MTULETELO 6

1Se ni woni Txinvutana mbimo yi txi nga kwamula tximwetxo ka sixambanyo sa mtxhanu ni simbidi, ni engisile txivangwa txo khata txa sivangwa sile sa mune so hanya, txi txi wombawomba ngu dipswi do nga txingwalangwanda, txi txi: “Ngono!” 2Se konako ni to wona dihanxi do basa, mgadhi wa dona a di ni wulaho. Va mu ningile m'bhoti, se e huma, nga ndena, yi yi yako kuxulani. 3Mbimo yi Txinvutana txi nga kwamula txixambanyo txa wumbidi, ni to engisa txivangwa txa wumbidi txo hanya txi txi: “Ngono!” 4Se ku to humelela dimwane dihanxi, do bhilivila, se mgadhi wa dona a ti ningilwe mtamo wo thavisa kudikha ha mafuni, kasiku vathu ve dayana vapune. A ningilwe kambe ditxhari da hombe. 5Mbimo yi Txinvutana txi nga kwamula txixambanyo txa wuraru, ni to engisa txivangwa txa wuraru txi hanyako, txi txi: “Ngono!” Konako ku to humelela dihanxi da ntima, mgadhi wa dona a ti ni txikalo manzani. 6Konako ni to engisa txo nga dipswi, di humako ngu ka mune wa sivangwa si hanyako, di txi: “Mpimo wumwewo wa fulaho wu xawa ngu male ya didhenari dimwedo, mipimo yiraru ya mahila niyona yi xawa ngu male ya didhenari dimwedo, se u nga wonhe mafura ni vinya.” 7Mbimo yi Txinvutana txi nga kwamula txixambanyo txa wumune, ni to engisa dipswi da txivangwa txo hanya txa wumune, di txi: “Ngono!” 8Ni to wona ku txi humelela dihanxi do kwalala. Mgadhi wa dona a ti dhanwa ku i “Kufa”, se a ti londetelwa ngu Gehena. A ningilwe mtamo wa kufuma ditshelo da wumune da mafu, kasiku e daya vathu ngu ditxhari, ni nzala,ni ntungu ni sihari sa txitinga. 9Mbimo yi Txinvutana txi nga kwamula txixambanyo txa wutxhanu, ni to wona, hahatshi ka txiluvelo, mimoya ya vale va nga dawa ngu mhaka ya dipswi da Txizimu ni mhaka ya kuwa va nga di fakazela. 10Se vona va to kwangula ngu dipswi da hombe va txi: “Hi na ku rinzela kala ditshiku muni, Mkoma wo sawuleka ni wa ditshuri, awe u telako ku ta lamula, ni kupharela mnoha wathu ka vaaki va ha ditikoni muwa, kani?!” 11Konaho, mmweyo ni mmweyo wawe a to ningwa siambalo so basa, se ve gelwa kambe ti to ve ya masoni ngu kuhumulanyana, kala kuza ku tatiseka mtengo wa vakwawe ni vanawe, ava va no dawa nga vona. 12Ni txi woni Txinvutana, mbimo yi txi nga kwamula txixambanyo txa wutxhanu ni tximwetxo: Ku to humelela kuzinginika ka hombe ka mafu: Ditambo di to phinduka di maha da mtima, nga nguwo ya mkhwasi, se mtxima wotshe wu hinduka wu bhilivila nga mnoha. 13Tinyeleti ta nzumani ti to khatuka ha mpfhukani ti wela ha mafuni,nga maxanvu a mambisu a mxanvu wu wu zuzwako ngu txihuhuri. 14Nzuma yi to thaviswa nga dibhuku da didhowo, ngako di di petilwe, se yotshe mimango ni sitondolo si rurisilwe ka wukhalo wa sona. 15Vafumi va mafu, ni tinduna, ni vathangeli va tiyimbi, ni vanyatithombe, ni vathu va mtamo, ni vothe tikhumbi ni vathuseki, va to tumbela maphalani ni hahatshi ka marigwi mimangoni. 16Ve gela mimango ni marigwi va txi: Khundumukani mi txi hi khubhunyeta, mi hi sisa ka khohe ya wu a nga khalahatsha ha txikhaloni ka wukoma, ni ka kuhenya ka Txinvutana, 17nguko di hokile ditshiku da hombe da kuhenya kwawe, se i mani a no si kota kuema, kani?

will be added

X\