TITOSI 3

1Alakanyisa votshe ti to va fanete ku ti veka hahatshi ka vafumeli ni ka vakoma, va fanete ku va engisa, ve zumba va di ti lulamisete kumaha mthumo wuhi ni wuhi wo lulama, 2ni ti to kha va nga ni fanelo yo womba kubiha ngu mthu hambi kuwusa mazunga, aniko va na mahe vathu va vanene, va kombako txithavo ka votshe. 3Nguko nathu kale hi ti sipumbu, ni sikanyisi, ni vatimeli va nzila, ni tikhumbi ta lotshe lixaka la minavelo yo biha, hi txi hanya kubihani ni mu kubavelanani, hi txi zondwa ngu vathu ni kuzondana athu ngu txathu. 4Kambe mbimo yi wunene ni lirando la Txizimu Muhanyisi wathu si nga ti wonekisa ka vathu, txona Txizimu txi hi ponisile, 5i singa ngu kota ya mithumo yathu ya yinene hi nga yi maha, aniko ngu mhaka ya wumbilu wa txona hi sambisilwe hi phindulwa hi txi maha vavaphya ngu mtamo wa Moya wo Sawuleka, 6awu txona Txizimu txi nga wu thela ngu kuenela txitimwi kwathu ngu Jesu Kristu Muhanyisi wathu; 7Txizimu txi mahile tiya kasiku hi txi mahwa valulami ngu mtamo wa kateko ya txona, ni kumahwa vadyi va thomba ya wutomi wo mbi guma, awu hi wu rinzelako. 8Di thembekile dipswi diya. Nanani ni lava ku u sunamisa kugondisa mhaka yiya, ti to avale va kholwako ka Txizimu va na khutala amu ka mithumo ya yinene. Atiya tina ni lisima kambe ta vhuna vathu. 9Hambana ni timhaka ta kukanetisana ka wupumbu ni kulondetela txhatxhameto ya sibongo, u txi hambana ni mazolonga ni kukanetisana ngu Mlayo, nguko eto kha ti vhuni txilo, kha ti na lisima. 10Mthu wu a vangako mibhando hagari ka makholwa, m'kawuke kamweko mwendo kumbidi; a txi lamba msana keto, u nga m'khatalele; 11nguko se ta zivaneka ti to mthu wo ngeto a wonhekile e ti ningela txiwonhoni, e ti abanisa apune. 12Mbimo yi ni no rumela Artemasi mwendo Tikikusi va txi ta kheyo kwako, ti karate u txi ni tela kheya Nikopoli, ahawa ni no ya zumba kona, yotshe mbimo ya wuxika. 13Ti karate u txi vhunetela kulongela dipfhumba da Zena, mzivi wa mlayo, ni Apolosi, kasiku va si pwatekelwi ngu txilo. 14Votshe va ka kwathu va fanete kugonda kukhutalela mithumo ya yinene, kasi kuvhuna amu si pwatekako ngutu, va si mahi sifule so mbi veka mihando. 15Va ku dingula votshe va va ku ni nani. Dingula votshe va va hi randako ngu mu ka likholo.Makatekwa a Txizimu ma na ve ni nanu motshe!

will be added

X\