1 CORINTIOS 10

1Pɨshɨbo watsaklo, sehe titɨm olak uje tokolɨhɨ eyoklo poruwo wɨshkite. Nos oyehe asa ukuhurrza nẽr uje Porrosht shuu iyeebe, hn nos ochɨkãha asa onoota bahluta ehet waa je iich otsɨɨ Mar Rojo. 2Nos wɨr õr ɨre shɨ ɨtso uje otohɨrm orĩ̵hɨ asa ukuhurrza ehet uje oyehe nẽr hn shɨ ɨtso uje otohɨrm orĩ̵hɨ asa onoota bahluta ehet par uje õya Moisés. 3Nos wɨr õr ɨre otew erze oposo uje Porrosht ɨshɨm õr, 4hn nos wɨr õr ɨre oho ese awɨt uje Porrosht ɨshɨm õr uje tãra ese kojach. Ese kojach shɨ ɨtso uje ĩya õr uje awɨt tãra uje ohno. Ese kojach wɨchɨ shɨ ɨtso Cristo. 5Per ma okɨhniya oshiyokõr uje Porrosht ye nahmũrpe heke shuu otooho wahachkite hnɨmich uje ɨsa. 6Erze kuche mɨhnũwo uje tĩ̵r õr shuu yɨraha uje ye ompe yahmũr erze kuche mɨhnũwo yuhu eyok ɨtso õr, 7heke olak ye ompe uje eeychãhalo kojano po uhu olak ɨtso õr. Porrosht ahwoso tata shuu ɨtsorz ɨm: —Erze oso otsakɨr par uje otaak hn oho hn oyehet par uje oshiyokõr weyla hn oshiyokõr mɨhnuwõhoye.— 8Erze kuche shiyokorãha eyok uje ye ompe hnakɨrbo hn tɨmcher oshiyokorĩ̵hɨye uje mĩ̵hnɨk, hnii otorãhaye, hnii hnakɨrbo hnakɨrbo õhiye ahɨr, hnii tɨmcher tɨmcher õhi yẽr ahɨr, hnii nos wɨr kuche uje ɨtso wɨr. Erze israel oso õr poruwo wɨshɨ oshiyokõr oshuu ɨtsorzkite heke shiyehe wɨchɨ deeych hn beynti tre mil oso otoy. 9Deeych yet hn yewo otsepɨ eyok Ɨrhĩch hn echĩ̵re ches õr shuu okɨhniya otoy. Ye epɨlo eyok Ɨrhĩch uhu olak ɨlo õr. 10Ye eyehnɨmlo Porrosht uhu olak ɨlo erze uje ochinehnɨm Porroshtkite heke Porrosht ɨr anjel tĩ̵r õr hn shuu õr shuu otoy. 11Nos wɨr erze kuche uje tokolɨhɨ erze eyok poruwo wɨshkite wɨr par shuu yɨrahalo uje ye ompe uje yiyokõrlo erze mɨhnũwo uje oshiyokõrkite oshuu ɨtsorz. Porrosht shuu ochichew lahwoskite par uje oshiyokorãha eyok uje yesh eyok ɨka uje yej terɨhɨ ĩ̵rmo uhurc. 12Heke ese uje narim ɨre pork chɨbɨte uje yelɨj duhu ɨre ɨlo uu ɨr poruwo wɨshɨ oshiyokõrkite tyenɨj tɨbey ɨre par uje ye niyokõr duhu ɨre ɨlo õr. 13Ye shɨ olakpe uje erze kuche tĩ̵r olak par uje shuu ahakõrlo uje ich mɨhnũwo pork erze uje tĩ̵r olak tĩ̵r oso yewo toy. Porrosht wɨchɨ uje shish tɨbey olak. Yelɨj duhu erze kuche mɨhnũwo tĩ̵r olak uje ich dospa nehech ye olak pwele par uje olak ewenta, per uje erze kuche mɨhnũwo tĩ̵r olak par uje sehe duhu ahakõrlo uje mĩ̵hnɨk ich wɨchɨ takashɨm olak par uje olak pwele atokolɨhɨlo erze uje ich mĩ̵hnɨk. Heke olak pwele ahamlo erze kuche mɨhnũwo hn ye ahakõrlo. 14Pɨshɨbo watsaklo, heke titɨm olak par uje ahamlo erze kojano po uje oso oteeychãha par uje ye eeychãhalo toy. 15Titɨm olak uje olak eykdeyo, uhu olak eyuwo tɨsĩ̵r kɨmɨjɨ ũru erze uje titɨm olakɨke. 16Uje yooholo ese uva otich uje de asa basta ehet ich yɨna Porrosht hn eyok eyucha uje Jesús tooho krus eeychkite hn ɨr armɨsta noshɨ par uje ɨshɨ eyok hnɨtewɨhɨ Porrosht ahɨr. Uje yahu ese pan ich eyok eyucha Cristo ɨr ɨkiyo uje ich dospa uje tooho krus eeychkite. 17Eyoklo kɨhniya uje yahulo ese pan uje shɨ sohmɨra, heke eyok ɨkiyo shɨ ɨtso uje sohmɨra, pork eyok Cristo ɨr ɨkiyo pork shiyehe wɨchɨ ese pan uje yahulo yakɨshlo. 