VAROMA 2

1Ngu toneto, awe, hambi u di mani ni mani u lamulako vamwane, khu nga ni divalelo, ngukusa, ngako u txi lamula vamwane, wo ti abanisa upune, ngukusa nanawe wa ti maha tona ti u lamulako ngu tona vamwane. 2Ngukusa ha ti ziva ti to Txizimu txi lamula ngu nzila ya ditshuri ava va mahako toneto. 3Se awe mthu, u lamulako va va mahako to nga toneto, kuve wa ti maha nawe, ina u alakanya ti to u na huluka kulamulwani ka Txizimu kani? 4Kumbe wo kanyisa kutala ka wunene wa Txizimu, ni kutimisela ka txona, ni kuhonisela ka txona; khu ti zivi ti to wunene wuwa wa Txizimu wu ku ndindela kuya kuhundulukani kani? 5Kambe ngu kubanga ka mbilu yako, ayi yi si laviko kuhunduluka, wa ti sengeletela txiviti txi u no ta txi mana ka ditshiku da txiviti, ahawa ku no ta humelela kulamula ku ko lulama ka Txizimu; 6txona Txizimu txi txi no ta tshumetela mmwane ni mmwane, mayelano ni mithumo yakwe. 7Txi na ninga wutomi wo mbina magwito ava va kusimamela kumaha tatinene, ngu kulava wudhumo ni lisima ni wutomi wo mbi guma, ngu kutimisela ka mithumo yo tshura; 8kambe ava va kanetako, ava va lambako ditshuri, ve londetela wusoholoki, va na welwa ngu phango ni txiviti. 9Dikhombo ni kuxaniseka si na va txitimwi ka mthu wuhi ni wuhi a mahako to biha; ka Mjudha kukhata ni ka Mgriki nene. 10Kambe wudhumo ni txithavo ni kudikha si na va txitimwi ka wuhi ni wuhi a mahako wunene, ka Mjudha kukhata ni ka Mgriki nene; 11ngukusa Txizimu kha txi yi ngu khohe ya mthu. 12Votshe va va nga wonha va singa ni mlayo, va na lova va si nga ni mlayo; kambe ava va nga wonha na va txi wu ziva mlayo, va na lamulwa ngu mlayo. 13Ngukusa hi nga vale va engisako mlayo va wombwako ti to va lulamile masoni ka Txizimu; aniko va balwa ti to va lulamile avale va mahako ti wu rumako wona mlayo. 14Ngako vamatiko va va ku singa ni mlayo, va txi londetela ngu mahanyelo awe ati ti kombelwako ngu mlayo, vona ngu wutumbu ngu vona i ku mlayo wa kona, hambiko va ku singa ni mlayo. 15Va kombisa ti to mthumo wu wu lawako ngu mlayo wu bhatwe timbiluni kwawe; livhalo lawe ngu yona fakazi yawe; ni mapimo awe ma va kawuka kumbe ku va emela. 16Ngu tona tiya ti no ta humelela ngu ditshiku diya Txizimu txi no ta lamula, ngu Jesu Kristu, sikungo sa vathu kota kuwomba ka Evhangeli yi ni yi txhumayelako. 17Kambe, ngako awe u dhanwako ku u Mjudha, awe u thembako mlayo, u txi ti kulisa ngu Txizimu, 18awe u zivako kuranda ka txona, u zivako kuwona ti i ku ta lisima nguku u nga gondiswa ngu mlayo, 19awe u pimisako ti to u mñoli wa lisole ka mabhofu, u liwoningo la vale va ku txidemani, 20u mlayi wa va va si ziviko, mgondisi wa vanana, ngako u ku ni txiemo txa kukomba wuzivi ni ditshuri amu ka mlayo; 21awe u gondisako vamwane, se khu ti gondisi upune kani? Awe u txhumayelako ti to ku nga thuke ku txi piwa, na kasi wa pa! 22Awe u ku khawe ku nga thuke ku txi mahwa wugelegele, kasi awe wa geleza! Awe wa nyenya kukhozela sithombe, kasi awe wa handa mathepeleni ka sona! 23Awe u ti dhumisako ngu mlayo, kasi wa wisa tingana Txizimu ngu kundaka mlayo. 24Ngu konaho, ti bhatwe ti to “Ditina da Txizimu da ruketelwa hagari ka vamatiko ngu mhaka yanu.” 25Kha ditshuri, wukwera wa vhuna, ngako u txi veketa mlayo, kambe ngako u di mndaki wa mlayo, wukwera wako wu na va wu di phindukile wu maha wukhutu. 26Aniko, ngako makhutu ma txi veketa mlayo, ina wukhutu wawe kha wu wonwi nga wukwera kani? 27Se awu i ku dikhutu ngu ditshelo da mmidi, ngako a txi veketa mlayo, a na ku abanisa awe u ndakako mlayo, hambi u di ni ti ti nga bhalwa, hambi wukwera. 28Mjudha wa ditshuri hi nga wule wa ku ti komba hahanze dwe, ni wona wukwera wa ditshuri hi nga wule wu wonekako hahanze ha nyamani dwe; 29aniko Mjudha ngu wu i ku toneto ni mbiluni, ni wukwera wa ditshuri ngu wa mbilu, awu wu mahwako moyani, i singa ngu mibhalo; se kudhumiswa kwakwe kha ku humi ka vathu, aniko ku huma ngu ka Txizimu.

will be added

X\