MTULETELO 4

1Msana keto, ni to wona txiwoniso: Ditimba di nga ti tutwe nzumani, se dipswi do khata di ni nga ti di engisile, do tuma ku nga mpundu, di txi: “Kwela u txi ta hawa, kasiku ni ta ku komba ati ti no maheka msana ka tiya.” 2Kunukunuko ni to susumetwa ngu Moya: Konako ni to wona txikhalo txa wukoma nzumani, se ha txikhaloni ku ti ni mmweyo a nga ti khalahatshile ka txonetxo txikhalo txa wukoma. 3Awule a nga ti khalahatshile ka txona, a ti ni khohe yo nga dirigwi da jasperi ni da sardoniya, se wulaho wa nzumani wu ti ranganyetile txikhalo txa wukoma ngu kukhetima ko nga dirigwi da esmeralida. 4Txikhalo txiya txa wukoma txi ti ranganyetilwe ngu simwane sikhalo sa wukoma sa makumi mambidi ni mune; txitimwi ka sona ku ti khalahatshile madhota a makumi mambidi ni mune, ma di ni siambalo so basa, ma di ni mibhoti ya nzalama ha msungo kwawe. 5Ngu ka txikhalo txile txa wukoma, ku titi huma kuphatima, mapswi ni singwalangwanda; se masoni ka txikhalo txa wukoma ku ti tura mtxhanu wa misanje ni yimbidi ya mndilo: I ku mimoya ya mtxhanu ni yimbidi ya Txizimu. 6Masoni ka txona txikhalo txa wukoma, ku ti ni txo nga linene la ngilazi lo fana ni kristali.Txikhalo txa wukoma txi ti ranganyetilwe ngu mune wa sivangwa so hanya, na si di tate ngu maso, masoni ni msana. 7Txivangwa txo khata txo hanya txi ti fana ni ngonyamo; txivangwa txa wumbidi txi ti fana ni didhuna, txa wuraru txi ti ni khohe yo nga ya mthu; txa wumune txi ti fana ni ngungwa. 8Sivangwa siya sa mune, tximwane ni tximwane txi ti ni mtxhanu wa mabhapi ni dimwedo, na si di tate ngu maso, otshe makhalo, mmdani ni hahanze. Se wusiku ni mtshikari, sivangwa sile sa embelela si si malali, si txi: “Msawuleki, msawuleki, msawuleki! Mkoma Txizimu txa mtamo wotshe. Awule a nga ti ho, Awule a ku ho ni wule a tako.” 9Se, txihkati ni txikhati sivangwa si ningako kupfalisa ni kubonga ka wule a nga khalahatsha ha txikhaloni ka wukoma, ene wu a hanyako kala kupinduka, 10madhota awa a makumi mambidi ni mune ma titi khizama masoni ka wule a nga khalahatsha ha txikhaloni ka wukoma, kasiku me khozela ene awule a hanyako, kala kupinduka, me veka mibhoti ya ona hahatshi, masoni ka txikhalo txa wukoma, me kwangula, ma txi: 11Ngawe u ku ni fanelo, Mkoma Txizimu txathu, Ya kuamukela kupfaliswa, wudhumo ni mtamo, Nguko ngawe u nga vanga sotshe simaha; Se ngu kuranda kwako, sona si tumbulukile, si mana kuhanya.

will be added

X\