MTULETELO 22

1Msana keto, ngelozi yi to ni komba mnambo wa mati a wutomi, o khetima nga kristali; wu txi huma ngu ka txikhalo txa wukoma txa Txizimu ni txa Txinvutana. 2Hagari ka mtendela wa didhoropa ni mabambe ka mnambo, ngu khe ni khé, ku ni mndonga wa wutomi, awu wu ningako mihando digumi ni kambidi ngu dilembe, ngu kuveleka mtxima ni mtxima: Mazokoro a wona ma thuma ku hanyisa mifumo. 3Kuruketela kha ku nambi va ho kambe. Ka dona didhoropa diya ku na va ni txikhalo txa wukoma txa Txizimu ni txa Txinvutana, se sithumi sa Txizimu si na txi khozela; 4Si na wona khohe ya txona, ni ditina da txona, di na bhalwa ha timbanza ka sona. 5Kha ku na mbi swa ku di ni wusiku; ni wammweyo kha na mbi swa e lava kuwoninga ka dilambu, hambi kuwoninga ka ditambo, nguko Mkoma Txizimu ngu txona txi no va woninga, se vona va na fuma ngu ha ku si gumiko. 6Se Ngelozi yi to ni gela, yi txi: “Mapswi yawa ngo thembeka ni a ditshuri, nguko Mkoma, Txizimu txi ningako moya wa txona ka vaprofeti, txi rumete ngelozi ya txona kasi kukomba sithumi sa txona ati ti no maheka mbayimbayi.” 7Jesu a khene: “Wonani, na ta konkuwa! A katekile awu a veketako mapswi a kuprofeta ka dibhuku diya.” 8Ani, Johane, ngani, ni nga ti engisa ni ku ti wona timhaka tiya. Ngako ni di engisile ni ku ti wona ni to wa hahatshi kasi kukhozela ngelozi yi nga ti ni kombile timhaketo. 9Kambe yi to ni tsimba yi txi: “Lambi! U nga mahe eto! Nani ni txithumi kufana ni nawe, ni vakakwanu, vaprofeti, ni kufana ni vale va veketako mapswi a dibhuku diya. Txizimu ngu txona u fanelako ku txi khozela!” 10Se ngelozi yi engeta yi txi: “U nga sise ngu kulema mapswi a kuprofeta ka dibhuku diya, nguko mbimo yi hafuhi. 11Awu a nga mbi lulama a na simamise e maha ku ambi lulama kwakwe; awu i ku wa nzambwa a na simame nzambwani kwakwe; ani mlulami a na simamise e maha kululama, ani msawuleki a na simame e ti sawulekisa.” 12“Wonani, ani na ta konkuwa, kambe ni na ta ni hakelo: Ni na ta ninga mmwane ni mmwane madingano ni mithumo yakwe 13Ani ngani Alfa ni Omega, wokhata ni wogwitisa, Makhato ni Maguito. 14Va katekile avale va kuwulako tinguwo tawe kasiku ve mana txiavelo ka mndonga wa wutomi, ni ku si kota kuwulela didhoropani ngu ha sikeni ka dona. 15Ti na sala hahanze timbwa, vasalamusi, vamahi va wugelegele, vadayi va vathu, vakhozeli va si i ku singa Txizimu ni votshe va va dhundako mwendo va hanyako ngu makuhu. 16Ani Jesu, ni rumete Ngelozi yangu, kasi ku mi fakazela timahaka tiya ti lumbako mabanza: Ani ni diphasikela da lihunzu la Dhavhidha, ni nyeleti yi phatimako hale mixo.” 17Moya ni Txiwutwa va womba va txi khona: “Ngono!” Awule a engisako a na wombe nene a txi khene: “Ngono!” Awule a ku ni ditora, a na te. Awule a ti lavako a na amukele mahala mati a wutomi. 18Na tsanisa ka wuhi ni wuhi a engisako mapswi a kuprofeta ka dibhuku diya ni khani: “Ngako mthu a txi engetela mamwane mapswi, Txizimu txi na mu engetela mitungu yi yi nga bhalwa ka dona dibhuku diya. 19Se ngako mthu a txi hungula mapswi a dibhuku diya da kuprofeta, Txizimu txi na mu tekela nene txiavelo txakwe ka mndonga wa wutomi ni ka Didhoropa do sawuleka, si nga bhalwa dibhukuni muwa. 20Awule a fakazako timhaka tiya wa womba a txi khene: Inna, ani na ta kunukunuku!” Amen. Ngono, Mkoma Jesu! 21Kateko ya Mkoma Jesu yi na ve ni nanu motshenu! Amen.

will be added

X\