MTULETELO 8

1Kutingako Txinvutana txi di namute txixambanyo txa wutxhanu ni simbidi, nzumani ku to malala ku txi zwee txipimo txa hafu ya txikhati. 2Konako ni to wona tingelozi ta mtxhanu ni timbidi ti nga ema masoni ka Txizimu, ti txi ningwa mtxhanu wa mipundu ni yimbidi. 3Yi to ta yi ta ema yimwane ngelozi hafuhi ni txiluvelo, yi di ni txiya txa txiwungelo txa nzalama. Se va to yi ninga dibaselo da dingi kasiku yi di pata ni mikombelo ya votshe vasawuleki, txitimwi ka txiluvelo txa nzalama, txi ku masoni ka txikhalo txa wukoma. 4Se wutshi wa dibaselo wu txi huma manzani ka ngelozi wu to tuvika wu ya txitimwi masoni ka Txizimu kumweko ni mikombelo ya vasawuleki. 5Se ngelozi yi to teka txiwungelo yi txi tata ngu mndilo wa ha txiluveloni, yi txi vinza ha mafuni: Msana keto ku to dhinda singwalagwanda, ku pfala tihuwa, ku keluka nzumani ni kutsekatseka ka mafu. 6Konako tingelozi ta mtxhanu ni timbidi, ti di ñote mipundu ya mtxhanu ni yimbidi ti to ti lulamisela kasiku ti yi veta. 7Ngelozi yo khata yi to veta mpundu wa yona: Konako ku to wa maralala ni mndilo, si di patanisilwe ni mnoha: Ku to hya ditshelo da wuraru da mafu, ku hya ditshelo da wuraru da mindonga, ku to hya mwasi wotshe wo hanya. 8Se ngelozi ya wumbidi niyona yi to veta mpundu wa yona. Se txilotxo txo nga mmango wo tura, txi to vinzwa lineneni. Se ditshelo da wuraru da linene di to hinduka di maha mnoha; 9Ku to fa ditshelo da wuraru da sivangwa si si hanyako lineneni; ni ditshelo da wuraru da sitimela sa mati si to loviswa. 10Se ngelozi ya wuraru yi to veta mpundu wa yona. Se ku txi wa ngu nzumani nyeleti ya hombe, yi txi tura nga msanje: Yi txi wela txitimwi ka ditshelo da wuraru da minambo ni sisima. 11Ditina da nyeleti i ti “Muheso” se ditshelo da wuraru da mati di to hinduka di maha muheso, se vathu va vangi va to fa ngu mhaka ya mati ma nga ti hindukile me bava. 12Se ngelozi ya wunene yi to veta mpundu wa yona. Ku to hokelwa ditshelo da wuraru da ditambo, ditshelo da wuraru da mtxima, ni ditshelo da wuraru da tinyeleti, ahawa ko za ditshelo da wuraru da sona di phumiswa; se mtshikari wu to luza ditshelo da wuraru da kuwonekela ka wona, kufana ni wusiku niwona. 13Se konako ni to wona ni kuengisa ngungwa yi nga ti puruma txitimwi ha mpfhukani, yi kwangula ngu dipswi da hombe, yi txi: “Dikhombo, Dikhombo! Dikhombo ka vale va nga aka ha mafuni, mbimo yi yi no vetwa mipundu yatingelozi ta tiraru ti ku ngadi ti txi na veta!”

will be added

X\