Mateo 2

1Jo̱ calɨséngˋ Jesús fɨˊ co̱o̱ˋ fɨɨˋ e siiˋ Belén e néeˊ lɨ˜ se̱'ˊ Judea. Jo̱ ie˜ jo̱ lɨ́ɨngˊ jaangˋ dseaˋ i̱ siiˋ Herodes dseata˜ dseaˋ féng'ˊ quiá'ˉ jalé'ˋ fɨɨˋ e seaˋ fɨˊ jo̱. Jo̱ ie˜ jo̱b cajo̱ caguilíingˉ fɨˊ Jerusalén tú̱ˉ 'nɨˊ mɨ́ɨng'˜ dseaˋ i̱ jmɨtɨ́ɨngˋ quiá'ˉ jaléng'ˋ nʉ́ʉˊ, jo̱ i̱ dseaˋ do huí̱i̱bˉ eáangˊ jalíiñˉ fɨˊ lɨ́'ˆ lɨˊ guo'ˋ ieeˋ. 2Jo̱ mɨ˜ caguilíiñˉ fɨˊ Jerusalén, cajmɨngɨ́'rˉ jaléng'ˋ i̱ dseaˋ seengˋ fɨˊ jo̱, jo̱ cajíñ'ˉ: —¿Jnang˜ i̱ dseata˜ dseaˋ féng'ˊ quiá'ˉ dseaˋ Israel i̱ nɨcalɨséngˋ do? Dsʉco̱' nɨcaneeng˜naa' nʉ́ʉˊ quiá'rˉ fɨˊ lɨ́'ˆ lɨˊ guo'ˋ ieeˋ, jo̱ba' ne˜naa' e nɨcalɨséiñˋ jo̱ lana nijáaˊnaa' e nijmiféng'ˊnaa're. 3Jo̱ mɨ˜ canúuˉ dseata˜ Herodes e júuˆ jo̱, dsíng'ˉ joˋ tiiˉ seeiñˋ, jo̱guɨ lajo̱bɨ cajo̱ jaléng'ˋ dseaˋ i̱ seengˋ fɨˊ Jerusalén. 4Jo̱ba' i̱ dseata˜ do catǿ'rˉ jaléng'ˋ fii˜ jmidseaˋ quiá'ˉ dseaˋ Israel có̱o̱'˜guɨ jaléng'ˋ tɨfa'ˊ quiá'ˉ júuˆ quiʉ'ˊ ta˜ quiá'ˉ dseaˋ Israel jo̱ cajmɨngɨ́'ˉreiñ' do jo̱ cajíñ'ˉ: —¿Jie˜ fɨˊ lɨ˜ nilɨseengˋ i̱ Mesías? 5Jo̱ba' cañíiˋ i̱ dseaˋ do quiá'ˉ i̱ dseata˜ do jo̱ casɨ́'ˉreiñ': —I̱ dseaˋ íˋ nilɨseeiñˋ fɨˊ co̱o̱ˋ fɨɨˋ e siiˋ Belén e néeˊ lɨ˜ se̱'ˊ Judea; dsʉco̱' lajo̱b cajme'ˊ jaangˋ dseaˋ i̱ café'ˋ cuaiñ˜ quiá'ˉ Fidiéeˇ malɨɨ˜guɨ eáangˊ mɨ˜ cajíñ'ˉ lala: 6E fɨɨˋ pí'ˆ e siiˋ Belén do néeˊ fɨˊ lɨ˜ se̱'ˊ Judea, dsʉ' e fɨɨˋ jo̱ jaˋ 'ga'ˊ lɨˊ niingˉ lajeeˇ lajalé'ˋ fɨɨˋ e seaˋ fɨˊ jo̱, dsʉ' fɨˊ jo̱b lɨ˜ nigüɨ'ɨ́ɨngˊ jaangˋ dseata˜ dseaˋ féng'ˊ i̱ nicá̱ˋ nifɨˊ quiá'ˉ jaléng'ˋ dseaˋ quiéˉe, dseaˋ i̱ lɨ́ɨngˊ dseaˋ Israel. 7Jo̱ba' i̱ dseata˜ Herodes do catǿ'rˉ jaléng'ˋ i̱ dseaˋ i̱ jmɨtɨ́ɨngˋ quiá'ˉ jaléng'ˋ nʉ́ʉˊ do fɨˊ co̱o̱ˋ lɨ˜ jaˋ 'ga'ˊ lɨˊ níˋ dseaˋ jo̱ cajmɨngɨ́'rˉ dseaˋ do e˜ í'ˋ ngóoˊ mɨ˜ cajnéngˉ i̱ nʉ́ʉˊ do. 8Jo̱ mɨ˜ cangɨ́ˋ jo̱, i̱ dseata˜ do casíiñˋ i̱ dseaˋ íˋ fɨˊ Belén jo̱ casɨ́'ˉreiñ' do lala: —Güɨlíingˉna' fɨˊ jo̱, jo̱ güɨjmidseáangˇ óoˊna' lajɨˋ e lí'ˋna' quiá'ˉ i̱ jiuung˜ do; jo̱ mɨ˜ niguiéng'ˊna're, jmée'˜na' jnea˜ júuˆ, jo̱b cuǿøngˋ nii˜i e nijmifén'ˊnre cajo̱. 