VAROMA 13

1Mthu ni mthu a na engise wukoma; nguko kha ku nga ni wukoma wu wu si tiko ngu ka Txizimu. Se vakoma va va ku ho va vekilwe ngu Txizimu. 2Ngu konaho, ava va engisako wukoma, va engisa mlayo wu wu nga vekwa ngu Txizimu. Se ava va eyisako va dhana kuabaniswa txitimwi kwawe. 3Ngukusa ava va fumako mbalala ka va va mahako to biha, i singa ka va va mahako tatinene. Ina u dhunda kuhanya u singa ni kuthava masoni ka wukoma kani? Maha ti i ku ta tinene, u na dhundwa ngu wukoma; 4ngukusa mkoma njirumwa txa Txizimu, txa ku ku vhuna kumaha ta tinene. Kambe ngako u txi maha to biha, u fanete kuthava, nguko mkoma kha ñoli ditxhari mahala. Njirumwa txa Txizimu kasi kulamula ni kutsayisa ava va mahako to biha. 5Ngu konaho, mi fanete ku ti veka hahatshi ka wukoma, i singa ngu kuthava kuhenyelwa basi, aniko ngu mhaka ya livhalo. 6Ngu konaho mi humisako mikhupo, ngukusa vakoma nzithumi sa Txizimu, si khutalako ka mthumo wuwa. 7Va ningeni votshe asi si va fanelako: Awu a fanelako kuamukela mkhupo m'ningeni; awu a fanelako ku amukela nduwo, m'luveni; awu a fanelako kuxoniphwa, m'xonipheni; awu a fanelwako ngu txithavo, m'thaveni. 8Mi nga veni ni txikweneti ka mmwane mthu, hahanze ka txikweneti txa lirando. Nguko awule a randako mthu kulowe, a hetisile mlayo. 9Ngukusa sirumo si si ku: “U nga geleze, u nga daye, u nga pe, u nga navele” hambi ni sihi simwane sirumo, sotshe si tshanganiswa ngu pswi diya diku: “U na randa muakelani nga ti u ti randisako tona awe upune.” 10Lirando kha li mahi kubiha ka muakelani. Ngu toneto, lirando ngu lona i ku ditshina da mlayo. 11Mahani toshe tiya, nguko ma yi ziva mbimo yi hi ku ka yona: Se i mbimo yo wuka wukoheni. Konkuwa kuhanyiswa kwathu ku hafuhi ngutu kupinda mbimo yile hi nga amukela ngu yona likholo. 12Wusiku wu pindile, kutxa ka tshuketela. He lekeni mithumo ya txidema, he xomeni matxhari a liwoningo. 13Nga tiya i ku mitshikari, he tsimbileni ngu fanelo, hi hambana ni limito kumbe wudevi, ni wugango kumbe wugelegele, ni livengo kumbe wukhuxu. 14Aniko ambalani Mkoma Jesu Kristu, mi nga khataleleni mmidi, kasiku mi si londisi kunavela ka wona.

will be added

X\