TITOSI 1

1Ani Paulo, txithumi txa Txizimu, mpostoli wa Jesu Kristu, ni nga rumelwa kuhokisa vasawuleki va Txizimu kukholwani ni kuziva ditshuri diya di gondiswako ngu wukhongeli wathu, 2ngu kuthemba wutomi wo mbi guma, wu nga thembiswa, ku si nzi kuhoka timbimo to mbi guma ngu Txizimu, atxi txi si wombiko makuhu, 3atxiya kambe, ka timbimo tiya txi nga ti sikela, txi nga kombisa dipswi da txona, ka mahungu awa ni nga leletwa, madingano ni kuruma ka Txizimu Muhanyisi wathu, 4ni bhalela Titosi, mwanana wangu wa ditshuri ngu mu ka likholo, li i ku la hotshethu, ni khani: na ku navelela kateko ni kudikha, asi si tako ngu ka Txizimu ni ka Kristu Jesu Muhanyisi wathu. 5Ni ku site kheyo Kreta, kasiku u txi sala u txi lulamisa ti ti fanelako kululamiswa, ni kuveka madhota a vathangeli ka txidhoropana txihi ni txihi, madingano ni ti ni nga ku gondisa. 6Didhota dimwane ni dimwane, ku laveka di singa ni txisolo, adi i ku mwamna wa msikati mmweyo, adiya di ku ni vanana vo kholwa, avava ni mmweyo a si si kotiko ku va sola ka mhaka ya mahanyelo o biha mwendo o kanyisa. 7Mthangeli wa dibanza a fanete kuva a singa ni txisolo, ngako i ku muwoneleli wa Txizimu; ku laveka i singa wo ti kulisa, a singa ni txihenyisane, i singa disela, i singa muwusi wa mazunga, a singa ni timbiti ta dibhindu do mbi lulama. 8Ku laveka a txi ziva kuamukela vapfhumba, i di wamnene, wa kutipimela wo lulama, wa kusawuleka, wa ku ti ñola ka to biha, 9i di wo thembeka kutxhumayelani ka dipswi, e si kota kugondisa gondo yo tsana, kumweko ni kukonisa avale va zamako kukaneta. 10Ngukusa va ho vakanyisi vavangi, vanyamuwombe ni vaxengeteli, ngutungutu ka mtxawa wa vawukwera, 11avava va fanelako kumalatwa, nguko va timeta timwaya ni votshe vathu va txona; seni kambe, ngu kulava dibhindu do mbina fanelo, va gondisa ati va si faneliko kugondisa, 12Mmweyo ka vaprofeti vawe vapune a wombile a txi khene: “Vakreta yotshe mbimo i vathu va makuhu; nzihari sa tshofu, i vamahanyela-kudya.” 13Kunene wufakazi wuwa mbwa ditshuri. Ngu konaho, va kawuke ngu mtamo, kasiku ve tsana amu ka likholo, 14va si ti ningeteli amu ka mabhulo a vajudha, mwendo ka sileleto sa vathu vo hambana ni ditshuri. 15Ka vava va nga basa timbilu, sotshe si basile, aniko ka vava va nga mbi basa, ku walo txo basa: Mapimo ni livhalo lawe si wonhekile. 16Va womba ti to va txi ziva Txizimu, aniko va txi lamba ngu mahanyelo awe, nguko va nyenyeza, nzindaka milayo, kha va si koti kumaha mthumo ni wawumwewo wa wunene.

will be added

X\