MTULETELO 2

1Ka ngelozi ya Dibanza da Efesu, bhala u txi: A womba tiya awule a nga ñola mtxhanu wa tinyeleti ni timbidi ka dianza dakwe da txinene, awule a tsimbilako hagari ka sipande sa mtxhanu ni simbidi sa nzalama. 2Na yi ziva mithumo yako, kukhatala kwako ni kutimisela kwako, na ti ziva ti to khu si koti kupfana ni vathu vo biha; u va xote u txi va tumbula ava va nga ti ti womba ku mbaprofeti, na i singa vona, u va woni ti to mba makuhu. 3U na ni kutimisela, nguko u tumete kuxaniseka ngu kota ya ditina dangu, aniko khwa rereka. 4Kambe na ku sola nguko u lekile lirando lako lo khata. 5Ngu toneto, alakanya ahawa u nga wela kona, hunduluka u txi teka mahanyelo o khata. U si mahi eto, ni na ku tela se, ngako u si hunduluki ni na ta thavisa txipande txako txa dikhanjela ha wukhaloni ka txona. 6Aniko, ta tinene ti u ti mahako ngu kunyenya mithumo ya vanikolahita, ayi nani ni yi nyenyako. 7Awu a ku ni tinzeve a na engise ati Moya wu embelako Mabanza: Ka wu a no xula, ni na m'tumelela kudya mndonga wa wutomi, wu ku paradiseni ka Txizimu. 8Ka ngelozi ya Dibanza da Esmirna, bhala u txi: “A womba tiya awule wo khata ni kugwitisa, awule a nga ti fite, se e tshumela e hanya. 9Na ku ziva kuxaniseka kwako ni wusiwana wako kambe awe u nyatithombe, ni ziva ni siruko si va ku rukako ngu sona vamwane va ti dhanako ku mbaJudha, na i singa vona, aniko vona i disinagoga da Sathane. 10U nga telwe ngu dizowa ka tile ti no ku ninga kupandiseka. Sathane a na beta mkorani vamwane kwanu, kasi ku mi duka. Mi na heta digumi da masiku na mi txi xaniseka. Zumba u di thembekile kala kufani, se ani ni na ku ninga m'bhoti wa wutomi. 11Awule a ku ni tinzeve a na engise ati Moya wu embelako mabanza. Awu a xulako kha nambi va ni ku xaniswa ngu lifo la wumbidi.” 12Ka ngelozi ya dibanza da Pergamo, bhala u txi: “A womba tiya awule a ku ni ditxhari do hinda, da kulotwa khe ni khe. 13Na ku ziva mu u zumbako kona: Ngu konamo ku ku ni txikhalo txa wukoma txa Sathane. Aniko awe, u ñote tatinene ditina dangu, nguko khwa lamba likholo langu, hambi ka masiku ya Antipasi, fakazi yangu yo thembeka, a nga dawa hagari kwanu, ahawa Sathane a nga aka kona. 14Aniko, ni ni sisolo so kari ni lavako ku si womba: U na ni vathu konaho, va londetelako gondo ya Bhalahamu, awu a nga ti gondisa Bhalaki kuveka txikhuvekiso masoni ka vanana va Israyeli, kasiku ve dya tinyama ta timhamba ta sikwembu sa walo, ni kumaha wugango. 15Ka wumbidi, u navo vamwane va londetelako gondo ya vanikolayita. 16Ngu konaho, hunduluka. U si hunduluki, na kuluveta ni txi ku tela, ni ta lwa navo ngu ditxhari da txisofu txangu. 17Awu a ku ni tinzeve a na engise atile Moya wu embelako Mabanza: ka wule a xulako, ni na mu tsunulela mana yawa ma nga siwa, ni na mu ninga kambe dirigwanyana do basa, dirigwanyana di ka dona ku nga bhalwa ditina da diphya, adi di si ziwiko ngu mthu, hahanze ka wule a di amukelako.” 18Ka ngelozi ya Dibanza da Tiyatira, bhala u txi: “A womba tiya Mwanana wa Txizimu, awu maso akwe ma fanako ni dituro da mndilo, ni mikondo yakwe yi fanako ni msuku. 19Na yi ziva mithumo yako, lirando lako, likholo lako, kukhutala kwako, kutimisela kwako, mithumo yako yo gwitisa yi tate ngutu kupinda yo khata. 20Aniko nina ni txisolo ni nawe, nguko wa leka Jezabheli, msikati wu a ti mahako mprofeti, awu a gondisako ni ku timeta vakhozeli vangu kuve ve maha wugango, ve dya tinyama ta timhamba ta sikewmbu sa walo. 21Ni mu sikete masiku, kasiku e hunduluka. Aniko ene kha ti lavi kuhunduluka ka wugelegele wakwe. 22Wona, ni lava ku mu wisa ha ditahoni ka wulwati, ni va va nga maha nayo wugango va na pfa kuxaniseka ka hombe, ngako va si hunduluki ka mithumo yawe. 23Ni na daya vanana vakwe, kasiku otshe Mabanza me ti ziva ti to ngani ni zivako makungo a titsho ni a mbilu, ni ti to mmweyo ni mmweyo wanu ni na mu tshumetela madingano ni mithumo yakwe. 24Aniko i di anu vamwane, va Tiyatira, mi si londeteliko gondo yiya, anu mi si ziviko kueta ka Sathane nga tona ti va wombisako tona- na mi gela ti to kha ni lavi ku mi rweka wumwane mrwalo, 25aniko zumbani mi di tsani ka tile mi ku nato, kala ni txi ta. 26Ka wule a xulako, ka wule a no veketa mithumo yangu kala magwito, ni na mu ninga mtamo wa kufuma matiko, 27Se a na ma dyisa ngu ndonga ya simbi ya wukoma, e ma fayetela nga tikhadi ta dibumba, 28nga tiya nani ni nga ningiswa tona ngu Tate wangu. Ni na mu ninga kambe Nyeleti ya mixo. 29Awule a ku ni tinzeve, a na engise ati Moya wu embelako Mabanza.”


Copyright
Learn More

will be added

X\