VAROMA 14

1Amukelani awu a nga mbi tsana likholoni, mi si kanetisani nayo ngu ti a kholwisako tona. 2Ngukusa likholo la mmwane la m'tumelela kudya sotshe silo, kasi awu wa ku ambi tsana, a dya mndiwo wa mazokoro dwe. 3Awu a dyako sotshe a nga thuke e tseketsela wu a si dyiko sotshe, se awu nene a si dyiko sotshe, a nga thuke e tseketsela wu a dyako sotshe, nguko, Txizimu txi mu amukete. 4U mani awe u lamulako txithumi txa mmwane kani? Mwendo txithumi txiya txa ema mwendo txa wa, eto ti ziwa ngu nyamne wa txona; aniko txona txi na ema, nguko Mkoma a ni mtamo wo txi emisa. 5Mmwane a pimisa ti to ditshiku da hambana ni dimwane ditshiku, kasi mmwane a pimisa ti to otshe masiku ma fana. Mmwane ni mmwane a na mahe nga ti a kholwisako tona mbiluni kwakwe. 6Awu a ti sawulelako ditshiku do kari, a di sawulela Mkoma. Awu a dyako sotshe, a dya ngu mhaka ya Mkoma, ngukusa a bonga Txizimu. Nene wu a si dyiko sotshe, kha si dyi ngu mhaka ya Mkoma, nene a bonga Txizimu ngu sona. 7Hagari kwathu kha nga ho wu a ti hanyelako ene apune, futsi kambe kha nga ho wu a ti felako ene apune. 8Ngako hi txi hanya, hi hanyela Mkoma; ngako hi txi fa, hi fela Mkoma. Mwendo ha hanya, mwendo ha fa, hi lumba Mkoma. 9Kristu a fite e tshumela e wuka ka vakufa, kasiku e maha Mkoma wa vo hanya ni vo fa. 10Ngu ku txani u lamulako mkwanu kani? Ani awe, u tseketselela txani mkwanu kani? Kuve hotshethu hi na ya ema masoni ka txikhalo txa kulamula txa Txizimu. 11Ngukusa ti bhatwe ti taku: “Ngako ni hanyako, kha Mkoma,otshe mazolo ma na khizama masoni kwangu,ni totshe tidimi ti na dhumisa Txizimu.” 12Ngu toneto, mmweyo ni mmweyo wathu a na ya ti xamulela masoni ka Txizimu. 13Ngu toneto, he lekeni kulamulana ngu txathu; kambe ti woneleni mi si vekeli mkwanu txikhuvekiso, hambi txitsha txa ku mu humba. 14Na ti ziva ni va ni kholwa ngu ka Mkoma Jesu, ti to kha ku nga ni txilo txi txi nga mbi basa ngu wutumbu wa txona; tsena ngako mthu a txi alakanya ku tximaha txo kari txi nyenyezile: Kwakwe kha txa basa. 15Kambe ngako mkwanu a txi karateka ngu mhaka ya si u dyako, awe se khu tsimbili ngu lirando. U nga m'daye ngu sakudya sako awu Kristu a nga m'fela. 16Ngu toneto, wunene wanu wu nga thuke wu txi soleka. 17Ngukusa Mfumo wa Txizimu hi nga kudya ni kusela; aniko ngu kululama, ni kudikha, ni kutsaka ngu ka Moya wo Sawuleka. 18Ngukusa awu a thumelako Kristu ngu nzila yiya, wa tsakisa Txizimu, na a txi dhundeka ka vathu. 19Ngu konaho, he xoteni kumaha ati ti vangako kudikha ni ti ti hi akako amu ka likholo. 20U nga hasamule mthumo wa Txizimu ngu mhaka ya sakudya. Kha ditshuri sotshe silo si basile; aniko si bihile ngako mthu a txi dya kambe a txi khuvekisa mmwane. 21Ti tshurile ngako u si dyi nyama, u si seli vhinya, u si mahi txilo txihi ni txihi txi khuvekisako mkwanu. 22Atxiya u kholwako ngu txona, zumba natxo masoni ka Txizimu. A katekile mthu wu a si ti ningiko mnandu ka silo si a si wonako ti to si lulamile. 23Kambe awu a kanakanako e lamba e dya, a abanisilwe, nguko a dya a singa ni likholo la ditshuri. Nguko totshe ti ti si mahwiko ngu kukholwa, njiwonho.

will be added

X\