9Jo̱ mɨ˜ cató'ˊ sɨ́'ˋ dseata˜ Herodes i̱ dseaˋ do lajo̱, jo̱ba' catam'ˉtu̱iñ' do fɨˊ ngolíiñˉ. Jo̱guɨ i̱ nʉ́ʉˊ i̱ cangáiñˉ jéengˊ do, ngóoˊbiñ' do laco̱' ngolíiñˉ, jo̱ co̱o̱bˋ mɨ˜ caje̱ˊ i̱ nʉ́ʉˊ do fɨˊ yʉ́'ˆ 'nʉ́ʉˊ lɨ˜ guiing˜ i̱ jiuung˜ do. 10Jo̱ i̱ dseaˋ do eáamˊ iáangˋ dsíirˊ dsʉ' e níiñˉ i̱ nʉ́ʉˊ do. 11Jo̱ mɨ˜ caguilíiñˉ fɨˊ e 'nʉ́ʉˊ do, dsifɨˊ ladob cangotáaiñ'˜ e fɨˊ dsíiˊ sɨnʉ́ʉˆ do jo̱ cangáiñˉ i̱ jiuung˜ do có̱o̱'˜ niquiáiñ'ˆ Yáˆ.Jo̱ casí'rˋ uǿˉ jnir˜ fɨˊ quiniˇ i̱ jiuung˜ do jo̱guɨ canaaiñˋ e jmiféng'ˊneiñ' do cajo̱. Jo̱ mɨ˜ calɨ́ˉ e cajmérˉ e jo̱, jo̱ caneáarˊ guóoˊ quiá'rˉ e quie̱rˊ do, jo̱ cacuø'rˊ i̱ jiuung˜ do cunéeˇ có̱o̱'˜guɨ sʉ̱ˋ e 'mo'ˆ eáangˊ có̱o̱'˜guɨ cuí̱i̱ˊ e jlo'ˆ jmeafɨɨˋ cajo̱. 12Jo̱ mɨ˜ cangɨ́ˋ jo̱, caquɨm'ˉtu̱ i̱ dseaˋ do fɨˊ góorˋ. Dsʉ' fɨˊ lɨ˜ jiéb'ˋ caquɨiñ'ˉ do dsʉco̱' Fidiéeˇ cajmea'ˊbreiñ' júuˆ lajeeˇ güɨɨiñ'ˋ do e jaˋ cuǿøngˋ niquɨng'ˉtu̱iñ' do fɨˊ lɨ˜ guiing˜ i̱ dseata˜ Herodes do. 13Jo̱ mɨ˜ cangɨ́ˋ e nɨcangolíingˋ i̱ dseaˋ i̱ jmɨtɨ́ɨngˋ quiá'ˉ jaléng'ˋ nʉ́ʉˊ do, jo̱ lajeeˇ güɨɨngˋ i̱ Séˆ do, caleábˋtu̱ caquɨiñˊ jaangˋ ángel quiá'ˉ Fidiéeˇ. Jo̱ i̱ ángel do casɨ́'rˉ i̱ Séˆ do jo̱ cajíñ'ˉ: —¡Séˆ, ráan'ˉ jo̱ jéengˋ i̱ jiuung˜ na có̱o̱'˜guɨ niquiá'rˆ jo̱ cui̱i̱ˉna' fɨˊ Egipto! Jo̱ fɨˊ jo̱b nijá̱ˆna' cartɨˊ mɨ˜ nijmée'˜e 'nʉ́'ˋ júuˆ, dsʉco̱' i̱ dseata˜ Herodes do nɨ'náiñ'ˊ i̱ jiuung˜ na e nijngám'ˉbre. 14Jo̱ba' caráamˉ i̱ Séˆ do ladsifɨˊ lado, jo̱ uǿøˋ jo̱b cataiñ'ˉ fɨˊ e cangojéeiñˋ i̱ jiuung˜ do có̱o̱'˜guɨ niquiáiñ'ˆ do fɨˊ Egipto. 15Jo̱ dob caje̱iñˊ cartɨˊ mɨ˜ cajúngˉ i̱ dseata˜ Herodes do. Jo̱ cangojéeˊ e la e lɨ́'ˆ laco̱' calɨti˜ lají̱i̱'˜ júuˆ e cajíng'ˉ Fidiéeˇ la'eáangˊ có̱o̱'˜ jaangˋ dseaˋ i̱ café'ˋ cuaiñ˜ quiá'rˉ malɨɨ˜guɨ eáangˊ mɨ˜ cajíñ'ˉ lala: “Catǿøˉø Jó̱o̱ˋo̱ e nigüɨ'ɨ́ɨrˊ fɨˊ Egipto.” 