18Uhu olak eyuwo tɨsĩ̵r erze israel oso. Uje otew erze loshɨpo uje oshuu hn ochɨbɨte altar eeych par oshɨmɨhɨ Porrosht ich shɨ ɨtso uje otaakɨhɨ Porrosht ahɨr. 19Uje titɨm olak tuu ɨtsorzni ich ye tɨbɨtpe uje erze kojano po wɨr Porrosht. Wɨr ye latɨkɨsh, hn erze loshɨpo ẽro uje oshuu hn oshɨmɨhɨ erze porrosht kɨnãho uje kojano po wɨr ye latɨkɨsh. 20Uje titɨm olak uje wɨr ye latɨkɨsh ich shɨ sehe titɨm olak erze uje ye odɨraha Porroshtpe oshuu erze loshɨpo par uje oshɨmɨhɨ erze kojano po per ich shɨ oshɨmɨhɨ demonyo, ye odosɨmɨhɨ Porroshtpe. Heke ye meylo õr uje oteeychãha erze kojano po pork ye tahmũrpe uje meylo erze demonyo. 21Ich om uje ehelo ese otich uje de asa basta ehet uje oshiyokõr Santa Cena per ye ompe etĩ̵rlo ese owich par ehelo ese otich uje oho par uje oteeychãha demonyo. Ich om uje elɨlo ese pan uje oshiyokõr Santa Cena per ich ye ompe uje etĩ̵rlo ese owich par elɨlo erze oposo uje oshiyokõr õr ahamich par demonyo. 22¿Je om uje yiyokõrlo yuhulo ɨtsorz hn yuhulo Porrosht chesdelo? ¿Je eyok ukurbo sowe ɨre? 23Sehe titɨm olak. Nos eyok pwele yiyokõrlo uje shɨ eyok yahmũr hn ye yiyuwe leype per ye nos wɨr kuche takashɨm eyoklope. Eyok pwele yiyokõr uje shɨ eyok yahmũr per ye nos erze kuche duhu eyok ɨluu ompe ɨlo eyok Ɨrhĩch. 24Ye ompe uje yeẽk shɨ shuu deyuwo tɨsĩ̵r uje ich om par ɨre. Tyenɨj shuu deyuwo tɨsĩ̵r uje ich om par yewo toy. 25Etĩ̵rlo ese owich uje ochiwãha kuche ẽro par uje eylo hn elɨlo. Ye atɨmlo õr on: —¿Tãra ɨraãpo?— par uje ye uhu olak eyuwo tɨsĩ̵r uje erze ẽro ich mɨhnũwo, 26pork Porrosht wɨchɨ uu ĩ̵rmo yɨnsɨrc, hn nos wɨr kuche uje de ehet wɨchɨ shiyokõr. 27Kɨmɨjɨ yeẽk uje ye Porrosht aappe tatɨm owa par uje aakɨhɨ ɨre ahɨr, kɨmɨjɨ ahmũr ich bo mẽya ɨre. Ew uje ɨre ɨshɨm owa. Ye atɨm ɨre je shɨ duhu tãra ɨraãpo erze loshɨpo ẽro kɨmɨjɨ wɨr uje oshɨmɨhɨ kojano po par uje ye uhu eyuwo tɨsĩ̵r uje wɨr mɨhnũwo. 28Per kɨmɨjɨ yeẽk tatɨm owa ɨm: —Oshɨmɨhɨ erze loshɨpo ẽro kojano poko,— heke ye ompe uje ew pork wɨchɨ tatɨm owaka shuu ɨtsorz. Ye ompe par uje uhu ɨre shiyokõr mɨhnũwo pork wɨchɨ chɨbɨte uje Porrosht ye nahmũr uje tew. 29Wɨchɨ shuu deyuwo tɨsĩ̵r uje wɨr ich mɨhnũwo ye owape uje uhu eyuwo tɨsĩ̵r, heke ye ompe uje ew erze kuche ẽro hn uhu ɨre shiyokõr uje ich mĩ̵hnɨk. ¿Ɨnaapo heke ye yok pwelpe par taw shɨ pork wɨchɨ shuu deyuwo tɨsĩ̵r uje wɨr ich mɨhnũwo? Par yok ich ye mɨhnũwope uje taw erze kuche ẽro. 30Kɨmɨjɨ tɨkɨna Porrosht uje taw erze kuche ẽro ¿ɨnaapo uje yewo ochɨbɨte uje tiyokõr uje mĩ̵hnɨk? 31Nos wɨr kuche ẽro uje elɨlo hn uje ehelo hn nos wɨr kuche yewo uje ahakõrlo ich shish tyenɨj olak narim Porrosht uhulo dich. 32Ye uhulo erze israel oso oniyokõr uje ich mĩ̵hnɨk hnii erze dihipo kɨnãho hnii erze Porrosht aabo. 33Shɨ tyenɨj ahakõrlo uhulo olak ɨlo yok. Nos tiyokõr wɨr kuche par uje tuu oso õr aho kɨɨsɨhɨ yok. Ye tiyokõrpe erze uje ich om shɨ par yok. Tiyokõr uje ich om par nos wɨr erze yewo toy par uje tuu omasaha par Porrosht aabo toy.

will be added

X\