MTULETELO 19

1Msana keto ni to engisa txo nga diguwa da dibutho da hombe da vathu, di txi huwelela, di txi: “Haleluya! Kuhanyisa ni wudhumo ni mtamo si lumba Txizimu txathu. 2Nguko kulamula ka txona nga ditshuri ni kululama. Ngu txona Txizimu txi nga lamula digelegele da hombe di nga ti nyeta mafu ngu wugelegele wa dona; se ka dona Txizimu txi pharete mnoha wa sithumi sa txona.” 3Ve engeta va txi: “Haleluya! Ngu ka dona digelegele diya wutshi wu na tuvika ngu hawa ku si gumiko. 4Se madhota a makumambidi ni mune ni sivangwa sa mune so hanya, si to khizama masoni ka Txizimu, txi nga khalahatsha ha txikhaloni ka wukoma, si txi khozela si txi: “Amen! Haleluya!” 5Konako, ku to huma dipswi di txi ta ngu ha txikhaloni ka wukoma, di txi: “Dhumisani Txizimu txathu, anu motshenu sithumi sa txona, ni nanu mi txi thavako vavadotho ni vahombe!” 6Msana keto ni to engisa txo nga diguwa da dibutho da hombe, do fana ni diguwa da mati o tala, ni kudhinda ka singwalangwanda sa hombe, va txi: “Haleluya! Nguko Mkoma Txizimu txathu txa mtamo wotshe se ngu txona txi fumako. 7He nengeleni hi txi tsaka ngutu, hi txi pfalisa Txizimu, nguko yi hokile mbimo ya ntxhadho wa Txinvutana. Txiwutwa txa Txinvutana, txi ti lulamisete: 8Txi ningilwe kuambala nkhatxwa wo basa wa linya yo khetima, yi ya lisima.” Nguko nkhatxwa wuwa wa linya wu kombisa mithumo yo lulama ya vasawuleki. 9Ngelozi yi to ni gela yi txi: Bhala u txi khawe: “Va katekile avale va nga dhanelwa m'buso wa mtxhadho wa Txinvutana.” Yi engeta yi txi: “Aawa ngu ona mapswi a ditshuri a Txizimu.” 10Konako ni to ti wisa minengeni ka ngelozi, kasiku ni yi khozela, aniko yona yi to ni tsimba, yi txi: “Lambi! U nga mahe eto. Ani ni txithumi kufana ni nawe ni vakakwanu va veketako wufakazi wa Jesu. Txizimu ngu txona u fanelako ku txi khozela!” Kunene wufakazi wa Jesu ngu wona i ku mtamo wa wuprofeti. 11Se ni to wona nzuma yi di tulekile: ku to woneka dihanxi do basa, se mgadhi wa dona a ti dhanwa ku: “Wo thembeka” ni “Wa ditshuri.” Wa lamula, a txi lwa ngu kululama. 12Maso akwe dituro da mndilo, ha msungo kwakwe kuna ni mibhoti ya yingi, ku bhatwe ditina di di si ziwiko ngu mmwane mthu hahanze kwakwe, 13a ti ambate nguwo yi nga ti betilwe mnohani, se ditina di a dhanwako ngu dona va khona: “Dipswi da Txizimu.” 14Sikwata sa masotxhwa a nzumani sa mu londetela, si di gadhile mahanxi o basa, va di ambate siambalo sa linya yo basa ya lisima. 15Ngu mkanani kwakwe ku huma ditxhari do lotwa kasi kuwila mifumo ngu dona. Ngene a no yi risa ngu ndonga ya simbi ya wukoma: ngene a no rukuta nzeka ya vhinya ya kuhenya ko thisa ka Txizimu txa mtamo wotshe. 16Kubhatwe ditina ha nguwoni kwakwe ni ha nyongani kwakwe: “Mfumeli wa vafumeli, Mkoma wa vakoma!” 17Ngu msana ni to wona ngelozi, yi di emile ha ditamboni, yi txi kwangula ngu dipswi da hombe ka sotshe si si purumako ha mpfhukani ka nzuma, yi txi: “Ngonani, tshanganani mi txi ta ka m'buso wa hombe wa Txizimu. 18Mi ta dya nyama ya vafumeli, nyama ya tinduna, nyama ya va nyamitamo, nyama ya mahanxi ni ya vagadhi va ona, nyama ya votshe vathu, vathuseki ni tikhumbi, vavadotho ni vahombe.” 19Konako ni to wona txikalana txi di tshangani kumweko ni vafumeli va ha mafuni, ni sikwata sawe sa masotxhwa, kasi kuta lwa ni mgadhi wa dihanxi ni mtxawa wakwe wa masotxhwa. 20Kambe txikalana txi to ñolwa kumweko ni mprofeti wa makuhu, awu, ngu kuthumela txikalana, a nga ti mahile sixamaliso so kanganyisa ngu sona avale va nga amukela txixambanyo txa txikalana, ve khozela txithombe txa txona: Txikalana ni mprofeti wa makuhu va to rinzwa, va txi hanya, digovani ka mndilo, wu turako ngu txivavula. 21Vamwane va to dawa ngu ditxhari di nga txi huma ngu mkanani ka mgadhi wa dihanxi. Se sotshe sinyana si khura ngu nyama yawe.

will be added

X\