1 CORINTIOS 1

1Yok Pablo. Porrosht chiihla yok par tomsaha par yok Jesucristo ɨr apóstol shɨ pork sahmũr chiihla yok shuu ɨtsorz. Eyok leshɨbich de pahɨr iich otsɨɨ Sóstenes. 2Tichew ana hutɨta par tokosɨm olak uje olak Porrosht aabo uje ebuhulo ese dɨt Corinto. Porrosht chiihla olak par ɨr aabo pork Jesucristo ɨshɨ olak hnɨtewɨhɨ Porrosht ahɨrkite. Chiihla olak par uje ye ahakõrlo uje ich mɨhnũwo ɨtso uje chiihla erze yewo uje ode lekɨtiyo uje ye olotiis eyok Ɨrhĩch Jesucristope. Wɨchɨ wɨr õr Ɨrhĩch hn eyok Ɨrhĩch toy. 3Sehe tuu Porrosht uu eyok Deych hn eyok Ɨrhĩch Jesucristo odosɨr olak hn oduhu olak aho kɨɨs. 4Sehe titɨm olak uje shish tɨkɨna Porrosht par olak pork Porrosht sosɨr olakni pork ye otiislo Jesucristope. 5Porrosht shuu olak ɨkɨrĩt ɨhĩ̵rtpa uje olak de nãhu ĩ̵rmo pork wɨchɨ shuu olak dɨtuwo par anɨmɨrãhalo ɨr ahwoso hn shuu olak dɨtuwo par nos erahalo uje ich ũru 6pork uje oyitɨm olak Cristoni ich ahmũrlo heke amsahalo par Porrosht aabo. Erze om uje yesh ahakõrlo ich shuu ɨmeheeych uje olak Porrosht aabo. 7Porrosht nos shuu olak dɨtuwo par uje ahakõrlo ɨr ɨbiyo uje ehn yesh anemlo ese deeych uje eyok Ɨrhĩch Jesucristo cheeshpo nehe. 8Eyok Ɨrhĩch Jesucristo wɨchɨ uje tɨbey olak nehech terɨhɨ uhurc, hn ese deeych uje etĩ̵rlo ɨre ahɨr nehe ich ye olak hnɨtew chɨhɨ Porrosht ahɨrpe. 9Porrosht shish shuu yakaha uje ɨre tata. Wɨchɨ uje chiihla olak par uje wɨchɨ olak ihyẽrak ɨr ijɨt Jesucristo uu eyok Ɨrhĩch. 10Pɨshɨbo watsaklo, titɨm olak. Eyok Ɨrhĩch sahmũr uje olak eyuwo ɨtsye pork ye ompe uje ahakosloye hn uhu olak kãra. Shɨ tyenɨj nos akɨshlo olak eyuwo par uje nos olak pwele ahakõrlo kuche. 11Pɨshɨbo watsaklo, shɨ titɨm olak ahnũwo pork Cloé ɨr iiso otatɨm yok uje shish ahakosloye. 12Titɨm olak uje ahakosloye pork olak yewo ode uje otata otsɨɨ: —Oyahmũr Pablo,— hn yewo otsɨɨ: —Oyahmũr Apolos,— hn yewo otsɨɨ: —Oyahmũr Pedro,— hn yewo otsɨɨ: —Oyahmũr Cristo.— 13Eyok uje eyok Porrosht aabo ich eyok ɨtso Cristo ɨr yũhurrza. ¿Je olak yeẽk dehek Cristo ɨr yũhurrza duhu pɨkaabo? Ye odehekpe. ¿Je odowɨsh Pabloni odɨbɨte krus eeych par uje ɨshɨ olak hnɨtew? Ye odowɨshpe. ¿Je uhu otohɨrm olak onĩ̵ra Pablo iich? Ye onĩ̵rape. 14Tɨkɨnshɨp Porrosht uje ye tokohɨrm olak yeẽk petɨkni. Shɨ tokohɨrm Crispo hn Gayo, 15heke nĩhyok uje yeẽk tata uje otohɨrm olak yeẽk ochĩ̵ra piich. 16Shɨ tokohɨrm Estéfanas hn nos wɨr ɨr iiso per ich tɨkey kɨmɨjɨ yewo ochɨhɨ uje tokohɨrm õrni. 17Cristo ye duhu tɨkɨrẽt petɨkni par tokohɨrm oso. Shɨ shuu tɨkɨrẽt par tanɨmɨrãha ɨr ahwoso titɨm oso uje ɨre ɨshɨ õr hnɨtewɨhɨ Porrosht ahɨr. Titɨm õr tĩ̵ra ahwoso uje ochɨraha, ye tĩ̵ra ahwoso uje ye odɨrehepe. Kɨmɨjɨ titɨm õr tĩ̵ra ahwoso kɨnãho ich ye odɨrehepe uje Cristo tooho krus eeych heke tokole ɨtso uje ye Cristo ukũrbɨrsh par shuu omasaha par Porrosht aabo. 18Sehe titɨm olak uje nos wɨr oso uje tyenɨj otĩ̵r urhuta bahluta ehet nehe otata erze ahwoso uje Cristo tooho krus eeychkite otsɨɨ: —Ye jukur.