje ahakõrlo Santa Cena ich ye Santa Cenape ese uje ahakõrlo, 21pork uje terɨhɨ orta par uje aaklo wap ich ekutɨrãha olak erze oposo par uje elɨlo. Ye anemlo erze yewope par uje otew toy. Uhulo iyehi õr. Shɨ õr iyuwo sẽhi õr, hn olak yet de uje shuu yɨkɨch sẽhi ɨre. 22Olak ihyuwo de par uje aakɨhɨlo hn ehelo. Uhulo erze Porrosht aabo yewo shɨ ɨtso uje ye õr jukur, hn uhulo opook erze uje õr losuhlaabo. ¿Titɨm olak latɨkpo? Ye ompe uje titɨm olak uje ahakõrlo uje ich om. 23Ich titɨm olakpo ahnũwo uje tãra eyok Ɨrhĩch uje titɨm olakni. Shɨyehe wɨchɨ dɨhlakkite uje ehn yahpaa Judas dosɨm eyok Ɨrhĩch Jesús erze oso uje otsɨtak ɨre hn Jesús chishew ese pan. 24Nɨhna Porrosht hn sehek. Tatɨm õr ɨm: —Nãhu yok pẽro. Tokosɨm yok ahnũwo oso pork tyenɨj tɨkɨtɨhɨ olak. Ahakõrlo uhulo ɨtsorz par uje olak eyucha yok.— 25Uje ich nos oteku hn Jesús chishew asa basta uje otich de ehet hn tatɨm õr ɨm: —Ele otich uje de ana basta ehet shɨ tɨteẽta ahnũwo ahwoso ahlo uje titɨm olak pork tyenɨj tɨkɨtɨ hn parmɨsta noshɨ. Uje ahakõrlo ich uhulo ɨtso ese uje tiyokõrke hn ehelo ese otich nehe ich tyenɨj olak eyucha yok.— 26Uje elɨlo ese pan hn ehelo ese otich uje de asa basta ehet ich uhulo ɨmeheeych uje eyok Ɨrhĩch ɨshɨ õr hnɨtewɨhɨ Porrosht ahɨrkite. Shish ahakõrlo nehech eyok Ɨrhĩch cheeshpo nehe. 27Uje yeẽk shiyokõr uje ich mɨhnũwo hn ye nɨshiipe hn tew ese pan hn ɨhɨ ese otich uje de asa basta ehet wɨchɨ shɨ shiyokõr mɨhnɨkĩ̵hɨ eyok Ɨrhĩch ɨr ɨkiyo hn ɨr armɨsta. 28Heke uje ehn yahpaa odoho Santa Cena ich tyenɨj uhu olak eyuwo tɨsĩ̵r wap kɨmɨjɨ ahakõrlo uje mĩ̵hnɨk o kɨmɨjɨ ye ahakõrlope. Kɨmɨjɨ ahakõrlo uje mĩ̵hnɨk hn ye enshiilope ich ye ompe uje ehelo asa Santa Cena. 29Ese uje tew ese pan hn ɨhɨ ese otich uje de asa basta ehet hn ye duhu deyuwo tɨsĩ̵rpe uje Cristo tooho par ɨre, wɨchɨ tew ese pan hn ɨhɨ ese otich shuu ɨtsorz par uje shuu Porrosht sepyẽr ɨre. 30Heke ich olak kɨhniya uje ye olak ukũrbɨrsh, hn yewo õr permo, hn olak nohmɨramo otoy. 31Per kɨmɨjɨ yuhu eyok eyuwo tɨsĩ̵r wap kɨmɨjɨ yiyokõrlo uje mĩ̵hnɨk o kɨmɨjɨ ye yiyokõrlope par uje yɨnshiilo eyok ich ye eyok Ɨrhĩch lepyẽr eyokpe. 32Deeych yet nehe hn eyok Ɨrhĩch teychɨm eyok kɨmɨjɨ yiyokõrlo uje om o kɨmɨjɨ yiyokõrlo uje mĩ̵hnɨk. Kɨmɨjɨ yiyokõrlo uje mĩ̵hnɨk ich wɨchɨ sepyẽr eyok par uje ye yukwĩya erze ĩ̵rmo oso uje otĩ̵r urhuta bahluta ehet nehe. 33Pɨshɨbo watsaklo, heke titɨm olak. Uje akɨshlo olak owich par uje aaklo ich tyenɨj anemloye par uje nos aaklo. 34Kɨmɨjɨ yeẽk chɨhɨ olak ehet uje ɨr iyuwo sẽhi ich tyenɨj taakɨhɨ lahuch wap. Heke uje akɨshlo olak owich ich ye uhulo Porrosht depyẽr olak. Uje tekɨrɨhɨ olak nehe hn titɨm olak nos wɨr kuche yewo uje de asa olak hutɨta uje asɨmlo yokni par uje atɨmlo yok.

will be added

X\