MTULETELO 20

1Se ni to wona ngelozi yi txi txhika ngu nzumami, manzani yi di ni khiya ya diphala do hokoma ni txhini ya hombe. 2Ngelozi yi to ├▒ola mwamilambo, mnyoka wa kale - i ku Dhiabhulosi mwendo Sathane - yi mu sunga ngu txhini kasiku e zumba digumi da mazana a malembe (1.000). 3Yi mu rinza diphalani ko hokoma, adiya yi nga di khubhunyeta, yi di lema ngu txixambanyo, kasiku a si engeti e kanganyisa mifumo kala me guma malembe a digumi da mazana. Msana keto a fanete kuthukunyulwa ngu mbimwanyana. 4Konako ni to wona sikhalo sa wukoma. Se avava va nga ti khalahatshile ka sona va to nimgwa mtamo wo lamula. Ni to wona kambe mimoya ya vale va nga wilwa misungo ngu mhaka ya wufakazi wa Jesu ni Dipswi da Txizimu; ni vale va nga mbi khizamela txikalana ni txithombe txa txona. Kambe kha va amukela txixambanyo txa txona ha timbanza kwawe mwendo manzani kwawe. Vona va tshumete ve hanya ve fuma kumweko ni Kristu, txipimo txa digumi da mazana a malembe (1.000). 5Aniko vamwane vafi, kha va tshumela ve hanya kala kuza ku guma digumi da mazana a malembe. Akuwa ngu kona kuwuka ko khata ka vafi. 6Va katekile ni ku sawuleka avale va manako txiavelo txa kuwuka ko khata ka vafi. Txitimwi kwawe lifo la wumbidi kha li nga ni mtamo, vona va na va vaphaxeli va Txizimu ni va Kristu, va na fuma nayo digumi da mazana a malembe (1.000). 7Ngako ma di tshanganile malembe yale a digumi da mazana, Sathane a na thukunyulwa kusungwani kwakwe, 8a na huma kasiku e kanganyisa mifumo ya mune wa matshelo a mafu, Goge ni Magoge, e va tshanganisa kasiku ve lwa yimbi; mtengo wawe wu ti dingana ni kutala ka mafu a linene. 9Va to huma ve hangalaka ni dotshe ditiko ve randela midhute ya vasawuleki ni didhoropa do randeka; kambe ku to txhika mndilo ngu nzumani wu txi ta va heta. 10Dhiabhulosi wu a nga ti va xengetela a to vinzwa txizivani ka mndilo ni txivavula, amu se txi nga titi kona txikalana ni mprofeti wa makuhu. Va na zumba ve dyiswa mihumbo wusiku ni mtshikari, ngu hawa ku si gumiko. 11Ngu msana ni to wona txikhalo txa hombe txa wukoma txo basa ni wule a khalahatshako ka txona. Nzuma ni mafu si tutuma si mu thava, ku si sali txikombiso txa hawa si nga ti kona. 12Se ni to wona vafi vahombe ni vavadhoto, va di emile masoni ka txikhalo txa wukoma, se me tulwa mabhuku. Ku tutwe kambe dimwane dibhuku, dibhuku da wutomi. Vafi va to lamulwa madingano ni mithumo yawe, nga ti ti nga ti bhalisilwe tona mabhukuni. 13Linene li to tshumeta vafi va va nga ti ka lona. Lifo ni Hadhesi si to ningela vafi va va nga ti ka sona, se mmwane ni mmwane a to lamulwa mandingano ni mithumo yakwe. 14Lifo ni Hadhesi si to vinzwa txizivani ka mndilo. Aliya i lifo la wumbidi: Txiziva txa mndilo. 15Se avale va nga ti sa bhalwa dibhukuni ka wutomi va to vinzwa nivona txizivani ka mndilo.

will be added

X\