— Mahn par eyok uje eyok owich de Porrosht ahɨr ich bale uje Cristo tooho krus eeych hn Porrosht ukurbo shuu yomsaha par ɨr aabo. 19Porrosht ahwoso tata shuu ɨtsorz ɨm: —Porrosht sole: “Erze oso uje ye õr paabope uje õr eykdeyo ich tuu õr eyuwo ye jukur, hn erze uje ich õr dɨtuwo tuu ye õr ɨbiyo jukur.”— 20Erze uje ich õr eykdeyoho nãhu ĩ̵rmo ɨshujãro hn erze uje ochichew õr hute hn erze uje ochɨraha ochiilehet ¿latɨk tokolɨhɨ õr? Porrosht shuu õr eyuwo shɨ ɨtso uje õr totihlo. 21Nos wɨr oso uje ich õr eykdeyo shɨ otsẽrza kuche uje de nãhu ĩ̵rmo per Porrosht ye duhu odɨraha ɨrpe. Porrosht ich eykdeyo. Shuu yanɨmɨrãha lahwoso yitɨm õr uje Cristo tooho krus eeych par ɨshɨ õr hnɨtewɨhɨ Porrosht ahɨr per ochɨbɨte uje ich ye jukur uje Cristo shiyokõr, per Porrosht shuu nos omasaha par ɨr aabo erze uje ye olotiis Cristope. 22Nos wɨr israel oso otsapur yarta uje ye latɨk pwele niyokõr par uje oteychɨm par uje ye olotiis Cristope, hn erze griego sehe otẽr wɨr ahwoso uje õr eykdeyo otata par uje ye olotiis, 23per õryok shɨ oyanɨmɨrãha uje Cristo tooho krus eeychkite par uje ɨshɨ õr hnɨtewɨhɨ Porrosht ahɨr. Erze israel oso otsotiis erze ahwoso heke õryok ahwoso ich shɨ ɨtso uje kojach shuu õr hnɨte hn shuu õr kay, hn erze oso uje ye õr israel yewope wɨr ochɨbɨte uje erze õryok ahwoso ich shɨ ɨtso totihlo õr ahwoso. 24Per eyok uje Porrosht chiihla eyok kɨmɨjɨ eyok israel oso o kɨmɨjɨ eyok dihipo kɨnãho, par eyok erze uje Cristo shiyokõr ich shuu ɨmeheeych uje Porrosht ukurbo deyo de hn ich ɨr eykdeyo. 25Oso ode uje otata uje Porrosht ye eyuwĩ̵rsh per ɨr eyuwo ich ma deyo je nos wɨr oso, hn ochɨbɨte uje ye ɨr ukũrbɨrsh per Porrosht ich ma ukurbo deyo de je nos wɨr oso. 26Pɨshɨbo watsaklo, uhu olak eyuwo tɨsĩ̵r uje Porrosht chiihla olak par olak ɨr aabo. Ye olak kɨhniyape uje oso otata hn ochɨbɨte uje olak eykdeyo, hn olak arhaabo uje õr bahluwoho ĩ̵rmo, hn olak arhaabo uje õr ɨhĩ̵r deyo õr aabo. 27Erze uje ich õr eykdeyo ochɨbɨte uje ye jukur uje Cristo tooho krus eeych per Porrosht chiihla erze oso uje yewo otata uje ye õr eyuwĩ̵rsh par uje shuu wɨr opook erze uje õr eykdeyo, hn erze uje õr ukurbo deyo de otata uje Cristo tooho krus eeych pork ich ye ɨr ukũrbɨrsh per Porrosht chiihla oso uje ye õr ukũrbɨrsh par ɨr aabo par shuu wɨr opook erze uje õr ukurbo deyo de. 28Erze oso uje yewo ochɨbɨte uje wɨr ye õr jukur wɨr uje Porrosht chiihla õr par ɨr aabo, hn erze oso uje yewo ye onahmũr õrpe wɨr uje Porrosht chiihla õr. Porrosht chiihla õr shuu ɨtsorz par uje shuu erze yewo õr eyuwo ye jukur, 29heke ich nĩhyok yeẽk pwele narim ɨrehe Porrosht ɨle ɨkɨch. 30Porrosht wɨchɨ uje ɨshɨm eyok ɨkɨrĩt pork ye yotiis Jesucristope. Shɨ Cristo wɨchɨ uje shuu eyok eykdeyo. Wɨchɨ uje shuu eyok Porrosht aabo, hn shish shuu eyok ɨluu ma om, hn ɨshɨ eyok hnɨtewɨhɨ Porrosht ahɨr, 31heke Porrosht ahwoso tata shuu ɨtsorz ɨm: —Uje sehe yeẽk narim ɨre o narim oso yewo ich ye ompe. Tyenɨj shɨ narim eyok Ɨrhĩch.—

will be added

X\