VAROMA 6

1Se hi na khathu txani kani? Hi na simamisa hi zumba txiwonhoni, kasi kateko yi anda kani? 2Lambi! Akuwa athu hi nga fa ngu ditshelo da txiwonho, xana hi nga hanyela txani kambe txiwonhoni kwakwe kani? 3Xana anu ma ti timelela ti to athu hotshethu hi nga bhabhatiswa ngu ka Jesu Kristu, hi bhabhatisetwe kufani kwakwe kani? 4Ngu toneto, ngu kubhabhatiswa hi keletwe kumweko nayo kufani, kasiku, kota nga ti Kristu a nga wuka ka vakufa ngu mtamo wa wudhumo wa Tate, nanathu hi fanela kuhanya wutomi wa wuphya. 5Ngukusa, ngako hi nga tshanganiswa kumweko nayo ngu lifo la kufana ni lakwe, ngu toneto hi na fananiswa nayo kambe ngu kuwuka ka vakufa ko fana ni kwakwe. 6Hotshethu ha ti ziva ti to mthu wathu wa kale a bethetwe ha txihambanoni kumweko ni Kristu, kufela ku mmidi wa txiwonho wu hasulwa, hi si swi kambe hi di tikhumbi ta txiwonho. 7Kha ditshuri, awule a nga fa a thukunyutwe ka txiwonho. 8Ngako hi txi fa kumweko ni Kristu, ha ti ziva ti to hi na hanya kumweko nayo. 9Nguko ha ti ziva ti to akuwa Kristu a nga wuka ka vafi, kha na mbi swa a txi fa kambe. 10Lifo kha li na mbi swa li maha txilo kwakwe. Nguko, ngu ditshelo da kufa kwakwe ngu mhaka ya txiwonho, ene a fite kumweko basi; kasi ngu ditshelo da kuhanya kwakwe, a hanyela Txizimu. 11Ngu toneto, nananu ti maheni vakufa ka txiwonho, kufela ku mi txi hanyela Txizimu ngu Kristu Jesu. 12Se konkuwa txiwonho txi nga thuke txi fuma mmidi wanu, awu wu fako, ngu kutumeletela minavelo ya wona yo biha; 13mi nga ningeleni sihango sanu kuwonhani, si maha matxhari a ku ambi lulama, aniko ti ningeleni ka Txizimu, nga va va nga huma kufani, ve hanya, mi teka sihango sanu si maha matxhari a kululama, a kuthumela Txizimu. 14Se txiwonho kha txi na mbi va ni mtamo txitimwi kwanu, nguko anu kha mi nga hahatshi ka mlayo, aniko mi hahatshi ka kateko. 15Hi na txani kani? Ina hi na wonha, akuwa hi ku singa hahatshi ka mlayo, kambe hi ku hahatshi ka kateko kani? 16Ina kha mi ti zivi ti to ngako mi txi ti maha tikhumbi ta kuengisa mthu wo kari, mi ti maha tikhumbi ta ene wu mi mu engisako, mwendo tikhumbi ta txiwonho txi txi yisako kufani, mwendo tikhumbi ta kuengisa kuwa ku yisako kululamani kani? 17Txi na bongwe Txizimu, nguko hambiko mi nga ti tikhumbi ta txiwonho, kambe mi si kotile ku ti ningetela ngu yotshe mbilu yanu ka gondo yiya mi nga wuletwa ka yona. 18Se mi di thukunyutwe ka txiwonho mi ti mahile tikhumbi ta kululama. 19Ni womba ngu mawombawombelo a vathu ngu kota ya dikhodho da wuthu wanu. Ngako mi nga ningela sihango sanu si thumela wubihi ni kuwonha, asi si hambanako ni kuranda ka Txizimu, se konkuwa ningelani sihango sanu si thumela kululama akuwa ku yisako kubasiswani. 20Ngukusa txikhati txi mi nga ti tikhumbi ta txiwonho, mi ti txhatxhekile ka ditshelo da kululama. 21Nji txani mi nga wuyelwa ngu txona ka sile konkuwa si mi thelako tingana kani? Nguko magwito a sona ngu lifo. 22Akuwa mi nga thuswa ka txiwonho mi maha tikhumbi ta Txizimu, mi bhindute mihando yi yi yisako kubasiswani, akuwa ku hokisako ka wutomi wo mbi guma. 23Ngukusa txhatxhazelo ya txiwonho ngu kufa. Kambe txiningo txa Txizimu ngu wutomi wo mbi na magwito, ngu ka Kristu Jesu Mkoma Wathu.

will be added

X\