VAROMA 7

1Kha mi ti zivi kani, vanathu - ni wombawomba ni va va zivako mlayo - ti to mlayo wu fuma mthu ka yotshe mbimo yi a ku ngadi a txi hanya? 2Nga toneto, wamsikati wu a nga tekwa, a sungilwe ngu mlayo ka mwamna wakwe, ngako ene a di ngadi a txi hanya; kambe ngako mwamna wakwe a di fite, a thusilwe ka mlayo wamwamna. 3Ngako a txi tekana ni mmwane wamwamna, na mwamna wakwe a di ngadi a txi hanya, a na dhanwa ku digelegele; kambe ngako mwamna wakwe a txi fa, a thusilwe mlayoni; se kha na mbi dhanwa ku digelegele, ngako a txi tekana ni mmwane wamwamna. 4Ngu nzila yo nga toneto, nanu vanathu, mi fite mlayoni ngu ditshelo da mmidi wa Kristu, ti to mi lumba mmwane, i ku wu a nga wuka ka vakufa, kasiku hi txi humisa mihando yi yi tsakisako Txizimu. 5Ngukusa, mbimo yi hi nga titi hanya ngu txithu, kunavela ka txiwonho aku ku nga ti mana mtamo ngu mhaka ya mlayo, ku ti thuma sihangoni kwathu kufela ku hi humisa mihando ya lifo. 6Kambe konkuwa hi txhatxhilwe ka mlayo, hi maneka hi di fite ngu ditshelo da ti hi nga ti sungilwe ngu tona; hi na thumela Txizimu ngu wuphya wa moya, i singa ngu mlayo wa kubhalwa wu wu nga txhipa. 7Hi na txani kani? Ina mlayo njiwonho kani? Lambi! Kambe idiku ku ti singa ni mlayo, nga ni sa txi ziva txiwonho. Ngukusa ani nga ni sa ziva ti to ku ho kunavela, idiku mlayo wu ti sa womba ti to: “U nga navele to biha”. 8Kambe txiwonho txi mani nzila ya kuningwa ngu Mlayo, txi wusa mndani kwangu tixaka totshe ta kunavela; nguko hahanze ka mlayo, kuwonha ku fite. 9Ni hanyile kale na ku singa ni mlayo; kambe, ngako wu di bwakile mlayo, txiwonho txi to wuka; 10se ani ni fa: ku txi maneka ti to mthetho wu wu nga vekelwa kuhanyisa, wu ni vangete kufa. 11Ngukusa txiwonho, txi di mani nzila ngu mhaka ya mlayo, txi to ni kanganyisa, txi ni daya. 12I di mlayo wu sawulekile, ni mthetho niwona wu sawulekile, wu lulamile, kambe mbunene. 13Se, atxi i ku txa txinene, ina txa si kota ku ni vangela lifo kani? Lambi! Txiwonho ngu txona txi nga ni vangela kufa: Ngu ku ti wonekisa nga txilo txa txinene, txi ni date kasiku txi ti kombisa ku njiwonho, na txi txi ti humelelisa ngu wotshe mtamo wa txona ngu mhaka ya mthetho. 14Ngukusa ha ti ziva ti to mlayo mbwa Moya; kambe ani ngu mtumbuluko wangu ni mthu wo xuleka, ni xavisilwe ni mahwa khumbi ya txiwonho. 15Ngukusa ati ni ti mahako kha ni ti zivi; nguko kha ni mahi ti ni ti dhundako, aniko ni maha ti ni ti nyenyako. 16Se ngako ni txi maha ti ni si ti dhundiko, na tumela ti to mlayo mbunene. 17Se hi nga ngadi ani ni mahako txilo, aniko njiwonho txi txi nga aka mndani kwangu. 18Ngukusa na ti ziva ti to ati i ku tinene kha ta aka kwangu, ni womba mmidini kwangu; nguko kulava kumaha ta tinene ni nako, aniko mtamo wa ku ti maha kha ni nga nawo. 19Nguko ta tinene ti ni ti dhundako kha ni ti mahi, aniko ni maha to biha ti ni si ti dhundiko. 20Se ngako ni txi maha to biha ti ni si ti dhundiko, hi nga ngadi ani ni ti mahako, aniko njiwonho txi txi nga aka mndani kwangu. 21Ngu konaho ni manako mlayo wuwa, ti to: mbimo yi ni lavako kumaha ta tinene, wubihi wa humelela. 22Ngukusa ni tsakela mlayo wa Txizimu ani ngu wutumbu wangu; 23kambe amu ka sihango sangu ni mana wumwane mlayo awu wu lwako ni Mlayo wu wu tsimbitisako mialakanyo yangu, wona wu ni ndindela wukhumbini ka txiwonho txi txi ku ka sihango sangu. 24Dikhombo dangu! I mani a no ni thusa ka mmidi wuwa wa lifo kani? 25Txi na dhumiswe Txizimu, ngu Mkoma wathu Jesu Kristu! Ngu konaho ni khumbi ya mlayo wa Txizimu ngu mbilu, aniko ngu wuthu, ni khumbi ya mlayo wa txiwonho.


Copyright
Learn More

will be added

X\