MTULETELO 5

1Msana keto ni to wona awule a nga ti khalahatshile ha txikhaloni ka wukoma, a di ñote, ngu dianza da txinene, dibhuku do bhalwa mndani ni hahanze di di lemilwe ngu sixambanyo sa mtxhanu ni simbidi. 2Konako ni to wona ngelozi ya mtamo, yi txi nuwela ngu dipswi da hombe yi txi: “I mani a ku ni fanelo yo tula dibhuku e kwamula sixambanyo siya sa dona, kani?” 3Aniko ku ti singa ho ni mnweyo, hambi nzumani, hambi ha mafuni, hambi hahatshi ka mafu, wo sikota kutula mwendo kurinza maso mndani ka dona. 4Ani ni ti dila ngutu, nguko ni wammweyo kha maneka a di ni fanelo yo tula mwendo kurinza maso mndani ka dona dibhuku dile. 5Aniko didhota dimwedo di ni malatile di txi: “U nga dile. Wona, ngonyamo ya lihunzu la Judha, Mkuluti wa lixaka la Dhavhidha, yi xute, ngu konaho ya si kota kutula dibhuku ni kukwamula sixambanyo sa dona sa mtxhanu ni simbidi.” 6Ngu toneto, hagari ka txikhalo txa wukoma kumweko ni mune wa sivangwa so hanya, ni madhota, ni woni Txinvutana txi di emile, nga txi to bhaywa. Txi ti ni mtxhanu wa titxheho ni timbidi, ni mtxhanu wa maso ni mambidi, i ku mtxhanu wa Mimoya ni yimbidi ya Txizimu, yi nga rumwa ka dotshe ditiko. 7Txinvutana txile txi ti ya amukela dibhuku ka dianza da txinene da wule a nga khalahatsha ha txikhaloni ka wukoma. 8Mbimo yi Txinvutana txi nga amukela dibhuku, sivanga so hanya sa mune ni madhota a makumi mambidi ni mune va to nama masoni ka Txinvutana, dimwedo ni dimwedo di di ni harpa ni siyana so mahwa ngu nzalama, si di tate ngu dibaselo, i ku mikombelo ya vasawuleki, 9va txi embelela ndando ya yiphya va txi:“ U ni fanelo yo amukela dibhuku, u txi tula sixambanyo sa dona, nguko u datwe, se ngu mnoha wako u xavete Txizimu vathu va totshe tihunzu, totshe tidimi, otshe matiko ni yotshe mifumo. 10Ngu vona u mahete Txizimu txathu, mfumo wa vaphaxeli,se vona va na fuma ha mafuni.” 11Konako ni woni txiwoniso, ni engisile kambe mapswi a tingelozi ta tingi, ti di randete txikhalo txa wukoma, kumweko ni sivangwa si si hanyako ni madhota- mtengo wa tona i ti makhulukhulu ni makhulukhulu ni mazana a mazana a ku ambi balwa. 12Tona ti wombile ngu dipswi da hombe ti txi: “Txinvutana txi txi nga bhaywa txi ni fanelo ya kuamukela wukoma, thomba,wuzivi, mtamo, ni wudhumo, kupfaliswa ni kubongwa. 13Ni ka sotshe sivangwa si si ku nzumani ni ha mafuni ni hahatshi ka mafu ni lineneni ni sotshe si si ku ho ani ni si engisile si txi womba, si txi kha sona: “Ka wule a nga khalahatsha txitimwi ka Txikhalo txa Wukoma ni ka Txinvutana, ku na ningwe kubonga, txithavo, wudhumo ni wukoma kala kupinduka.” 14Ani sivangwa si sa mune si hanyako si to womba si txi kha sona: “Amen.” Se madhota ma to khizama ma txi khozela.

will be added

X\