VAROMA 12

1Ngu toneto, na mi khongotela, vanathu ngu wumbilu wa Txizimu ti to mi txi ningela mimidi yanu, yi txi maha mhamba ya kuhanya ni ya kusawuleka, ayi yi tsakisako Txizimu, i ku wona mphaxo wu wu lavekako. 2Mi nga xengetelweni ngu sa ditiko diya, aniko phindukani amu ka mapimo anu, kasiku mi ziva kuranda ka Txizimu: Ati i ku tatinene, a ti ti m'tsakisako, ni ti i ku ta kuhetiseka. 3Ngu mtamo wa kateko yi ni nga ningwa, na laya mmwane ni mmwane a ku hagari kwanu ti to a si thuki a txi ti alakanyela kupinda mpimo wa fanelo yakwe, aniko a na ve ni mapimo a ku ti veka hahatshi, madingano ni mpimo wa likholo li Txizimu txi nga avela ka mmwane ni mwane hagari kwanu. 4Ngukusa, kufana ni ku hi ku ni sihango sasingi ka mmidi wumwewo, kambe sihango siya si si mahiko mthumo wumwewo, 5ngu toneto nanathu, hambiko hi ku vangi, hi mmidi wumwewo ngu ka Kristu, se mmwane ni mmwane njihango txa mkwawe. 6Ngu konaho, ngako hi ku ni sihiwa so hambana, madingano ni kateko yiya mmwane ni mmwane kwathu a nga ningwa yona, he si thumiseni; awu a ku ni txihiwa txa nuwela dipswi da Txizimu, a na nuwele ngu mpimo wa kukholwa kwakwe; 7awu a ku ni txihiwa txa kuthumela vamwane, a na va thumele; awu a nga ningwa kugondisa a na gondise; 8awu a nga ningwa kulaya a na laye; awu a nga ningwa ku avela a na avele a si na wufunyu; awu i ku mthangeli a na thume ngu ku ti ningetela; awu a mahako mithumo ya wumbilu a na yi mahe a di henemene. 9Lirando li nga ve ni kuxengetela, vengani to biha, mi txi namarela ka ti i ku tatinene. 10Zumbani ngu kurandana nga vanana va mthu mmweyo, mi txi palisana ngu kukombisa txithavo ka mmwane ni mmwane. 11Khutalani, mi nga telweni ngu dikhodho; turani moyani, mi txi thumela Mkoma. 12Tsakani kuthembani kwanu, mi txi timisela kuxanisekani; mi txi simamisa kukhongelani. 13Vhunetani vasawuleki ka si va si pwatako, mi txi amukela vapfhumba ngu manza mambidi. 14Katekisani va va mi zondako, va katekiseni, mi nga wombeni kubiha ngu vona. 15Tsakani ni va va tsakako, mi txi dila ni va va dilako 16Zumbani ngu kuengisana; mi nga naveleni sa kuguleka; kambe sengelani ni va va ti vekako hahatshi; mi nga laveni ku ti maha tixhari mialakanyoni kwanu. 17Mi nga tshumeteleni kubiha ngu kubiha, kambe zamani kumaha ti i ku tatinene masoni ka votshe vathu. 18Zamani kumaha ti mi ti kotako ngu ditshelo danu, kasiku mi hanya ngu kurula ni votshe vathu. 19Vo randeka ngutu, mi nga photeni mipune, kambe lekani Txizimu txi ti henyela, ngukusa ti bhatwe ti taku: “Kuphota ku lumba ani, ngani ni no tshumetela, kha Mkoma.” 20Aniko, ngako mlala wako a di ni nzala, mu he sakudya. A di ni ditora, mu ninge so sela, ngukusa u txi maha eto, wo hembenyetela makala a mndilo ha msungo kwakwe. 21U nga xulwe ngu kubiha, kambe xula kubiha ngu wunene.

will be added

X\