MTULETELO 9

1Se ngelozi ya wutxhanu yi to veta mpundu wa yona. Konako ni to wona nyeleti yi nga wa ngu nzumani yi wela ha mafuni: yi to ningwa khiya ya txisofu txa diphala do hokoma, 2se yona yi to tula txisofu txa diphala do hokoma, se konaho ku to tuvika wutshi, wo fana ni mdhikila wa hombe wa mndilo, ahawa ko za ditambo ni ndengelenga si phumaliswa ngu mhaka ya wutshi wu humako ngu txisofuni ka diphala. 3Se ku to huma humbi ngu wutshini mule yi txi ta ha mafuni, yi ningwa mtamo wo nga wa tingume ta ha mafuni. 4Humbi yiya yi to gelwa ti to yi si dyi mwasi wa ha mafuni, hambi tximilwa txihi ni txihi txi hanyako, hambi mindonga; tsena kuyela vathu va va nga mbi vekwa txixambanyo txa Txizimu timbanzani kwawe. 5Humbi yiya yi to laywa ti to yi si va dayi, aniko yi na va xanise, txipimo txa mtxhanu wa mitxima ngu maxaniselo o nga ya ngume, ngako yi txi luma mthu. 6Ka oneyo masiku, vathu va na lava lifo, kambe va si li mani; va na navela kufa, kambe lifo li na tutuma li va siya. 7Mazumbelo a humbi ya kona ma ti fana ni mahanxi o longiselwa kuya yimbini; ha misungoni ka yona humbiyo ku ti ni so fana ni mibhoti yo nga ya nzalama, ni tikhohe ta yona ti txi nga tikhohe ta vathu. 8Yi ti ni misisi yo nga misisi ya vavasikati, ni makwasa o nga a ngonyamo. 9Yi ti ni sikatawu sa tisimbi ha tikhana. Diguwa da mabhapi di ti fana ni diguwa da sikotxhikane so ndindwa ngu mahanxi a mangi ma tutumelako kulwani: 10Humbiyo yi ti ni mikila yo nga mikila ya ngume ni tituna mikilani ka yona; se ka mikila yiya ku ti ni mtamo wo si kota kuxanisa vathu txipimo txa mtxhanu wa mitxima, 11Humbiyo yi ti fumwa ngu ngelozi ya diphala do hokoma, ditina da yona yi dhanwako ku i “Abhadhoni” ngu txihebheru ni ku i “Apolioni” ngu txigriki. 12Dikhombo do khata di phindile. Aniko, wonani, ku ngadi ni makhombo mamwane a mambidi ma ku ngadi ma txi ta. 13Se ngelozi ya wutxhanu ni yimweyo yi to veta mpundu wa yona. Konako ni to engisa dipswi di txi huma ngu ka titxheho ta mune ta txiluvelo txa nzalama, atxi txi ku masoni ka Txizimu. 14Dona dipswi di to gela ngelozi ya wutxhanu ni yimweyo, yi nga ti ni mpundu, di txi: “Thusa tingelozi ta mune ti ti nga sungwa mnamboni ka hombe ka Eufrate.” 15Ku to thuswa tingelozi ta mune ti nga ti lulamisetwe txikhati, ni mtxima ni dilembe kasiku ti daya ditshelo da wuraru da vathu. 16Mtengo wa mtxawa wa vagadhi va mahanxi i ti mazana mambidi a timiliyoni (200.000.000), ni wu engisile tatinene mtengo wa kona. 17Amu ka txiwoniso txangu, ntengo wa mahanxi ni vagadhi va ona, ni si wonisile tiya: va ti ambate sikatawu so vhika ngu sona, so bhilivila nga mndilo, ni nkuxe nga jakinta ni halandi nga txivavula, misungo ya mahanxi yi ti fana ni ya tingonyamo, se ngu mkanani ka ona ku txi huma mndilo ni wutshi ni txivavula. 18Ditshelo da wuraru da vathu, va datwe ngu mhaka ya sitsayiso siya sa siraru: Mndilo ni wutshi ni txivavula, asi si nga txi huma ngu sisofuni ka mahanxi. 19Nguko mtamo wa mahanxi wu ti sisofuni ka ona ni mikilani ka ona; nguko mikila ya ona yi ti fana ni minyoka: Yi na ni misungo ya wulala. 20Vamwane vathu va nga mbi dawa ngu sixaniso siya, kha va nga hunduluka ka mithumo ya manza awe, ti to ve leka kukhozela madhimoni, ni sithombe sa nzalama ni silivela ni simbi ya disotxe ni sa dirigwi ni sa mindonga, asi si si kotiko kuwona, hambi kuengisa mwendo kutsimbila. 21Kha va hunduluka kambe ka wugevenga wawe, ni ka matiloti awe ni ka wugelegele wawe ni ka wukhamba wawe.


Copyright
Learn More

will be added

X\