MTULETELO 17

1Se yimweyo ka tingelozi ta mtxhanu ni timbidi ti nga ti ñote mtxhanu wa magombe ni mambidi yi to ta yi ta ni gela tiya: “Ngono, ni ta ku komba kulamulwa ka digelegele da hombe, di nga khalahatsha ha mabambe ka mati o tala, 2vafumeli va mafu va mahile wungango nado, se vaaki va ha mafuni va levile ngu vhinya ya wugelegele wa dona.” 3Ngelozi yi to ni teka ngu mu ka moya yi ni yisa txiwulani, ahawa ni nga ya wona wamsikati a di khalahatshile txitimwi ka txikalana txo bhilivila, txi di tate ngu matina o ruketela, txi di ni mtxhanu wa misungo ni mimbidi ni digumi da titxheho. 4Wamsikati a ti ni siambalo sa masilika o bhilivila, a di bombile ngu nzalama, ni marigwi a lisima la hombe ni maperola; manzani a ti ni digombe do mahwa ngu nzalama, di di tate ngu sa manyala: i nzambwa ya wugelegle wakwe. 5Ha mbanza kwakwe ku ti bhatwe ditina da msisalo, da ku: “Bhabhilona wa Hombe, mame wa magelegele ni wa sa manyala sa ha mafuni.” 6Se ni to wona ti to wamsikati a ti levile ngu mnoha wa vasawuleki ni mnoha wa tifakazi ta Jesu. Ngako ni txi mu wona ni to tala ngu kuxamala ngutu. 7Aniko ngelozi yi ni gete yi txi: “U xamala txani kani?” Ani ni na ku txhamusela ta msisalo wa wamsikati wuwa ni wa txikalana txiya txa mtxhanu wa misungo ni yimbidi ni digumi da titxheho, atxiya txi nga mu rwala. 8Txikalana txi u nga txi wona, txi titi ho, aniko kha txi swi txi di ho; txi hafuhi ni kuhuma ngu Diphalani ko hokoma, kambe txi ya kulovani: Vaaki va ha mafuni, avava matina awe ma nga mbi bhalwa dibhukuni ka wutomi, kukhukhela ditiko di tumbuluka, va na xamala mbimo yi va no wona txikalana, nguko txona txi titi ho, konaku kha txi swi txi di ho, aniko txi na tshumela txi humelela. 9Ahawa ku laveka mapimo a wuzivi: Misungo yiya ya mtxhanu ni yimbidi i mtxhanu wa mimango ni yimbidi, ahawa wu wamsikati a nga khalahatsha kona. Kambe i mtxhanu wa vafumeli ni vambidi. 10mtxhanu wa vona va wite, mmweyo a ngadi ho, mmwane kha nzi kuta; kambe mbimo yi a no ta, a na ta fungala mbimo ya yidotho. 11Txikalana txi txi nga ti ho, atxiya se txi ku si nga ho, ngu txona i ku mfumeli wa wutxhanu ni vararu; txona njimwetxo txa sile sa mtxhanu ni simbidi, aniko txi ya kulovani. 12“Titxheho tile ta digumi u nga ti wona ndigumi da vafumeli va si nziko kuamukela mfumo. Kambe vona va na amukela wukoma kota vafumeli txipimo txa txikhati tximwetxo dwe, kumweko ni txikalana. 13Vafumeli vava vana ni kupima kumweko: Kuningela wufumeli wawe ni wukoma wawe ka Txikalana. 14Va na lwa ni Txinvutana, aniko Txinvutana txi na va xula, nguko txona i Mkoma wa vakoma ni Mfumeli wa vafumeli, se kumweko natxo kambe va na xula, avale va nga dhanwa, avale va nga sawulwa, ni makholwa.” 15Ngelozi yi to engeta yi txi: Mati yawa u nga ma wona, ahawa digelegele di nga khala kona, i matiko ni mabutho a vathu, mifumo ni tidimi. 16Titxheho ti ta digumi u nga ti wona kumweko ni txikalana, si na vengela wu wa digelegele, si na m'tshambula tinguwo, si mu leka i di tximbwiri; si na dya nyama yakwe, si mu hisa ngu mndilo, 17Nguko Txizimu txi si ningile mbilu ya kumaha makungo a txona, ngu mapimo mamwane: Kuningela wukoma wa digelegele ka txikalana, kala kuza mapswi a Txizimu me hetiseka. 18“Ngu kugwitisa, wamsikati wu u nga mu wona, i didhoropa da hombe di fumako vafumeli va mafu.”


Copyright
Learn More

will be added

X\