VAROMA 10

1Vanathu, kuxuva ka mbilu yangu ni mikombelo yi ni va mahelako ka Txizimu vanana va Israyeli, ngu ti to ve hanyiswa. 2Ngukusa na va fakazela ka ti to vana ni kukhutala ka Txizimu, kambe kukhutala kwawe hi nga ka wuzivi. 3Ngukusa, ngu ku ambi ziva kululama ka Txizimu ni kulava ku ti emisela kululama kwawe vona ngu txawe, kha va ti veka hahatshi ka kululama ka Txizimu. 4Ngukusa magwito a mlayo ngu Kristu, awu a ningako kululama ka wuhi ni wuhi a kholwako kwakwe. 5Ngukusa Mosi a bhate ti to mthu wu a mahako kululama ku i ku ka mlayo, a na hanya ngu kona. 6Aniko kululama ku ku tako ngu kukholwa, ku womba tiya: “U nga thuke u txi womba mbiluni kwako, u txi khawe: ‘I mani wu a no kwela nzumani?’ (Ti taku: kasi kuya txhikisa Kristu). 7Mwendo ku: ‘I mani a no kwitima diphalani?’ (Ti taku: kasi kuya humisa Kristu ngu ka vakufa), kani?” 8Kasi Mibhalo yi womba txani kani? Yi womba tiya: “Dipswi di hafuhi kwako, di txisofuni kwako, ni mbiluni kwako.” Atiya ti womba dipswi da likholo li athu hi txhumayelako. 9Ngu mhaka yeto, ngako u txi fakaza ngu txisofu ti to Jesu i Mkoma, u txi tumela kambe mbiluni kwako ti to Txizimu txi m'wusile ngu ka va vo fa, u na hanyiswa. 10Nguko mthu a kholwa ngu mbilu kasiku e mana wululami, kambe a fakaza ngu txisofu, kasiku e mana kuhanyiswa. 11Ngukusa Mibhalo yi womba tiya: “Wuhui ni wuhi a kholwako kwakwe, kha na mbi wiswa tingana.” 12Kha ku nga ho kuhambana hagari ka Mjudha ni Mugriki, nguko mkoma wawe i mmweyo, awu a ku ni wuha ka votshelele va va m'khozelako. 13Nguko wuhi ni wuhi a khozelako ditinani ka Mkoma a na hanyiswa. 14Kambe va na khozelisa ku txani ka wule va nga mbi kholwa kwakwe kani? Va na kholwisa ku txani ka wule va nga mbi engisa timhaka takwe kani? Va na ti engisisa ku txani, ngako ku singa ni mtxhumayeli kani? 15Va na txhumayelisa ku txani, ngako va sa rumwa kani? Nga ti ti nga bhalwa taku: “Eto yi nga tshurisa tona mikondo ya vale va txhumayelako mahungu a manene!” 16Aniko hi nga votshe va va nga amukela Evhangeli. Ngu toneto, Isaya a wombile a txi khene: “Mkoma, i mani a nga kholwa ka ti hi nga txhumayela kani?” 17Kha ditshuri, kukholwa kuta ngu kuengisa ti ti txhumayelwako, kutxhumayela ngu kuzivisa dipswi da Kristu. 18Se na wotisa: Ina kha va ti engisa kani? Kha ditshuri va ti engisile, nguko ti bhatwe ku: “Kutxhumayela kwawe ku pfate ka dotshe ditiko,ni mapswi awe ma hokile magemetamitshi ka mafu.” 19Se na engeta ni txi wotisa: Ina Israyeli a nga va a sa ti ziva kani?Ku thangile Mosi a txi khene: “Ni na mi wusela txiluse ngu ditiko di i ku singa da txilo;ni na mi henyisa ngu ditiko di di ku singa ni kupimisa.” 20Ni Isaya wa tsana a txi womba ku khene: “Ni manwi ngu va va nga mbi ni lava;ni ti kombisile ka vale va nga ti si wotiseli ngu ngani.” 21Kambe ngako a txi womba ngu Israyeli, a khene: “Dotshe ditshiku ni nawulutile manza angu ka vathu va va si engisiko, va kanyisako.”


Copyright
Learn More

will be added

X\