16Jo̱ mɨ˜ calɨlí'ˆ i̱ dseata˜ Herodes do e cajmɨgǿømˋ i̱ dseaˋ i̱ jmɨtɨ́ɨngˋ quiá'ˉ jaléng'ˋ nʉ́ʉˊ do írˋ, jo̱ba' dsíng'ˉ calɨguíiñˉ; jo̱ caquiʉ'rˊ ta˜ jaléng'ˋ 'léeˉ quiá'rˉ e nidsijngáaiñ'˜ jaléng'ˋ jiuung˜ i̱ ping'ˆguɨ laco̱' tú̱ˉ jí̱ˋ i̱ seengˋ fɨˊ Belén có̱o̱'˜guɨ jaléng'ˋ jiuung˜ ping'ˆ i̱ seengˋ fɨˊ fɨɨˋ e néeˊ lacúng'ˊ lajíingˋ e fɨɨˋ jo̱ i̱ ngolíingˉ í'ˋ lajo̱ cajo̱. Jo̱ cajngam'ˊbre lɨ́'ˆ laco̱'guɨ jí̱i̱'˜ ji̱i̱ˋ e cajíng'ˉ i̱ dseaˋ i̱ jmɨtɨ́ɨngˋ quiá'ˉ jaléng'ˋ nʉ́ʉˊ do. 17Jo̱ có̱o̱'˜ e nab calɨti˜ e júuˆ e cajme'ˊ jaangˋ dseaˋ i̱ café'ˋ cuaiñ˜ quiá'ˉ Fidiéeˇ malɨɨ˜guɨ eáangˊ i̱ calɨsíˋ Jeremías mɨ˜ cajíñ'ˉ lala: 18Jo̱ canʉ́'ˋ óoˋ jaangˋ dseamɨ́ˋ fɨˊ co̱o̱ˋ fɨɨˋ e siiˋ Ramá, jo̱ dsíng'ˉ quɨ'rˊ jo̱guɨ óorˋ; Raquéebˆ siiˋ i̱ dseamɨ́ˋ do jo̱ quɨ'rˊ uíi'˜ jiuung˜ quiá'rˉ dsʉco̱' nɨcajúmˉbing', jo̱ jaˋ iiñ˜ nimɨ́iñˉ co̱' dsíng'ˉ lɨjiuung˜ dsíirˊ. 19Jo̱ mɨ˜ cangɨ́ˋ e cajúngˉ i̱ dseata˜ Herodes do, fɨˊ Egipto táangˋ i̱ Séˆ do lajeeˇ jo̱. Jo̱ co̱o̱ˋ ya̱'ˊ lajeeˇ e güɨɨiñˋ, caquɨ́ɨmˉtu̱r jaangˋ ángel quiá'ˉ Fidiéeˇ, jo̱ íˋ casɨ́'rˉ Séˆ jo̱ cajíñ'ˉ lala: 20—Séˆ, ráan'ˉ, jo̱ quɨ́ɨng'˜tu̱' có̱o̱'˜ i̱ jiuung˜ na có̱o̱'˜guɨ niquiá'rˆ fɨˊ lɨ˜ se̱'ˊ Israel, co̱' lana nɨcajúmˉ i̱ lamɨ˜ iingˇ jngáng'ˉ i̱ jiuung˜ na. 21Jo̱ba' lajo̱b cajméeˋ Séˆ, caráamˉbre jo̱ catǿˉbre i̱ jiuung˜ do có̱o̱'˜guɨ niquiáiñ'ˆ do fɨˊ lɨ˜ se̱'ˊ Israel. 22Jo̱ dsʉ' mɨ˜ calɨñirˊ e Arquelao nɨguiiñ˜ lɨ́ɨiñˊ dseata˜ dseaˋ féng'ˊ quiá'ˉ lɨ˜ se̱'ˊ Judea eáangˆ quiá'ˉ i̱ tiquiá'rˆ dseata˜ Herodes do, jo̱ba' eáamˊ cafǿiñ'ˊ jo̱ joˋ cangáiñ'ˉ fɨˊ jo̱, co̱' Fidiéeˇ cajme'ˊtu̱reiñ' júuˆ lajeeˇ güɨɨiñˋ e jaˋ cuǿøngˋ nidsilíiñˋ fɨˊ jo̱. Jo̱ba' fɨˊ lɨ˜ se̱'ˊ Galileab cangolíiñˋ. 23Jo̱ mɨ˜ caguiéng'ˉ Séˆ fɨˊ lɨ˜ se̱'ˊ Galilea, jo̱ cangogüeárˋ fɨˊ co̱o̱ˋ fɨɨˋ e siiˋ Nazaret e néeˊ fɨˊ jo̱. Jo̱ calɨ́ˉ e na e laco̱' calɨti˜ jalé'ˋ júuˆ e café'ˋ dseaˋ i̱ café'ˋ cuaiñ˜ quiá'ˉ Fidiéeˇ malɨɨ˜guɨ eáangˊ mɨ˜ cajíñ'ˉ e Jesús nilɨsiirˋ jaangˋ dseaˋ nazareno.

will be added

X\